ဩဂုတ်-၂၅၊၂၀၂၅။ People’s Spring
စစ်ကောင်စီ၏ ရိုဟင်ဂျာလူမျိုးတုန်းသတ်ဖြတ်မှုတွင် ဘဏ္ဍာငွေပံ့ပိုးခဲ့သည့် ကုမ္ပဏီများအနေဖြင့် တာဝန်ယူမှု၊ တာဝန်ခံမှုရှိရမည်ဟု ယင်းဖြစ်စဉ် ၈နှစ်ပြည့်တွင် Justice for Myanmar က ထုတ်ပြန်လိုက်သည်။
၂၀၁၇ ခုနှစ်တွင် ကုမ္ပဏီနှင့် အဖွဲ့အစည်းပေါင်းများစွာသည် မြန်မာစစ်အုပ်စု၏ နယ်မြေရှင်းလင်းစစ်ဆင်ရေးအတွက် ပံ့ပိုးကူညီရန် ဒေါ်လာသန်းပေါင်းများစွာကို စစ်အုပ်စုထံ တိုက်ရိုက်လှူဒါန်းခဲ့ကြကြောင်း JFM က ဖော်ပြသည်။ ယင်းကုမ္ပဏီများနှင့် အဖွဲ့အစည်းများအား ကုလသမဂ္ဂ၏ အချက်အလက်ရှာဖွေရေးမစ်ရှင်(FFM)က မှတ်တမ်းတင်ထားရှိခဲ့ပြီး၊ ယင်းတို့အား ရာဇဝတ်ကြောင်းအရ စုံစမ်းစစ်ဆေးမှုတစ်ရပ် လုပ်ဆောင်ရန် တောင်းဆိုခဲ့သည်ဟု JFM က ဆိုသည်။
စစ်တပ်အား ပံ့ပိုးသူများတွင် ခရိုနီကုမ္ပဏီများဖြစ်သည့် ကမ္ဘောဇ နှင့် Max ကုမ္ပဏီတို့လည်းပါဝင်ပြီး ယင်းကုမ္ပဏီများသည် ဘင်္ဂလားဒေ့ရှ်နိုင်ငံသို့ ထွက်ပြေး တိမ်းရှောင်ခဲ့သည့် ရိုဟင်ဂျာဒုက္ခသည်များအား မိမိနေအိမ်များထံ ပြန်လာနိုင်ခြင်းမရှိစေရန် နယ်စပ်ခြံစည်းရိုး ဆောက်လုပ်ရေးအတွက် ငွေကြေးလှူဒါန်းမှုတွင်ပါဝင်ခဲ့သောကြောင့် အားပေးအားမြှောက် ပြုလုပ်သည်ဟု ယူဆကြောင်း JFM က ဖော်ပြသည်။
Public Service Announcement
KBZ နှင့် Max ကုမ္ပဏီတို့သည် အခြားလူမဆန်သည့် ပြစ်မှုကြီးများတွင် ပါဝင်သည့် လူသားမျိုးနွယ်အပေါ် ကျူးလွန်သည့် ရာဇဝတ်မှုများ ကျူးလွန်ရာတွင် ကြီးကြီးမားမားတိုက်ရိုက်ပံ့ပိုးပေးခဲ့ကြောင်း ကုလသမဂ္ဂအချက်အလက်ရှာဖွေရေးအဖွဲ့-FFM က သုံးသပ်ခဲ့သည်။ ယင်းကုမ္ပဏီတို့ကို တရားစွဲဆိုရန် FFM က တိုက်တွန်းတောင်းဆိုခဲ့သည်။
သို့ရာတွင် ယင်းကုမ္ပဏီများအား အပြစ်ပေးအရေးယူတာဝန်ခံစေခြင်း မရှိသည့်အပြင် အဆိုပါ ကျူးလွန်သူများပင် ကျူးလွန်လျက်ရှိသည့် လက်ရှိနိုင်ငံတကာရာဇဝတ်မှုများမှ အကျိုးအမြတ်များ ဆက်လက် ရရှိနေကြသည်ဟု JFMက ထုတ်ပြန်သည်။
တရားမျှတမှုသည် ၈ နှစ်ကြာ မျက်ကွယ်ပြုငြင်းပယ်ခံထားရကြောင်း၊ ပြစ်ဒဏ်ကင်းလွတ်ခွင့်ရရှိနေခြင်းသည် ရာဇဝတ်မှုကြီးများ ကျူးလွန်သည့် စစ်အုပ်စုနှင့် ငွေကြေးထောက်ပံ့သည့် ခရိုနီများအား ပိုမိုရဲတင်းစေခဲ့သည်သာ ဖြစ်ကြောင်း JFM က ထောက်ပြထားသည်။
ကြံရာပါကုမ္ပဏီများနှင့် အဖွဲ့အစည်းများအား ရာဇဝတ်ကြောင်းအရ စုံစမ်းစစ်ဆေးမှုများပြုလုပ်ပြီး တရားစွဲဆိုရမည်ဟု JFM က တိုက်တွန်းသည်။
နိုင်ငံတကာရာဇဝတ်ခုံရုံး(ICC)အနေဖြင့် စစ်ခေါင်းဆောင်မင်းအောင်လှိုင်အား ဖမ်းဝရမ်းထုတ်ရမည်ဟုလည်း JFM က တောင်းဆိုသည်။
ထို့အပြင် နိုင်ငံတကာအသိုင်းအဝိုင်းအနေဖြင့် ရိုဟင်ဂျာများအပေါ် အကာအကွယ်ပေးရေး၊ မြန်မာစစ်အုပ်စုနှင့် အာရက္ခတပ်တော်တို့မှ ကျူးလွန်သူအားလုံးအား အရေးယူအပြစ်ပေးနိုင်ရေး လုပ်ဆောင်ရမည်ဟု JFM က ဆက်လက်တောင်းဆိုသည်။
ရိုဟင်ဂျာများသည် မြန်မာစစ်အုပ်စုနှင့် အာရက္ခတပ်တော်တို့၏ ဆိုးဆိုးရွားရွား နိုင်ငံတကာရာဇဝတ်မှု ကျူးလွန်မှုများကို ရင်ဆိုင်နေရဆဲဖြစ်ကြောင်း လူအခွင့်အရေးဆိုင်ရာကုလသမဂ္ဂမဟာမင်းကြီးက ပြောကြားထားသည်ဟု JFM က ဖော်ပြသည်။
