သြဂုတ်-၁၉၊၂၀၂၅။ဇေအောင်/People’s Spring
စစ်ကိုင်းတိုင်း၊ဆားလင်းကြီးမြို့နယ်၊ဝမ်ပေါင်ကုမ္ပဏီအနီးက မိုးကြိုးပြင်တောင်ရွာကို စစ်တပ်က လေကြောင်းတိုက်ခိုက်လို့ ပြည်သူတစ်ဦးသေဆုံးပြီး နှစ်ဦး ဒဏ်ရာရခဲ့ပါတယ်။
သြဂုတ် ၁၈ ရက်၊မွန်းလွဲ၂ နာရီခန့်ကမုံရွာမြို့၊ အနောက်မြောက်တိုင်းစစ်ဌာနချုပ်(နမခ)က တက်လာတဲ့ ပါရာမော်တာ စက်တပ်လေထီးတစ်စီးဟာ ဆားလင်းကြီးမြို့နယ်၊ ဝမ်ပေါင်ကုမ္ပဏီအနီးရှိ မိုးကြိုးပြင်တောင်ရွာကို လေကြောင်းတိုက်ခိုက်ခဲ့တာလို့ဒေသခံအချို့ကပြောပါတယ်။
လေကြောင်းတိုက်ခိုက်မှုကြောင့် နေအိမ်တအိမ်အတွင်းမှာရှိနေတဲ့ အသက်(၆၀) ဝန်းကျင် အမျိုးသမီးတစ်ဦး သေဆုံးပြီး အမျိုးသား၁ဦး စိုးရိမ်ရဒဏ်ရာနဲ့ အခြားအမျိုးသမီးတစ်ဦး ထိခိုက်ဒဏ်ရာများ ရရှိခဲ့ကြောင်း ချင်းတွင်းမြစ်ကမ်းဘေးကျေးရွာများသပိတ်ကော်မတီရဲ့ တာဝန်ရှိသူက ပြောပါတယ်။
Public Service Announcement
“၁၆ရက်နေ့က ကာကွယ်ရေးတပ်ဖွဲ့တွေနဲ့ ဝမ်ပေါင်ကုမ္ပဏီစောင့်စကစတွေ အပြန်အလှန်လက်နက်ကြီးပစ်ခက်မှုတွေတော့ရှိတယ်။အဲ့ဒီအရှိန်ကြောင့် ပါရာမော်တာနဲ့လာချတာနေမှာ”လို့ အထက်ပါတာဝန်ရှိသူက ပြောပါတယ်။
သြဂုတ် ၁၆ ရက်ကလည်း ဝမ်ပေါင်ကုမ္မဏီက ကင်းစောင့်စစ်သားတွေ ပစ်ခက်လို့ ကျောက်ဖြူတိုင်ရွာမှ တောင်ယာလုပ်ကိုင်နေတဲ့ အမျိုးသမီးတစ်ဦးလည်းသေဆုံးခဲ့ပါသေးတယ်။
အဆိုပါပစ်ခတ်မှုတွေကြောင့် ဝမ်ပေါင်ကုမ္မဏီ အနီးဝန်းကျင်ကကျေးရွာတွေ စစ်တပ်ရန်ကြောင့် တိမ်းရှောင်နေရကြောင်း ဒေသခံများက ပြောပါတယ်။
စစ်ကောင်စီဟာ ၎င်းတို့ကိုအသက်ဆက်ပေးနေတဲ့ ဝမ်ပေါင်ကုမ္မဏီရဲ့ကြေးနီစီမံကိန်းတွေကို ဆက်လက်အကောင်အထည်ဖော်ပေးနေပြီး လုပ်ငန်းတွေအနှောင့်အယှက်မရှိအောင် ဘေးဝန်းကျင်ရွာတွေကို မကြာခဏ လက်နက်ကြီးတွေနဲ့ ပစ်ခတ်နေကြောင်း ဒေသခံတွေကပြောတယ်။
