ကန့်ဘလူမြို့နယ်ရှိ ဆေးရုံ စစ်ကောင်စီဗုံးကြဲတိုက်ခိုက်၍ လူနာနှင့်လူနာစောင့် ၅ဦးသေဆုံး

ဇူလိုင်-၃၀၊၂၀၂၅။လူအေး/People’s Spring

စစ်ကိုင်းတိုင်း၊ကန့်ဘလူမြို့နယ်တွင်အမျ်ိုးသားညီညွတ်ရေးအစိုးရ(NUG) ထိန်းချုပ်ထားသည့် ကျေးရွာရှိ ဆေးရုံကို စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့၍ လူနာနှင့်လူနာစောင့်အပါအဝင် ငါးဦးသေဆုံးပြီး တစ်ဦးဒဏ်ရာအပြင်းအထန်ရရှိခဲ့သည်။

” ကျမတို့ ကိုယ့်အားကိုယ်ကိုးပြီးဖွင့်ထားတဲ့ ဆေးရုံပါ။ ဆေးရုံတည့်တည့်ကို ဗုံးနှစ်လုံးကြဲသွားတာပါ”ဟုကျန်းမာရေးဝန်ထမ်းတစ်ဦးကပြောသည်။

ဇူလိုင် ၂၉ရက်ည ၁၁နာရီခန့်က ဗုံးကြဲသွားခြင်းဖြစ်ပြီး ကနဦးရရှိထားသည့်သတင်းများအရ လူနာစောင့်တစ်ဦးနှင့် လူနာလေးဦးသေဆုံးပြီး တစ်ဦးသည် ဒဏ်ရာပြင်းထန်ကြောင်း သိရသည်။

Public Service Announcement

စစ်ကောင်စီသည် ယမန်နေ့ ဇူလိုင်၂၉ရက် နံနက်ပိုင်းကလည်း တအာင်းတပ်မတော် (TNLA)ထိန်းချုပ်ထားသည့် မိုးကုတ်မြို့ကို လေကြောင်းမှဗုံးကြဲတိုက်ခိုက်ခဲ့၍ အရပ်သားလေးဦးသေဆုံးပြီး ကိုးဦး ဒဏ်ရာရခဲ့သည်။

ထို့အပြင်ဇူလိုင်၂၉ရက်ညနက်ပိုင်းတွင်စဉ့်ကူးမြို့နယ်၊လက်ပန်လှကျေး ရွာရှိရဲစခန်းနှင့် ရွှေပန်တောကျေးရွာတို့အားလေကြောင်းမှ‌ ဗုံးကြဲရာ ရဲစခန်းအချုပ်ခန်းမှပြစ်ဒဏ်ကျ အကျဉ်းသားများအပါအဝင် စစ်ဆေးနေဆဲ သံသယတရားခံ အမျိုးသား၂၁ဦး၊ အမျိုးသမီးတစ်ဦး သေဆုံးပြီး၃၀ဦးခန့်ဒဏ်ရာရခဲ့သည်ဟု ပြည်သူ့ကာကွယ်ရေးတပ်မတော် (မန္တလေး)က သတင်းထုတ်ပြန်သည်။

ထို့အပြင် ရှမ်းပြည်နယ်မြောက်ပိုင်း ကွတ်ခိုင်မြို့ကိုလည်း ယနေ့(ဇူလိုင် ၃၀ရက်) နံနက် အစောပိုင်းတွင် လေကြောင်းမှ ဗုံးကြဲ၍ အရပ်သား ခြောက်ဦးသေဆုံးပြီး ခုနစ်ဦး ဒဏ်ရာရရှိခဲ့သည်။

စစ်ကောင်စီ​၏ လေကြောင်းတိုက်ခိုက်မှုကြောင့် နှစ်ရက်အတွင်း သေဆုံးသူအရပ်သား ၃၈ဦးနှင့် ဒဏ်ရာရသူ ၄၇ဦးထက်မနည်းရှိခဲ့သည်။