မေ – ၃၁ ၊၂၀၂၅ ၊ ဆိုင်းမင်း/People’s Spring
မန္တလေးတိုင်း ၊ မြင်းခြံခရိုင် ၊ နွားထိုးကြီးမြို့နယ် ထဲက ဝက်လူးကျေးရွာအပါအဝင် အနီးတဝိုက်ရွာတွေ က ဒေသခံ ဦးရေ ၄၀ ထက်မနည်းကို စစ်ကောင်စီတပ်က ဖမ်းဆီးထားတယ်လို့ ဒေသတွင်းတော်လှန်ရေးရင်းမြစ်အချို့ဆီကသိရပါတယ်။
ဝက်လူးရွာတဝိုက်ကို လွန်ခဲ့တဲ့ ၃ ရက်ခန့် ကစတင်စစ်ကြောင်းထိုးပြီး ဒေသခံတွေကို ဝက်လူးရွာ ရဲစခန်းထဲမှာ ဖမ်းဆီးထားတာပါ။
ဖမ်းဆီးခံရသူတွေထဲက ၅ ဦး ကတော့ ပြီးခဲ့တဲ့ ရက်ပိုင်းမေလ ၂၉ ရက်က ပြန်လည်လွတ်မြောက်လာတယ်လို့သိရပါတယ်။
Public Service Announcement
“သူတို့လည်းလွတ်ရာကိုပြေးရပြီ၊ ကျန်တဲ့သူတွေကတော့ အခုထိရဲစခန်းထဲမှာရှိတုန်းပဲ”လို့ ဒေသခံတစ်ဦးကပြောပါတယ်။
စစ်ကောင်စီတပ် ဖမ်းဆီးသွားသူတွေထဲက သတ်ဖြတ်ခံရသူတွေလည်းရှိပြီး ၄ ဦးရဲ့ ရုပ်အလောင်းကို ပြန်လည်ရရှိခဲ့ ပေမယ့် နာရေးကိုလည်း တိတ်တဆိတ် ပြုလုပ်ခဲ့ရတယ်လို့သိရပါတယ်။
ဒါပေမယ့် ဝက်လူးရွာထဲမှာ စစ်ကောင်စီစစ်ကြောင်း ရှိနေဆဲဖြစ်တာကြောင့် ရွာထဲကိုပြန်လည် မဝင်ရောက်နိုင်တဲ့အတွက် သတ်ဖြတ်ခံရသူတွေရဲ့ အသေးစိတ်အချက်အလက်တွေကိုမသိရသေးဘူးလို့ သတင်းရင်းမြစ်က ဆိုပါတယ်။
မေလ ၁၅ ရက်ကစတင်ပြီး မြင်းခြံခရိုင် ထဲက မြင်းခြံ ၊ နွားထိုးကြီး ၊တောင်သာမြို့နယ်တွေအတွင်း စစ်ကောင်စီတပ်ဖွဲ့ တပ်စွဲရာ နေရာတွေကို ဒေသတွင်းတော်လှန်ရေးအင်အားစုတွေက ၉/အညာမြေ အမည်နဲ့ စစ်ဆင်ရေးတစ်ရပ် ဆင်နွှဲခဲ့တာပါ။
အဲဒီစစ်ဆင်ရေးမှာ နွားထိုးကြီးမြို့နယ် က ဝက်လူးရွာ ရဲစခန်းကို တိုက်ခိုက်ရာမှာ စစ်ကောင်စီတပ်က လေကြောင်းပစ်ကူကို အလွန်အကျွံ အသုံးပြုခဲ့တယ်လို့ ဒေသတွင်း တော်လှန်ရေးရင်းမြစ်က ဆိုပါတယ်။
စစ်တပ်ဝါဒဖြန့် တယ်လီဂရမ်အချို့မှာလည်း ဝက်လူးရဲစခန်းမကျ ဖို့ လေကြောင်းကနေ အဆက်မပြတ်ဗုံးကြဲခဲ့တယ်လို့ ရေးသားဖြန့်ဝေခဲ့ကြပါတယ်။
ဝက်လူရဲစခန်းတိုက်ပွဲနဲ့ စစ်ကောင်စီလေတပ်ရဲ့ တိုက်ခိုက်မှုတွေကြောင့် ဝက်လူး ၊ ပဲချက် ၊ ဂွေးပင်တော ၊ ထန်းခွ ၊ ထန်းစင်၊ နဘဲမြစ်စတဲ့ ရွာတွေက ဒေသခံ ပြည်သူ ၇,၀၀၀ ကျော် ဘေးလွတ်ရာကိုထွက်ပြေးခဲ့ကြရပါတယ်။
မတိမ်းရှောင်နိုင်ဘဲ ရွာမှာ ကျန်ခဲ့တဲ့သူတွေကို စစ်ကောင်စီတပ်က ဖမ်းဆီးခဲ့တာလို့လည်းသိရပါတယ်။
မြန်မာနိုင်ငံအလယ်ပိုင်းမှာတည်ရှိပြီး ဧရာဝတီမြစ်အရှေ့ဘက်ကမ်းမှာ ဖိုခနောင့်သဖွယ် ရှိနေတဲ့ တောင်သာ ၊ နွားထိုးကြီးနဲ့ မြင်းခြံမြို့နယ်တို့ဟာ အာဏာသိမ်းစစ်ကောင်စီတပ်ကို လက်နက်စွဲကိုင်တော်လှန်မှု အားကောင်းရာဒေသဖြစ်ပါတယ်။
တော်လှန်ရေးတပ်တွေ တိုက်ခိုက်ခဲ့တဲ့ ရဲစခန်းဟာ ဝက်လူးရွာ(အနောက်) မှာရှိတာဖြစ်ပြီး ၂၀၁၈ ခုနှစ် ၊ထွေအုပ်ရဲ့ စာရင်းတွေအရ ဝက်လူအနောက်တစ်ရွာတည်းမှာတင် လူဦးရေ ၁,၇၀၀ ကျော်ရှိပါတယ်။
