ဧပြီ ၂၁၊ ၂၀၂၅။ People’s Spring
မန္တလေးတိုင်း၊ မတ္တရာမြို့နယ်အနောက်ခြမ်းက အိုက်ဒိုင်ရွာကို စစ်တပ်က လေကြောင်းတိုက်ခိုက်ခဲ့တာမို့ သံဃာတစ်ပါးနဲ့ ပြည်သူ ၃ဦးထိခိုက်ဒဏ်ရာတွေရရှိခဲ့တယ်လို့ သိရပါတယ်။
အိုက်ဒိုင်ရွာကို ဧပြီ ၂၁ရက် ဒီနေ့ နေ့လည် ၁နာရီကျော်မှာ လေကြောင်းတိုက်ခိုက်ခဲ့တာလို့ ဒေသခံတွေက ပြောပါတယ်။ လေကြောင်းတိုက်ခိုက်ခံရတဲ့ ဘုန်းကြီးကျောင်းဟာ မတ်လ ၂၈ရက်က အင်အားပြင်းငလျင်ဒဏ်ကြောင့် ကျောင်းပြိုကာ သံဃာတော်နဲ့ပြည်သူတွေ သေဆုံးထားတာဖြစ်ပြိး အဲဒီ ဘုန်းကြီးကျောင်းကို ဗုံးကြဲတိုက်ခိုက်သွားတာပါ။
“ဘုန်းကြီးတစ်ပါးနဲ့ ပြည်သူ ၃ဦးဒဏ်ရာရတယ်လို့ပဲ သိထားပါတယ်။ လေယာဉ်တွေက အဲတာအပြီး ဆက်တိုက်ကို ဝဲနေတာ”လို့ ဒေသခံတစ်ဦးက ပြောပါတယ်။
Public Service Announcement
ဒါ့အပြင် ဒီနေ့ ညနေ ၃နာရီကျော်မှာလည်း စဉ့်ကူးမြို့နယ်တောင်ခြမ်းက ဇီးကုန်းကျေးရွာကို လေကြောင်းတိုက်ခိုက်ခဲ့တာမို့ နေအိမ် ၄လုံးထိခိုက် ပျက်စီးခဲ့တယ်လို့ သိရပါတယ်။ ဇီးကုန်ကျေးရွာကို လေကြောင်းတိုက်ခိုက်ခဲ့တဲ့ လေယာဥ်ဟာ မိတ္ထီလာ ရှမ်းတဲလေတပ်ကနေတက်လာလို့ သတင်းရင်းမြစ်တွေက ဆိုပါတယ်။
“ရွာတောင်ပိုင်းကို ချသွားတာ။ လူတွေလွတ်လိုက်တယ်။ နွားတစ်ကောင် သေတယ်”လို့ ဒေသခံတစ်ဦးက ပြောပါတယ်။
စစ်တပ်ဟာ မနေ့ကလည်း မတ္တရာမြို့နယ်အရှေ့ခြမ်းကို လေကြောင်းတိုက်ခိုက်ခဲ့ပါသေးတယ်။ မနေ့ကပဲ မတ္တရာမြို့နယ်အနောက်ခြမ်းက ရှင်လှတောင်ရွာကိုလည်း စစ်တပ်က မီးရှို့ဖျက်ဆီးခဲ့ပါသေးတယ်။
မန္တလေးတိုင်းအတွင်းက တောင်သာ၊ မတ္တရာ၊ စဉ့်ကူး၊ သပိတ်ကျင်းမြို့နယ်တို့ကို စစ်တပ်က လေကြောင်းတိုက်ခိုက်တာတွေ ပြုလုပ်နေပြီး တပတ်အတွင်း ပြည်သူ ၅၀ဦးခန့် သေဆုံးထားပါတယ်။
