မေ ၄၊၂၀၂၅။ဇေအောင်/People’s Spring
စစ်ကိုင်းတိုင်း၊ မြင်းမူမြို့ပေါ်ကနေ ရွှေဆိုင်ဓါးပြတိုက်ပြီးပြန်လာတဲ့ ဓါးပြအဖွဲ့ကို ဖမ်းဆီးနိုင်ခဲ့တယ်လို့ စစ်ဒေသ – ၁ ဗျူဟာ (၆၄) ဗျူဟာရုံးအဖွဲ့၊ ရုံးအဖွဲ့မှူးက ပြောပါတယ်။
မေလ ၁ရက် မနက် ၁၀နာရီဝန်းကျင်က မြင်းမူမြို့ပေါ်က ရွှေဧကရာဇ်ရွှေဆိုင်ကို ဓားပြတိုက်ပြီး ဧရာဝတီမြစ်ကြောင်းအတိုင်း ပြန်လာတဲ့ ဓားပြအဖွဲ့ကို ပြည်သူတစ်ဦးရဲ့ သတင်းပေးမှုနဲ့ အမျိုးသားညီညွှတ်ရေးအစိုးရ၊ ကာကွယ်ရေးဝန်ကြီးဌာန အမှတ်(၁)စစ်ဒေသ(၁) ဗျူဟာအမှတ် (၆၄)၊ မြင်းမူမြို့ နယ်မြေ (၁) ပ.က.ဖ နဲ့ ငါန်းဇွန်မြို့နယ် ပ.က.ဖတို့ ပူးပေါင်းဖမ်းဆီးခဲ့တာလို့ ဗျူဟာ(၆၄) ရုံးအဖွဲ့မှူးက ပြောပါတယ်။
“ကျနော်တို့ မြင်းမူနယ်ကို စစ်ဆင်ရေးလုပ်ဖို့သွားတဲ့အချိန်မှာ တိုက်တိုက်ဆိုင်ဆိုင်ပဲ ရွှေဆိုင်ကိုဓါးပြတိုက်လာတယ်ဆိုပြီး သတင်းရလို့ ရေကြောင်းကနေ စောင့်ဖမ်းလိုက်တာပါ။ လက်နက် ၃ လက်နဲ့အတူ လေးယောက်ဖမ်းဆီးရမိတာပါ။”လို့ ရုံးအဖွဲ့မှူးက ပြောပါတယ်။
Public Service Announcement
ဖမ်းဆီးရမိသူတွေကတော့ ယုန်လေး(ခ)ပြည့်ဖြိုး အသက် ၁၉နှစ်၊ လင်းယုန်(ခ)အောင်စိုးမိုး အသက် ၂၀နှစ်၊ ဂန္တာရ(ခ)သဲမောင် အသက် ၂၀နှစ်၊ မိုးကြိုး(ခ)အောင်စိုးမိုး အသက်၂၉ နှစ်တို့ ဖြစ်ကြောင်း၊ ဖမ်းဆီးရမိတဲ့ နေရာမှာပဲ ဓားပြအဖွဲ့နဲ့အတူ ပါလာတဲ့ ကာလတန်ကြေး ကျပ်သိန်း ၂၆,၀၀၀ခန့် တန်ကြေးရှိတဲ့ ရွှေထည်ပစ္စည်းတွေကို ရွှေဧက္ကရာဇ်ရွှေဆိုင်ပိုင်ရှင်ထံ ပြန်လည်အပ်နှံခဲ့တယ်လို့ ဗျူဟာ (၆၄)ဗျူဟာရုံးအဖွဲ့က ထုတ်ပြန်ပါတယ်။
တရားခံတွေကိုတော့ မြင်းမူမြို့နယ် ပ.လ.ဖထံ လွှဲပြောင်းခဲ့ပြီး ဆက်လက်စစ်ဆေးနေတယ်လို့ ဗျူဟာ (၆၄) ဗျူဟာရုံးအဖွဲ့က အသိပေးပါတယ်။
ရုပ်သံ -သတင်းနှင့် ပြန်ကြားရေးဗျူဟာ(၆၄) ရုံးအဖွဲ့
