ဇူလိုင်-၂၁၊၂၀၂၅။ဇော်ရမ်း/People’s Spring
ဖားကန့်မြို့နယ်၊မှော်စီစာရွာတွင်ယနေ့ နံနက်ပိုင်း၌ မြေစာပုံပြိုကျပြီး ရေမဆေးကျောက်ရှာသူ ၂၀ဦးထက်မနည်း မြေပိသွားကာ လက်ရှိတွင် ၁၇ဦးရုပ်အလောင်း ပြန်တွေ့ထားသည်။
ဇူလိုင် ၂၁ ရက်နံနက် ၉နာရီ ၄၀မိနစ်ခန့်တွင် ပြိုကျခြင်းဖြစ်ပြီး သေဆုံးသူများ၏ မိသားစုဝင်များကို ရှာဖွေကယ်ဆယ်ရေးသမားများက အကြောင်းကြားနေသည်ဟု သတင်းရရှိသည်။
“ဖားကန့်မှာတိုက်ပွဲတွေဖြစ်နေတော့လေကြောင်းနဲ့လက်နက်ကြီးရန်ကို ရင်တထိတ်ထိတ်နဲ့ နေရတာ။ ကျန်တာကို သတိမထားမိဘူးထင်တယ်ဗျာ။ သေဆုံးတာ များတယ်” ဟု မြေစာပုံပြိုကျသည့်နေရာ အနီးတွင်ရှိနေသူတစ်ဦးကပြောသည်။
Public Service Announcement
မြေစာပုံပြိုကျမှုတွင်ရေမဆေးကျောက်ရှာဖွေနေသူ ၂၀ဦးထက်မနည်း မြေပိသွားပြီးယနေ့ နေ့လယ် ၁၂နာရီခွဲခန့်အထိ ၁၇လောင်းပြန်တွေ့ထားသလို သေဆုံးသူနှင့်ပျောက်ဆုံးသူ အရေအတွက် တိုးလာနိုင်ကြောင်း ဒေသခံအချို့က ပြောသည်။
ဖားကန့်တွင် ယခုရက်ပိုင်း၌ စစ်ကောင်စီနှင့် KIA၊KPDF တိုက်ပွဲဖြစ်နေပြီး စစ်ကောင်စီက လေကြောင်းမှမကြာခဏဗုံးလာကြဲနေသည်။ လေကြောင်းအန္တရာယ်ကြောင့် ရှာဖွေကယ်ဆယ်ရေးကို အင်တိုက်အားတိုက်မလုပ်နိုင်သေးကြောင်း ဒေသခံများကပြောသည်။
