ဇူလိုင်-၁၁၊၂၀၂၅၊မေ၊/People Spring
စစ်ကိုင်းမြို့နယ်၊ လင်းတလူးကျေးရွာရဲ့ စစ်ဘေးရှောင်တွေရှိနေတဲ့ သစ္စဝါဒီကျောင်းတိုက်ကို စစ်ကောင်စီက လေကြောင်းတိုက်ခိုက်ခဲ့ရာ ကလေးငယ်သုံးဦးအပါအဝင် အနည်းဆုံး ပြည်သူ ၂၂ ဦး သေဆုံးပြီး ၅၀ကျော် ဒဏ်ရာရခဲ့တယ်လို့ ဒေသခံတွေက ပြောပါတယ်။
ဇူလိုင် ၁၁ရက် ဒီကနေ့ မနက် ၁နာရီဝန်းကျင်မှာ လင်းတလူကျေးရွာက သစ္စဝါဒီဘုန်းကြီးကျောင်းကို စစ်တပ်က ဗုံးကြဲတိုက်ခိုက်ရာ ကလေးငယ် သုံးဦးအပါအဝင်ဒေသခံအမျိုးသား ၇ဦး၊အမျိုးသမီး ၁၅ဦး စုစုပေါင်း ပြည်သူ ၂၂ဦး သေဆုံးခဲ့တာလို့ နေခင်းပိုင်းအထိ ကောက်ယူရရှိထားတဲ့ စာရင်းအရသိရပါတယ်။
“စစ်ရှောင်တွေ အများကြီးရှိတဲ့ ဘုန်းကြီးကျောင်းကို လာကြဲသွားတာ။ဒဏ်ရာပြင်းထန်တာတွေလည်းရှိတယ်။တော်တော်ကိုဆိုးဆိုးရွားရွားပဲ”လို့ ဒေသခံတစ်ဦးက ပြောပါတယ်။
Public Service Announcement
စစ်ရှောင်တွေဘုန်းကြီးကျောင်းထဲစုဝေးအိပ်နေကြချိန် ဗုံးကြဲခံရတာကြောင့် သေဆုံးဒဏ်ရာရသူတွေများခဲ့တာဖြစ်တယ်လို့ဒေသခံတွေကပြောပါတယ်။ဒါအပြင် ဇူလိူင် ၁၁ ရက်နေ့ခင်းပိုင်းအထိ ရှာဖွေရေးတွေလုပ်လို့မပြီးသေးတာ၊ ဒဏ်ရာပြင်းထန်သူတွေရှိတာကြောင့် သေဆုံးသူအရေအတွက်တွေဟာတိုးလာနိုင်တယ်လို့ လည်းရှာဖွေရေး ကယ်ဆယ်ရေးလုပ်ပေးနေသူအချို့ကပြောပါတယ် ။
စစ်တပ်ဗုံးကြဲလို့ သေဆုံးသူတွေဟာကနဦးစာရင်းတွေအရ ပုဂံတူရွာက မရွှန်းလဲ့ထွန်း ၊မခိုင်သဇင် ၊မသင်းသင်းခိုင် ၊မတင်မျိုးဆွေ ၊မမီစိုး ၊မအေးအေးသင်း၊မခင်ခင်ချော ၊ဒေါ်မော်ကြီး ၊ဒေါ်ပြာကြီး ၊ကိုစိုင်းမင်းခန့် ၊ကိုလှိုင်မင်းခန့် ၊ကိုထွန်းထွန်းနိုင် ၊ကိုမြင့်နိုင် နဲ့ ကျော်ဇေယျရွာက မအေးမြတ်မော် ၊မတင်မျိုးကြည် ၊မကြည် ၊မလှိုင် ၊ ဒေါ်ခင်လေး၊ မသီိစန္ဒာ ၊မောင်ဝေဖြိုး ၊ကိုလင်း ၊ကိုခင်မောင်လွင် တို့ဖြစ်ပါတယ်။ အဲဒီအထဲမှာ မောင်ဝေဖြိုးက အသက် ၈ နှစ် ၊ မောင်စိုင်းမင်းခန့် က အသက် ၁၀ နှစ် ၊ မောင်လှိုင်မင်းခန့်က အသက် ၁၂ နှစ် အရွယ် ကလေးငယ်တွေဖြစ်ပါတယ် ။
စစ်ကိုင်းမြို့နယ် အုန်းတောရှိ တင့်ကားတပ်ရင်း(၆၀၀၅)ကနေ စစ်ကြောင်းတွေထိုးနေတာမို့ အဲဒီတ ကြောက ကျော်ဇေယျာ၊ပုဂံတူ၊သစ်ချိုကုန်း၊ရုံးပင်ကန်၊ဆင်ပြေ၊ဒေါင်းမ၊မအူပင်၊ညောင်ကုန်း၊သပြေပင်၊တဲကြီး၊သလွန်ဖြူ ၊ဆင်မြေစတဲ့ကျေးရွာတွေက ဒေသခံတွေဟာ သစ္စဝါဒီဘုန်းကြီးကျောင်းမှာ လာရောက်စစ်ရှောင်နေတာ ရက်၂၀ နည်းပါးရှိပြီလို့ သိရပါတယ်။
လေကြောင်းတိုက်ခံရမှုအတွင်းမှာ ပုဂံတူကျေးရွာက အများဆုံး သေဆုံးခဲ့တာလို့ သိရပါတယ်။
