ဇူလိုင်-၂၇၊၂၀၂၅။လူအေး/People’s Spring
မန္တလေးတိုင်း၊ စဥ့်ကူးမြို့အနီးတွင် ရစ်ခ်တာစကေး ၄ဒဿမ၅ အဆင့်ငလျင်တစ်ခုလှုပ်ခတ်ခဲ့ပြီးဇွန်လနောက်ပိုင်းရစ်ခ်တာစကေး ၄ အထက်ငလျင်များမကြာခဏလှုပ်ရှားနေခြင်းမှာစစ်ကိုင်းငလျင်ကြီး၏ နောက် ဆက်တွဲငလျင်များဖြစ်ကြောင်း ဘူမိဗေဒပညာရှင်များက ပြောသည်။
စဥ့်ကူးမြို့အနီးတွင် ယနေ့ (ဇူလိုင် ၂၇ရက်) နံနက် ၁၁ နာရီ ၄၅မိနစ်က လှုပ်ခတ်ခဲ့သည်။
မြေအနက် ၁၀ကီလိုမီတာ( ၆မိုင်ခန့်) ၌ လှုပ်ရှားသွားခြင်းဖြစ်ပြီး စစ်ကိုင်းငလျင်ကြီး၏နောက်ဆက်တွဲငလျင်များကြောင့်ထိခိုက်ဆုံးရှုံးမှုများ လျော့ နည်းစေရန်အတွက် သတိပြုနေထိုင်ကြရန် အမျိုးသားညီညွတ်ရေးအစိုး ရ၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)က ထုတ်ပြန်သည်။
Public Service Announcement
မတ်လ ၂၈ရက်က မန္တလေးနှင့် စစ်ကိုင်းမြို့ကို ဗဟိုပြု၍ လှုပ်ခတ်ခဲ့သော ရစ်ခ်တာစကေး ၇ဒဿမ၇ အဆင့် အင်အားအလွန်ပြင်းထန်သော ငလျင်ကြောင့် ရစ်ခ်တာစကေး ၃မှ ၅ဝန်းကျင် နောက်ဆက်တွဲငလျင်များသည် ၂နှစ်ခန်ကြာသည့်အထိ လှုပ်နေမည်ဖြစ်ကြောင်း ရန်ကုန်မြို့မှဘူမိဗေဒပညာရှင်တစ်ဦးက ပြောသည်။
ငလျင်ပညာရှင်ဒေါက်တာမျိုးသန့်ကလည်း မတ်လ ၂၈ရက်က အင်အားပြင်းငလျင်၏ နောက်ဆက်တွဲများ ဆက်လက်လှုပ်ခတ်နေမည်ကို သိရှိနားလည်ထားရန်လိုအပ်ကြောင်းနှင့် စိုးရိမ်မှုမလွန်ကဲရန် အကြံပြုတိုက် တွန်းသည်။
“နောက်ဆက်တွဲတွေက လှုပ်နေမှာပါပဲ။ စဉ့်ကူး မြောက်ဘက်ကနေ ဖြူးနားလောက်အထိကပြင်းအား ၅ ကျော်ကျော်လောက်ကနေ အောက်ပေါ့။နှစ်နဲ့ချီကြာနိုင်ပါတယ်”ဟု ဒေါက်တာမျိုးသန့်က ပြောသည်။
မတ်လ ၂၈ရက်က ဖျက်အားပြင်းငလျင်သည် မန္တလေးတိုင်း၊ စဉ်းကူးမြို့မှ ပဲခူးတိုင်း၊ ဖြူးမြို့နယ်အထိ ၃၄၂ မိုင်အရှည် မြေလွှာအက်ကြောင်းဖြစ်ခဲ့ပြီး မှတ်တမ်းတင်နိုင်သမျှ မြေပြင် အက်ကြောင်းများအနက် အရှည်ဆုံးဟု အမေရိကန် အာကာသအေဂျင်စီ (NASA) က ထုတ်ပြန်ထားသည်။
ပြတ်ရွေ့ကြောတလျှောက် ၃ မီတာ(၁၀ ပေ ကျော်)မြေရွဲ့စောင်းသွားပြီး တအချို့နေရာများ၌ ၆ မီတာကျော်အထိ မြေရွဲ့စောင်းသွားခဲ့သည်။
ထို့ကြောင့်ထိုပြတ်ရွှေ့လမ်းကြောင်းတလျောက်ကမြို့နယ်များ၌ နောက် ဆက် တွဲငလျင်များ ဆက်လှုပ်နေမည်ဟု ပညာရှင်များက ပြောဆိုထားသည်။
ဇွန်လဆန်းပိုင်းက ရစ်ခ်တာစကေး၄မှ၅ကြားငလျင်အချို့သည် ပဲခူးတိုင်း၊ရှမ်းပြည်နယ်တောင်ပိုင်း၊ ကချင်ပြည်နယ်နှင့် မန္တလေးတိုင်းအတွင်း မကြာခဏ လှုပ်ခတ်ခဲ့ပြီး လလယ်ပိုင်းတွင် ငြိမ်သက်နေရာမှ ဇွန်လကုန်ပိုင်းမှစ၍ မကြာလဏ ထပ်မံလှုပ်နေသည်။
မတ်လ ၂၈ရက်က ငလျင်ကြောင့် ထိခိုက်ပျက်စီးမှုများကို လုံလောက်သော ပြန်လည်ထူထောင်ရေးလုပ်နိုင်ခြင်းမရှိသေးသလို သေဆုံးသူများကိုပင် အပြီးသတ်ရှာဖွေနိုင်ခြင်းမရှိသေးပေ။
စစ်ကိုင်းငလျင်ကြီး၏ နောက်ဆက်တွဲငလျင်ငယ်များ ဆက်လက်လှုပ်ခတ်နိုင်သည့်အတွက် ငလျင်ဘေးဆောင်ရန်၊ ရှောင်ရန်၊ သတိပြုရန်များနှင့်အညီ နေထိုင်ကြပါရန် သတိပေးချက်များရှိနေသည်။
