သြဂုတ်-၁၊၂၀၂၅ ။ရဲခေါင်/People’s Spring
စစ်ကိုင်းတိုင်း၊ကလေးခရိုင်အတွင်း စစ်ကောင်စီက အင်ဂျင်တပ်ပါရာမော်တာများဖြင့် စတင် အသုံးပြုလာကြောင်း ကဘော်အထူးဒရုန်းတပ်ဖွဲ့တာဝန်ရှိသူက လူထုနွေဦးသို့ ပြောသည်။
ယမန်နေ့(ဇူလိုင် ၃၁ရက်)တွင် စက်တပ်လေထီးနှစ်စီးသည် ဒေသကွပ်ကဲမှုစစ်ဌာနချုပ် (ကလေး)မှတဆင့် ကလေးမြို့နယ်တောင်ပိုင်း၌ အသုံးပြုခဲ့ပြီး ဗုံးမကြဲခဲ့သော်လည်း ကင်းထောက်ပျံသန်းခြင်းဟု ဆိုသည်။
” စစ်တပ်လေထီးက ကလေးနယ်ကို ရောက်နေတာ ၃လပိုင်းလောက်ကတည်းက သတင်းရပြီးသားပါ။ အခုက ပထမဆုံးအကြိမ် ထုတ်သုံးလာတာ ဖြစ်ပါတယ်။ကလေးတောင်ပိုင်းမှာ”ဟု အထက်ပါတာဝန်ရှိသူက ပြောသည်။
Public Service Announcement
ကလေးမြို့နယ်တောင်ပိုင်းနှင့် ကလေး – ဂန့်ဂေါလမ်းပိုင်းရှိ စစ်ကောင်စီတပ် အခြေစိုက်စခန်းများဖြစ်သည့် ကမ်းပါးနီစခန်း၊ မှန်တော၊ အောင်သာယာ(အရှေ့၊အနောက်) ၊ ပျူစောထီးစိုးမိုးသော ကြံသာကျေးရွာတို့ကို ယခုနှစ်ဆန်းပိုင်းတွင် တော်လှန်ရေးတပ်များက သိမ်းပိုက်ထားခဲ့သည်။
ပြည်သူများအနေဖြင့် စက်တပ်လေထီးကို စူးစမ်း ခြင်းမပြုဘဲ အစုလိုက်နေထိုင်ခြင်းကိုလည်း ရှောင်ရှားရန်လည်း သတိပေးသည်။
“အမှတ်(၁)စစ်ဒေသ၊ ကလေးခရိုင်အတွင်း အင် ဂျင်တပ်ပါရာမော်တာ ၂စီးရောက်ရှိစတင်အသုံးပြုလာပါတယ်။ မိဘပြည်သူများအနေဖြင့် မမြင်ဖူး ၍ဆိုပြီး လမ်းပေါ်ထွက်ကြည့်ခြင်း မျိုး အစုလိုက် ထွက်ကြည့်ခြင်းများကိုရှောင်ရှားကြပါလို့အထူးမေတ္တာရပ်ခံအပ်ပါတယ်”ဟု ကဘော်အထူးဒရုန်းတပ်ဖွဲ့က သီးခြားထုတ်ပြန်ထားသည်။
စစ်ကောင်စီသည် ၎င်း၏ အခြေစိုက်စခန်းများ ပတ်ဝန်းကျင်ကိုလည်း ကင်းထောက်ခြင်းနှင့် စစ်ရေးအသုံးစရိတ်အရသက်သာခြင်းတို့ကြောင့် စက်တပ်လေထီးများကို ၂၀၂၅နှစ်ဆန်းကစ၍ ပိုမိုအသုံးပြုလာသည်။
စက်တပ်လေထီးသည် ပျံသန်းချိန်တွင် မီး စက်ကဲ့သို့ ဆူညံသည့်အသံကြားရကာ ပျံသန်းနှုန်းနှေးကွေးပြီး ပွိုင့်ဖိုက်၊ ငါးကြင်းမြီး(ခ)MG 3 ကဲ့သို့ လက်နက်များဖြင့် ပစ်ချနိုင်ကြောင်း စစ် လက်နက်ပစ္စည်းလေ့လာသူများက အသိပေးထားသည်။
စစ်ကောင်စီ၏ စက်တပ်လေထီးတစ်စီးကို ပခုက္ကူ PDFနှင့် Burma Revolution Rangers ( BRR )ရဲဘော်များက ယခုနှစ် ဧပြီ ၂၃ရက်က ပစ်ချ ဖျက်ဆီးနိုင်ခဲ့သည်။
