စစ်​ကောင်စီက ၆၃ မြို့နယ်ကို စစ်အုပ်ချုပ်ရေး သုံးလကြေညာပြန်

ဇူလိုင်-၃၁ရက်။၂၀၂၅၊​နေ့သစ်/People’s Spring

စစ်ကောင်စီကိုဖျက်သိမ်းပြီး ယာယီသမ္မတအဖြစ်တာဝန်ယူထားတဲ့ အာဏာသိမ်းခေါင်းဆောင်မင်းအောင်လှိုင်က ​တော်လှန်​ရေးတပ်​တွေထိန်းချုပ်ထားတဲ့မြို့နယ်​တွေနဲ့ တိုက်ပွဲ​တွေဖြစ်ပွား​နေတဲ့ မြို့နယ်​တွေထဲက ၆၃ မြို့နယ်မှာစစ်အုပ်ချုပ်ရေးအမိန့် သုံးလကြေညာပြန်ပါတယ်။

စစ်ကောင်စီက​နေ နိုင်ငံတော်လုံခြုံရေးနဲ့ အေးချမ်းသာယာရေးကော်မရှင် (နလအ)ဆိုတဲ့အမည်နဲ့ ဒီနေ့မှပြောင်းလိုက်ပြီး ယာယီသမ္မတ လို့ ကိုယ်တိုင်ရာထူး ယူထားတဲ့အာဏာသိမ်း​ခေါင်း​ဆောင်က ၆၃မြို့နယ်ကို စစ်အုပ်ချုပ်​ရေး​ကြေညာရာမှာလက်နက်ကိုင်အကြမ်းဖက်သောင်းကျန်းမှုချုပ်ငြိမ်းစေရန် ရည်ရွယ်တယ်လို့ဆိုပါတယ်။

ကချင်ပြည်နယ်က ၅ မြို့နယ် ၊ကယားပြည်နယ် က ၃ မြို့နယ် ၊ကရင်ပြည်နယ်က ၂ မြို့နယ် ၊ချင်းပြည်နယ်က ၇ မြို့နယ် ၊စစ်ကိုင်းတိုင်းက ၉ မြို့နယ် ၊မ​ကွေးတိုင်းက ၅ မြို့နယ် ၊မန္တ​လေးတိုင်းက ၃ မြို့နယ် ၊ရခိုင်ပြည်နယ်က ၁၄ မြို့နယ် ၊ ရှမ်းပြည်နယ်က ၁၅ မြို့နယ် တို့ကို စစ်အုပ်ချုပ်​ရေး​ကြေညာတယ်လို့ စစ်​ကောင်စီက​ကြေညာတာပါ။ဒီစာရင်းမှာတိုက်ပွဲ​တွေပြင်းထန်​နေပြီး​တော်လှန်​ရေးတပ်​တွေက ​ဒေသအများစုစိုးမိုးထားတဲ့ဗန်း​မော်မြို့နယ် ၊မတ္တရာ မြို့နယ်၊ဖားပွန်မြို့နယ်၊ဒီး​မော့ဆိုမြို့နယ်စတဲ့​ဒေသ​တွေမပါဝင်ပါဘူး။

Public Service Announcement

အလားတူတိုက်ပွဲ​တွေ ပြင်းထန်​နေတဲ့​ကျောက်ဖြူမြို့နယ် ၊​လေမျက်နှာမြို့နယ်​တွေကိုလည်းချန်လှပ်ထားတာ​တွေ့ရပါတယ် ။

“ရွေးကောက်ပွဲကျင်းပဖို့အတွက် သူရှုံးထားတဲ့ မြို့တွေ၊နယ်မြေတွေ ပြန်ပြီးသိမ်းဖို့လိုအပ်တဲ့အခြေအနေမှာ သူက စစ်အုပ်ချုပ်ရေးကြေညာပြီးတော့ စစ်ဆင်ရေးတွေ လုပ်မယ်ဆိုတာမျိုးကို ပြည်သူတွေကို တပ်လှန့်လိုက်တာပေါ့ဗျာ။ ဆိုလိုတာက စစ်အုပ်ချုပ်ရေး ကြေညာပြီဆိုတော့ သူပြောနေတဲ့ လုံခြုံရေးနဲ့ အေးချမ်းသာယာရေးအစိုးရဆိုတဲ့ အဓိပ္ပါယ်ကတော့ ပျောက်သွားပြီဗျ။ သူတို့က ဒီသုံးလအတွင်းမှာ စစ်အုပ်ချုပ်ရေးလုပ်တော့မယ်ဆိုတာ သူတို့စစ်အုပ်ချုပ်ရေးလုပ်နေတဲ့ ဒေသတွေမှာ စစ်ရေးအရနှိပ်ကွက်မှုတွေ၊စစ်ရေးအရဖိနှ်ပ်မှုတွေ၊စစ်ရေးအရထိုးစစ်ဆင်မှုတွေအဆက်မပြတ်လုပ်မယ်ဆိုတာကို ကြေညာလိုက်တယ်လို့တော့ ကျနော်က ယူဆပါတယ်”လို့ စစ်ရေး၊နိုင်ငံရေးလေ့လာသုံးသပ်သူ ဦးသန်းစိုးနိုင်ကပြောပါတယ်။

လက်ရှိ စစ်ခေါင်းဆောင်သွားနေတဲ့ ခြေလှမ်းက ၁၉၇၄ခုနှစ်က ဗိုလ်ချုပ်ကြီးနေဝင်းလုပ်ခဲ့တဲ့ ပုံစံအတိုင်း လုပ်နေတာလို့ ဦးသန်းစိုးနိုင်က သုံးသပ်ပါတယ်။

