စစ်​ကောင်စီ ကျောက်မဲမြို့ကို ၆ရက်အတွင်း ၃ကြိမ်မြောက်ဗုံးကြဲ၊ ပြည်သူအချို့ထိခိုက်​သေဆုံးမှုရှိ

ဇူလိုင်-၁၁၊၂၀၂၅။ဇော်ရမ်း/People’s Spring

စစ်​ကောင်စီက TNLA သိမ်းပိုက်ထိန်းချုပ်ထား​သော​ကျောက်မဲမြို့ကို ယ​နေ့ နံနက်အစောပိုင်း၌ လေကြောင်းမှဗုံးကြဲခဲ့ရာ အရပ်သားထိခိုက်သေဆုံးမှုများရှိခဲ့သည်။

ကျောက်မဲမြို့ပေါ်ရှိ ကောလီဟိုတယ် နှင့် ခရိုင်ရဲတပ်ဖွဲ့မှူးရုံးကို ဇူလိုင် ၁၁ ရက်နံနက်၃နာရီ ၉မိနစ်၊ ‌၃နာရီ၁၄မိနစ်နှင့် ၃နာရီ၁၃မိနစ်တို့တွင် ဂျက်ဖိုက်တာဖြင့်ဗုံးသုံးလုံးကြဲသွားခြင်းဖြစ်သည်။

“ဟိုတယ်ကိုပစ်သွားတာမှာလူသေတယ်။ အခုဆိုရင်မြို့ကနေသက်ကြီးရွယ်အိုတွေ ရှောင်ရပြန်ပြီ။ ဒီလိုတွေလာလာပစ်နေတာကိုဘယ်သူကမှမတားဆီးနိုင်ဘူးဖြစ်နေပြီ”ဟုကျောက်မဲမြို့ခံတစ်ဦးကပြောသည်။

Public Service Announcement

ကောလီဟိုတယ်အား စစ်ပ်ကလေကြောင်းမှတိုက်ခိုက်မှုတွင် အရပ်သားတစ်ဦးသေဆုံးပြီး ဒဏ်ရာရသူလည်းရှိကြောင်း ၎င်းကပြောသည်။ ခရိုင်ရဲတပ်ဖွဲ့မှူးရုံးအား ဗုံးကြဲမှုနှင့်ပတ်သက်၍ ထိခိုက်မှုအခြေနေကိုမသိရသေးပေ။

စစ်ကောင်စီသည် တအောင်းအမျိုးသားလွတ်မြောက်ရေးတပ်မတော်(TNLA)ထိန်းချုပ်‌သိမ်းပိုက်ထားသော ကျောက်မဲ၊သီပေါနှင့် မိုးကုတ်မြို့နယ်တို့ကို လေကြောင်းမှ မကြာခဏ ဗုံးကြဲနေသည်။ ကျောက်မဲမြို့ကို ဇွန်လ ၂၄ရက်၊ ဇွန်လ ၂၇ရက်၊ ဇွန်လ၂၉ရက်၊ ဇူလိုင်လ ၆ရက် နှင့် ဇူလိုင်လ ၈ရက်ကလည်း ဗုံးကြဲတိုက်ခိုက်ရာ အရပ်သား ၆ ဦးသေဆုံးခဲ့သည်။ ကျောက်မဲမြို့ကို ဇူလိုင်လတွင် ၆ ရက်အတွင်း ၃ကြိမ်ဗုံးကြဲခြင်းဖြစ်သည်။

စစ်ကောင်စီ နှင့် TNLAသည် နောင်ချိုမြို့တွင်တိုက်ပွဲပြင်းထန်နေပြီး ကျောက်မဲ-နောင်ချို ပြည်‌ ထောင်စုလမ်းပိုင်းကိုTNLAက ဖြတ်သန်းခွင့်ပိတ်ထားလိုက်ပြီဖြစ်သည်။

စစ်ကောင်စီသည် ရှမ်းပြည်နယ်မြောက်ပိုင်း၊ မန္တလေးတိုင်း၊ မကွေးတိုင်း၊ ပဲခူးတိုင်း၊ စစ်ကိုင်းတိုင်းနှင့် ဧရာဝတီတိုင်းတို့မှ မြို့နယ်အချို့ကိုလည်း လေကြောင်းတိုက်ခိုက်မှုများဆက်တိုက်လုပ်နေသည်။

ဇူလိုင် ၁၁ ရက်နံနက် ၁ နာရီခန့်၌ စစ်ကိုင်းမြို့နယ်၊ လင်းတလူးကျေးရွာစစ်ဘေးရှောင်ဘုန်းကြီးကျောင်းကို လေကြောင်းမှဗုံးကြဲရာစစ်ဘေးရှောင် ၃၀ ဦးထက်မနည်းသေဆုံးပြီး အများအပြား ဒဏ်ရာရခဲ့သည်။