ဇူလိုင်-၉၊၂၀၂၅။ဇေအောင်/People’s Spring
ပင်စင်ထုတ်မယ့်အငြိမ်းစားဝန်ထမ်းတွေကို စစ်ကောင်စီက လဝကရုံးသွားပြီး Smart Card လုပ်ခိုင်းနေပါတယ်။
အငြိမ်းစားတွေရဲ့ပင်စင်လစာတွေကို လိမ်လည်ထုတ်ယူတာတွေ မလုပ်နိုင်ဖို့နဲ့ လူပုဂ္ဂိုလ်မှန်ကန်မှု ရှိာမရှိ စိစစ်နိုင်ဖို့ သက်ဆိုင်ရာ လဝကရုံးတွေမှာ Smart Card သွားလုပ်ကြဖို့ စစ်ကောင်စီရဲ့ မြန်မာ့စီးပွားရေးဘဏ်က ကြေညာပါတယ်။
Smart Card ရလာရင်လည်းဘဏ်ကိုမိတ္တူယူဆောင်လာဖို့ မြန်မာ့စီးပွားရေးဘဏ်က အသိပေးပါတယ်။ ပင်စင်စားတွေဟာ သက်ကြီးရွယ်အိုတွေဖြစ်တာကြောင့် ဘဏ်ကိုတောင် ကိုယ်စားလွှတ်ရတာတွေရှိနေပြီး လဝကရုံးကို သွားဖို့ အခက်အခဲရှိတယ်လို့ ပင်စင်စားရဲ့ မိသားစုဝင်တွေက ပြောပါတယ်။
Public Service Announcement
“ပင်စင်စားတွေကို သက်သက်ဒုက္ခပေးတာ။ အသက် ၈၀ ကျော် ၉၀ ကျော်တွေ အိပ်ရာထဲလဲနေတာ လက်မှတ်တောင်မထိုးနိုင်တဲ့သူတွေရှိတယ်။ ဘယ်လိုလုပ် Smart Card သွားလုပ်ရမလဲ”လို့ ပင်စင်စားမိဘရဲ့ သားတစ်ဦးက ပြောပါတယ်။
လက်တလော Smart Card မရသေးလည်း ပင်စင်လစာထုတ်ပေးမယ်လို့ စစ်ကောင်စီရဲ့ မြန်မာ့စီးပွားရေးဘဏ်က ဆိုပါတယ်။
ပြီးခဲ့တဲ့ရက်ပိုင်းအတွင်းကပဲ Smart Card လုပ်ပေးတာကို စစ်ကောင်စီက တရက်ခန့်ရပ်နားပြီး အခုတော့ ပြန်လုပ်ပေးနေပါတယ်။
စစ်ကောင်စီဟာ ပြီးခဲ့တဲ့ နှစ်ကတည်းက သူတို့စိုးမိုးရာဒေသတွေမှာ Smart Card တွေ ပြုလုပ်ပေးနေပြီး မျက်လုံးနဲ့ လက်ဗွေပါ Scan ဖတ်ယူလိုက်တာကြောင့် ပြညွသူတွေရဲ့ အချက်အလက်တွေကို နည်းပညာနဲ့ ပါ ထိန်းချုပ်လိုက်တာဖြစ်ကြောင်း နည်းပညာကျွမ်းကျင်သူတွေက မှတ်ချက်ပြုပါတယ်။
