မေ ၂၈၊၂၀၂၅။ရဲခေါင်/People’s Spring
မကွေးတိုင်း၊ပခုက္ကူမြို့အခြေစိုက် ခြေမြန်တပ်မ (၁၀၁)မှ အင်အား ၁၀၀ကျော်ပါစစ်ကြောင်းသည် မြိုင်မြို့သို့ ဦးတည်နေကြောင်း ဒေသတွင်းသတင်းရင်းမြစ်အချို့က ပြောသည်။
အဆိုပါစစ်ကြောင်းသည် ယမန်နေ့(မေလ ၂၇ ရက်)က ပခုက္ကူမြို့နယ် ညောင်ဂျစ်ပင်ကျေးရွာရောက်ရှိကာ ယနေ့ (မေလ ၂၈ရက်)တွင် ဖောင်ကြောင်းကျေးရွာ အနောက်ဘက်ရှိနေသည်ဟု ဆိုသည်။
“မြိုင်နယ်အတွင်းမှ ပျူရွာတွေဆီကို ရောက်အောင်သွားမယ်လို့သိရပါတယ်။မြေပြင်စစ်ကြောင်းနဲ့အတူ လေကြောင်းပါ ပါမယ်လို့သိရပါတယ်”ဟု အညာမြေအရပ်ဘက်လူမှုအဖွဲ့အစည်းတာဝန်ရှိသူက စစ်ကြောင်းထိုးလာသည့် စစ်ကောင်စီတပ်အခြေအနေနှင့်ပတ်သက်ပြီး လူထုနွေဦးသို့ ရှင်းပြသည်။
Public Service Announcement
စစ်ကြောင်းထိုးလာသည့် လမ်းကြောင်းအတိုင်းဆိုပါက မြိုင်မြို့နယ်ရှိ တွင်းမပျူစောထီးရွာနှင့် သရက်ကန်ပျူစောထီးရွာသို့ ဝင်ရောက်နိုင်ကြောင်း ၎င်းက ခန့်မှန်းသည်။
ထို့ကြောင့် အဆိုပါကျေးရွာများအနီးရှိ ပြည်သူများအနေဖြင့် လေကြောင်းအန္တရာယ် နှင့် မြေပြင်မှလာနေသည့် စစ်ကောင်စီတပ် စစ်ကြောင်း အထူးသတိပြုရန် မြိုင်မြို့နယ်အရပ်ဘက်အဖွဲ့အစည်းအချို့က တိုက်တွန်းသည်။
“မြိုင်မြို့နယ်တောင်ပိုင်းက မိဘပြည်သူများ သတိဝရိယနဲ့ နေထိုင်ကြဖို့အသိပေးအပ်ပါတယ်”ဟု We Love Myaing တာဝန်ရှိသူက ပြောသည်။
ယခု မေလ ၂ ရက်မှ ၇ရက်အထိ မြိုင်မြို့နယ် အရှေ့တောင်ပိုင်းမှ သစ်ကြီးတော ၊ လေးတန်းနှင့် ပေါက်ပင်ကိုင်းကျေးရွာတို့ကို စစ်ကောင်စီတပ်က စစ်ကြောင်းထိုးကာ ဘုန်းကြီးကျောင်းအပါအဝင် ပြည်သူနေအိမ် အလုံး ၄၀ခန့်ကို မီးရှို့ဖျက်ဆီးခဲ့သည်။
အဆိုပါ စစ်ကြောင်းကို ဒေသခံကာကွယ်ရေးတပ်များက တိုက်ခိုက်ရာ စစ်ကောင်စီတပ်သားရုပ်အလောင်း ရှစ်လောင်း၊ MA 1 တစ်လက်၊ ကျည် ၅၀၀ကျော်နှင့် ခဲယမ်းအချို့သိမ်းဆည်းရရှိခဲ့ပြီး စစ်ကောင်စီတပ်သည် ပခုက္ကူမြို့သို့ တပ်ပြန်ဆုတ်သွားခဲ့သည်။
