သြဂုတ်-၂၊၂၀၂၅။ဇေအောင်၊လူအေး/People’s Spring
မန္တလေးတိုင်း၊မိုးကုတ်မြို့ကိုစစ်တပ်ကဒီမနက် လေကြောင်းကနေ ထပ်မံဗုံးကြဲခဲ့တာကြောင့်လူထိခိုက်မှုတွေ ရှိနေပါတယ်။
သြဂုတ် ၂ ရက်မနက်၈ နာရီ၂၂မိနစ်ခန့်ကမိုးကုတ်မြို့အနောက်ပိုင်းက လူနေရပ်ကွက်ကို စစ်တပ်က လေကြောင်းကနေဗုံးကြဲတိုက်ခိုက်ခဲ့တာပါ။ ဒေသအခေါ် မိုးကုတ်အနောက်ပိုင်း၊ ဂေါင်းဦးဘာထိပ်၊ ရွှေမောင်းအရက်ဆိုင်အနီး ဗုံးကျပြီး လူထိခိုက်မှုရှိတယ်လို့ ဒေသခံတွေက ပြောပါတယ်။
“လူထိတယ်။ လမ်းမှာသွားနေတဲ့ကားတစ်စီးမှာ အသေအပျောက်ရှိတယ်”လို့ ဒေသခံတဦးက ပြောပါတယ်။
Public Service Announcement
မိုးကုတ်မြို့ကို ဒီမနက် စစ်ကောင်စီ လေကြောင်းကနေ ဗုံးကြဲတိုက်ခိုက်ခဲ့ပြီးနောက် တွေ့ရစဥ်။ ဓာတ်ပုံ-CJ မိုးကုတ်မြို့ကို ဒီမနက် စစ်ကောင်စီ လေကြောင်းကနေ ဗုံးကြဲတိုက်ခိုက်ခဲ့ပြီးနောက် တွေ့ရစဥ်။ ဓာတ်ပုံ-CJ မိုးကုတ်မြို့ကို ဒီမနက် စစ်ကောင်စီ လေကြောင်းကနေ ဗုံးကြဲတိုက်ခိုက်ခဲ့ပြီးနောက် တွေ့ရစဥ်။ ဓာတ်ပုံ-CJ မိုးကုတ်မြို့ကို ဒီမနက် စစ်ကောင်စီ လေကြောင်းကနေ ဗုံးကြဲတိုက်ခိုက်ခဲ့ပြီးနောက် တွေ့ရစဥ်။ ဓာတ်ပုံ-CJ
အခြားဒေသခံတဦးကလည်း “ကားကို ထိသွားတာပါ။ ၇ဦး သေဆုံးတယ်လို့ ကြားတယ်။ သွားကြည့်လို့က မရဘူး။ မိုးကလည်းသည်း၊ လေယာဉ်ကလည်း ထပ်ဝဲနေလို့”လို့ပြောပါတယ်။
လူသေဆုံးထိခိုက်မှုနဲ့ နေအိမ် ၊အဆောက်အအုံပျက်စီးမှုကို People’s Spring က သီးခြားအတည်မပြုနိုင်သေးပါဘူး ။ဒါပေမယ့် ဒေသခံတွေ တင်ထားတဲ့သတင်းဓါတ်ပုံတွေမှာ နေအိမ်အချို့ပျက်စီးတာကိုတွေ့ရပါတယ်။
“ညကတစ်ညလုံးလေကြောင်းကနေဝဲနေလို့ သတိထားနေကြတဲ့ ကြားကနေ အခုမနက် ဗုံးကြဲတာပါ”လို့ ဒေသခံအမျိုးသမီးတဦးကပြောပါတယ်။
စစ်ကောင်စီမိုးကုတ်မြို့ကိုပြီးခဲ့တဲ့ဇူလိုင် ၂၉ ရက်ကလည်း လေကြောင်းကနေ ဗုံးကြဲတိုက်ခိုက်လို့ ပြည်သူ ၆ ဦးသေဆုံးပြီး ၂ ဦးပျောက်ဆုံးကာ ၁၃ ဦး ထိခိုက်ဒဏ်ရာ ရရှိခဲ့ပါတယ်။
ဒီဖြစ်စဥ်တွေမတိုင်ခင်ကလည်းဇူလိုင်လအတွင်း စစ်တပ်ကမိုးကုတ်မြို့ကိုဗုံးလေးကြိမ်ကြဲခဲ့လို့ ကလေးငယ်၂ ဦးအပါအဝင်ပြည်သူ ၆ ဦးသေဆုံးပြီး ၂၅ဦးဒဏ်ရာရရှိခဲ့ကြောင်း TNLA ကထုတ်ပြန်ထားပါတယ်။
TNLA နဲ့ တော်လှန်ရေးတပ်တွေ သိမ်းပိုက်ထိန်းချုပ်ထားတဲ့ မိုးကုတ်မြို့ကို စစ်ကောင်စီက နောင်ချိုဘက်ကနေ စစ်ကြောင်းထိုးဖို့လည်း ကြိုးစားနေတယ်လို့လည်း စစ်ရေးသတင်းရင်းမြစ်အချို့ကပြောပါတယ် ။ TNLA ကလည်း မိုးရာသီ လမ်းတွေပြင်ဖို့အတွက် မိုးကုတ်နဲ့ ဆက်သွယ်ထားတဲ့လမ်းပိုင်းတွေကို ယာယီပိတ်ထားပါတယ် ။
TNLA ဦးဆောင်ပြီး မန္တလေး PDF ၊ မိုးကုတ်ဗျူဟာ အပါအဝင် တော်လှန်ရေးတပ်တွေက ၁၀၂၇ ဒုတိယပိုင်းမှာ မိုးကုတ်မြို့ကို သိမ်းပိုက်ထိန်းချုပ်ခဲ့တာဖြစ်ပါတယ်။
စစ်ကောင်စီဟာ၂၀၂၅ ခုနှစ် ဇွန်၊ ဇူလိုင်လအတွင်း နောင်ချို၊ ကျောက်မဲ၊ သီပေါ၊ ကွတ်ခိုင်၊ မိုင်းလုံ၊ မိုင်းငေါ့၊ မိုးကုတ် မြို့များရှိနေအိမ်၊ ဈေး၊ စာသင်ကျောင်း၊ ဟိုတယ်၊ တည်းခိုခန်း စတဲ့ပြည်သူလူထု နေထိုင်သွားလာလှုပ်ရှားရာ နေရာတွေကို ဦးတည်ပြီး တိုက်လေယာဉ်တွေ၊ လက်နက်ကြီးတွေနဲ့ အင်အားပြင်းဗုံးတွေသုံးပြီး နေ့စဉ်ရက်ဆက် ကြဲချနေတယ်လို့ TNLAက ထုတ်ပြန်ထားပါတယ်။ အဲဒီလိုစစ်ရာဇဝတ်မှုတွေ ကျူးလွန်တဲ့ လုပ်ရပ်ဆိုးတွေကို အမြန်ဆုံး ရပ်တန့်ပေးဖို့အတွက် ကူညီဆောင်ရွက်ပေးကြဖို့ ကုလသမဂ္ဂ၊ တရုတ်ပြည်သူ့သမ္မတနိုင်ငံအပါအဝင် နိုင်ငံတကာကို TNLAက တိုက်တွန်းထားပါတယ် ။
