ဩဂုတ်-၃၊၂၀၂၅။သတိုး/People’s Spring
ရန်ကုန်မြို့၊ဒဂုံမြို့သစ်တောင်ပိုင်းမြို့နယ်တွင် တရားမဝင်ရွေးကောက်ပွဲအတွက် လုပ်ဆောင်နေသော လူဝင်မှုကြီးကြပ်ရေးရုံး လုံခြုံရေးယူပေးနေသည့် စစ်ကောင်စီတပ်ဖွဲ့ဝင်များကို ပြင်းအားမြင့် လက်ပစ်ဗုံးများဖြင့် တိုက်ခိုက်ခဲ့ကြောင်း Yangon Army၏တာဝန်ရှိသူက ပြောသည်။
“ လဝကမှာက ရွေးကောက်ပွဲ ကိစ္စတွေလုပ်နေတာသတင်းရတယ်။နေ့လည်ပိုင်းလုပ်ချင်ပေမဲ့ကျနော်တို့လုံခြုံရေးအရ ညဘက်ကိုရွေးပြီး အစောင့်တွေကိုတီးတာ” ဟု ၎င်းက ပြောသည်။
ဩဂုတ် ၂ရက် ည ၁၀နာရီကျော်တွင် Yangon Armyနှင့် အနောက်ပိုင်းခရိုင်ပကဖတို့ပူးပေါင်းပြီး ပြင်းအားမြင့်လက်ပစ်ဗုံး သုံးလုံးဖြင့် တိုက်ခိုက်ခဲ့ခြင်းဖြစ်ကြောင်း သတင်းထုတ်ပြန်ထားသည်။
Public Service Announcement
အနောက်ပိုင်းခရိုင်ပကဖကလည်းယင်းတိုက်ခိုက်မှုအကြောင်းကို “ တရားမဝင်ရွေးကောက်ပွဲအား ဆန့်ကျင်ကြ” ဟု ရေးသား၍ ထုတ်ပြန်ထားသည်။
“ လုံခြုံရေးတွေရှိတယ်။ ထိဖို့များတယ်” ဟု ယင်းတိုက်ခိုက်မှုနှင့်ပတ်သက်၍ အထက်ပါတာဝန်ရှိသူက ဆိုသည်။
ဆက်လက်၍ စစ်ကောင်စီနှင့်ပတ်သက်သော ပစ်မှတ်များ အပါအဝင် တရားမဝင်ရွေးကောက်ပွဲအတွက် ပါဝင်လုပ်ဆောင်နေသူအားလုံးကို ပြင်းပြင်းထန်ထန်အရေးယူသွားမည်ဟု Yangon Army ကထုတ်ပြန်ထားသည်။
“ ကျနော်တို့ကိုပြည်သူတွေ သတင်းအမြဲပေးနေပါတယ်။ရတဲ့သတင်းအပေါ်မူတည်ပြီး ပစ်မှတ်တွေကိုတိုက်ခိုက်သွားမှာပါ။လူပုဂ္ဂိုလ်ပစ်မှတ်တွေလဲတိုက်ခိုက်မှာပါ။” ဟု တရားမဝင်ရွေးကောက်ပွဲအတွက် ပါဝင်ကူညီသူများကို တိုက်ခိုက်မည့်အကြောင်းကို အထက်ပါတာဝန်ရှိသူကပြောသည်။
Yangon Armyနှင့် အနောက်ပိုင်းခရိုင် ပကဖ တို့သည် ဇူလိုင်ကလည်း မြောက်ဥက္ကလာပမြို့နယ်ရှိ ပြည်ခိုင်ဖြိုးပါတီရုံးနှင့် မင်္ဂလာဒုံမြို့နယ်ရှိ လေကြောင်းအတက်သင်သင်တန်းကျောင်းတို့ကို တိုက်ခိုက်မှုများပြုလုပ်ခဲ့သည်။
