ဩဂုတ်-၁၁၊ ၂၀၂၅။ ထားမြတ်/People’s Spring
ကရင်အမျိုးသားအစည်းအရုံး(KNU) ဗဟိုဌာနချုပ်အနီးကို စစ်ကောင်စီက ဩဂုတ်၁၀ရက် ညပိုင်းတွင် Y12 လေယာဉ်ဖြင့် ဗုံးသီးချတိုက်ခိုက်ခဲ့ရာ ကျန်းမာရေးဝန်ထမ်းတဦး ဒဏ်ရာရခဲ့ပြီး အဆောက်အဦးအချို့ ထိခိုက်ပျက်စီးခဲ့ကြောင်း KNU သတင်းရင်းမြစ်က ပြောသည်။
ဩဂုတ် ၁၀ရက် ညပိုင်းက စစ်ကောင်စီ လေယာဉ်ဖြင့် ဗုံးသီးအလုံး ၂၀ခန့် ကြဲချတိုက်ခိုက်ခဲ့ခြင်းဖြစ်သည်။
“ကလို့ယော်ယေး အဲဒီတ၀ိုက်မှာပဲ။ ရန်သူဆိုတော့ရန်သူအလုပ်လုပ်မှာပေါ့။ ကိုယ့်ကိုယ်ရန်သူလို့သဘောထားတယ်ဆိုတော့သူတိုက်ချင်သူတိုက်မှာပဲ။ကျနော်တို့လည်းပဲသူ့ကိုအဲဒီလိုမျိုးပဲတိုက်မှာပဲ” ဟု KNU သတင်းရင်းမြစ်က ပြောသည်။
Public Service Announcement
ဩဂုတ် ၁၂ရက်တွင် ကျရောက်မည့် ကရင့်အာဇာနည်နေ့ မတိုင်မီတွင် စစ်ကောင်စီက လေကြောင်း တိုက်ခိုက်လာခြင်းလည်းဖြစ်သည်။
စစ်ကောင်စီသည်ယခင်ကလည်း KNU ဌာနချုပ်အခြေစိုက်ရာ တပ်မဟာ( ၇)နယ်မြေကို အသေခံဒရုန်းများဖြင့် အကြိမ်ကြိမ် တိုက်ခိုက်ခဲ့ဖူးသော် လည်း လေကြောင်း တိုက်ခိုက်မှုမှာ ယခု နှစ်ပိုင်းအတွင်း ပထမဆုံးဖြစ်သည်။
“တခြားတော့ ဘာမှ မပြောလိုပါဘူး။ ဒီအာဏာရှင်က ကိုယ်က သူ့ကို ရန်သူလိုထင်တယ် သူကလည်း ကိုယ့်ကိုယ် ရန်သူလို့ထင်မှာပဲ။ သူလုပ်စရာရှိ သူလုပ်မှာပဲ။ ကျနော်တို့လည်း သူ့ကို လုပ်မှာပဲ။ ကျနော်တို့က စစ်ရေးနဲ့ တိုက်မယ်။ နိုင်ငံရေးနဲ့လည်းတိုက်မယ်။သံတမန်ရေးနဲ့လည်း တိုက်မယ်။နောက် လူထု လှုပ်ရှားမှုနဲ့ လည်း တိုက်မှာပဲ တပြည်လုံးအတိုင်းအတာနဲ့ပေါ့။ ဆက်လုပ်ရမယ့်အလုပ်ကျနော်တို့ လုပ်မှာပဲ” ဟု KNU သတင်းရင်းမြစ်က ပြောသည်။
လက်ရှိတွင် မြ၀တီမြို့နယ် မြန်မာ-ထိုင်းနယ်စပ်ရှိ လက်ကျန် စစ်ကောင်စီတပ်စခန်း ဝေါ်လေဗျူဟာနှင့် ထိသဲလယ် ကာကင်းစခန်းကို KNU ပူးပေါင်းတပ်က ၀ိုင်းပတ်ပိတ်ဆို့ တိုက်ခိုက်လျက်ရှိသည်။ ဝေါ်လေဗျူဟာ သိမ်းပိုက်နိုင်ရေး ဆောင်ရွက်ရာတွင် တော်လှန်ရေး ရဲဘော်များ အထိအခိုက်နည်းစေမည့် နည်းဗျူဟာကို အသုံးပြုတိုက်ခိုက်နေခြင်းဖြစ်ကြောင်းလည်း ပြောသည်။
