ဒီပဲယင်း၊မူးကမ်းကြီးရွာဘုန်းကြီးကျောင်းဗုံးကြဲခံရသံဃာတစ်ပါးအပါအဝင် ၇ ဦးသေဆုံး

သြဂုတ်၁၈၊၂၀၂၅။​​နေ့သစ်/People’s Spring

စစ်ကိုင်းတိုင်း၊ ဒီပဲယင်းမြို့နယ်၊ မူးကမ်းကြီးကျေးရွာရှိ ဘုန်းကြီးကျောင်းကိုစစ်တပ်က ဒီက​နေ့လေကြောင်းတိုက်ခိုက်ခဲ့လို့ သံဃာတော်တစ်ပါး အပါအဝင် ၇ ဦး သေဆုံးခဲ့ကြောင်းဒေသခံတွေကပြောပါတယ်။

သြဂုတ် ၁၈ ရက် နေ့လယ် ၁ နာရီခွဲခန့်က ဒီပဲယင်းမြို့နယ်၊မူးကမ်းကြီးကျေးရွာ၊မိုးကောင်းဘုန်းကြီးကျောင်းက ဓမ္မာရုံကို စစ်တပ်က တိုက်ပွဲဖြစ်ပွားခြင်းမရှိဘဲ လေကြောင်းကနေ ပေါင် ၅၀၀ ဗုံး ကြဲချတိုက်ခိုက်ခဲ့ရာ သံဃာတော်တစ်ပါး၊ ကပ္ပိယနှစ်ဦးနဲ့ အခြား ပြည်သူ ၄ ဦး သေဆုံးခဲ့ရကြောင်း ဒေသခံများက ပြောပါတယ်။ ​နေရာတင်ပွဲချင်းပြီး ၅ ဦး​သေဆုံးခဲ့ပြီး ၂ ဦးက​ဆေးရုံပို့​ဆောင်စဥ်​သေဆုံးတာလို့သိရပါတယ် ။ ​”ဒဏ်ရာရနဲ့ ပြင်းထန်ထိခိုက်ဒဏ်ရာရသူတွေလည်းရှိတယ်”လို့ ဒေသခံတဦးက ပြောပါတယ်။

ဒဏ်ရာရသူ ၁၀ ဦးထက်မနည်း ရှိပြီး အမြန်ဆုံး ကူညီပေးနေတယ်လို့ S&C မီး​ဘေးစစ်ဘေးပညာရေး ကူညီစောင့်ရှောက်ရေးအဖွဲ့က အသိပေးပါတယ်။

Public Service Announcement

“ဒဏ်ရာရသူ ၁၃ဦး လောက်ရှိတယ်”လို့ ဒေသခံတဦး ကပြောပါတယ်။ ဒဏ်ရာပြင်းထန်သူ​တွေလည်းရှိတာ​ကြောင့် ​သေဆုံးသူထပ်တိုးလာနိုင်​သေးတယ်လို့​ဒေသခံအချို့က​ပြောပါတယ်။သေဆုံးသူတွေရဲ့ အသေးစိတ်အချက်အလက်တွေတော့မသိရသေးပါဘူး။

” မြေပြင်မှာတိုက်ပွဲမရှိဘဲနဲ့ကြဲတာ။ Air Strike ဆိုတော့ ထိခိုက်သွားတယ်။ အရပ်သားပစ်မှတ်ကိုပစ်သွားတာ။ ခရိုင်ပကဖရဲ့အစီအစဉ်နဲ့ လေကြောင်းအန္တရာယ်သတိပေးထားတာတွေက အမြဲလုပ်နေတာပါ”လို့ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့ဝင်တစ်ဦးကပြောပါတယ်။

တစ်​နေတည်းမှာပဲ သြဂုတ် ၁၈ ရက် မနက်ပိုင်းကလည်း စစ်ကိုင်းတိုင်းဝက်လက်မြို့နယ် အရှေ့တောင်ခြမ်း၊ နပဲပင်လှကျေးရွာ ဘုန်းကြီးကျောင်းကို စစ်ကောင်စီက လေကြောင်းက​နေဗုံးကြဲခဲ့​ကြောင့် သံဃာ ၁ပါးနဲ့ ပြည်သူ ၂ဦး ထိခိုက်ခဲ့ပါသေးတယ်။ စစ်တပ်က ဒီရက်ပိုင်းနိုင်ငံတစ်​ဝန်းမှာ အရပ်သားပစ်မှတ်​တွေကို ဦးတည်ပြီး ဗုံးဆက်တိုက်ကြဲတာ​ကြောင့် ပြည်သူ​သေဆုံးမှု ​နေ့စဥ်အများအပြားရှိ​နေပါတယ် ။

ပြီးခဲ့တဲ့ မေလကလည်း ဒီပဲယင်းမြို့နယ်၊အိုးတိမ်းတွင်းကျေးရွာ စာသင် ကျောင်းကို လေကြောင်းတိုက်ခိုက်ခဲ့တာမို့ ကလေးနဲ့ ဆရာ တွေအပါအဝင် ၂၄ ဦး သေဆုံးခဲ့ပါတယ်။