“သူတို့အဖေဗိုလ်ချုပ်ကြီးနေဝင်းလုပ်ခဲ့တဲ့အတိုင်းပါပဲ။ညာဘက်ကအာဏာကိုဘယ်ဘက်ကို ပြောင်းပေးလိုက်တာပါ။ သူတို့ ဗိုလ်ချုပ်ကြီးနေဝင်းကနေ ဦးနေဝင်းကို လွှဲပြောင်းပေးလိုက်တာပါပဲ။ အခုလည်း ဗိုလ်ချုပ်မှူးကြီးမင်းအောင်လှိုင်ကနေပြီးတော့ ယာယီသမ္မတကြီးဦးမင်းအောင်လှိုင်ကို လွှဲပြောင်းပေးလိုက်တာပါပဲ”လို့ ၎င်းက ဆက်ပြောပါတယ်။

အဲဒီစစ်အုပ်ချုပ်ရေးဟာ ဒီကနေ့(ဇူလိုင် ၃၁ရက်)ကနေ ရက်ပေါင်း ၉၀အထိလို့ ဆိုပါတယ်။​ဥပဒေပုဒ်မ ၄၁၃၊ ပုဒ်မခွဲ (ခ) အရ စစ်အုပ်ချုပ်ရေးအမိန့်ထုတ်ပြန်ပြီး အရေးပေါ်ကြေညာထားတဲ့ မြို့နယ်တွေရဲ့ အုပ်ချုပ်ရေးနဲ့ တရားစီရင်ရေး တာဝန်တွေကို တပ်မတော်ကာကွယ်ရေးဦးစီးချုပ်အား အပ်နှင်းလိုက်တယ်လို့ ယာယီသမ္မတ လုပ်ပြန်တဲ့ အာဏာသိမ်း​ခေါင်းဆောင်မင်းထုတ်ပြန်တဲ့စာမှာပါရှိပါတယ်။

“နလအ” အဖွဲ့ကို အာဏာသိမ်းစစ်ခေါင်းဆောင်က ဥက္ကဋ္ဌ အဖြစ်တာဝန်ယူမှာဖြစ်ပြီး အဲဒီအဖွဲ့ ကိုလည်း သူ့ကိုယ်တိုင် လက်မှတ်ရေးထိုး ဖွဲ့စည်းလိုက်တာပါ။အဲဒီလို ပြောင်းလဲဖွဲ့စည်းပြီးနောက်မှာ ကြေညာချက်တွေ တစ်ခုပြီးတစ်ခု ဒီ​နေ့ တစ်​နေလုံးထုတ်နေတာဖြစ်ပါတယ်။

စကစ က​နေ နလအ လို့အမည်​ပြောင်းအဖွဲ့ထဲမှာ အာဏာသိမ်းခေါင်းဆောင်ရဲ့လူယုံ​တွေဖြစ်တဲ့ဒုတပ်ချုပ် ၊ ညှိကွပ် ၊ စစ်ဖက်ရေးရာလုံခြုံရေးအရာရှိချုပ် ၊ကာကွယ်ရေးဝန်ကြီး ၊ပြည်ထဲရေးဝန်ကြီး ၊နယ်စပ်ရေးရာဝန်ကြီးတွေ ပါဝင်ကြပါတယ်။

အဲဒီအဖွဲ့ဟာနိုင်ငံရဲ့ကာကွယ်ရေး ၊လုံခြုံရေး၊ အေးချမ်းသာယာရေး နဲ့ ရွေးကောက်ပွဲ ကျင်းပဖို့အတွက် လမ်းညွှန်မှာဖြစ်တယ်လို့ ဆိုပါတယ်။အာဏာသိမ်းစစ်ခေါင်းဆောင်ဟာ နိုင်ငံတော်ဝန်ကြီးချုပ်ဆိုတဲ့ ရာထူးကိုတော့ သူရဲ့ လက်ရုံးတစ်ဦးဖြစ်တဲ့ ဗိုလ်ချုပ်ကြီးညိုစောဆီ လက်လွှဲပေးလိုက်ပါတယ်။

စစ်​ကောင်စီ စစ်အုပ်ချုပ်​ရေး​ကြေညာတဲ့ မြို့​တွေထဲမှာ တရုတ်အစိုးရရဲ့ကြားဝင်စွက်ဖက်မှု​ကြောင့်အပစ်ရပ်ထားတဲ့ MNDAA သိမ်းပိုက်ထားတဲ့​​လောက်ကိုင် ၊ကွမ်လုံ ၊သိန္နီ ၊ကုန်းကြမ်းစတဲ့မြို့နယ်​တွေပါဝင်တာကိုလည်း​တွေ့ရပါတယ်။

“ရန်သူကတော့ ရန်သူပီသတယ်။ ရှုံးခါနီးပြီဆိုတော့ဒီကောင်ကရှုံးမဲမဲမယ်။မဟုတ်တဲ့နေရာတွေကော အလကားသက်သက် ယုတ်မာရက်စက်နေတာကတော့ ကျွန်တော်တို့ ပြောမှရယ် မဟုတ်ဘူး။ တိုင်းသိပြည်သိဖြစ်နေတာဆိုတော့ သူနဲ့ ပြောမယ်ဆိုရင်ဗျာ။ ခွေးရူးနဲ့ခွေးကောင်း ဖက်မကိုက်တော့ပါဘူး”လို့ ရွှေဘိုခရိုင် အမှတ်(၁၅)တပ်ရင်းက ဗိုလ်ကောက်ရိုးက ပြောပါတယ်။