စက်တင်ဘာ−၂၊၂၀၂၅။ရဲခေါင်/People’s Spring
ကရင်နီပြည်နယ်၊ ဒီးမော့ဆို − ဖရူဆို ပြည်ထောင်စုလမ်းပိုင်း ထိန်းချုပ်နိုင်ရေးစစ်တပ်ကတင့်ကားနှင့် အတွဲလိုက်ဒုံး MMRS များ အသုံးပြုတိုက်ခိုက်လာကြောင်း မြေပြင်ရှိ ရဲဘော်များနှင့် စစ်ဘေးရှောင်ကူညီသူများက ပြောသည်။
ဒီးမော့ဆိုမြို့မှတဆင့် ဖရူဆိုမြို့နယ်သို့ချိတ်ဆက်ရာလမ်းပိုင်းနှင့် အဆိုပါလမ်းပိုင်းဘေးရှိ ကျေးရွာများအား စစ်တပ် စစ်ကြောင်းများဝင်ရောက်နေ၍ ဒေသခံပြည်သူများအရေးပေါ် စစ်ရှောင်နေရသည်ဟု ဆိုသည်။
“တင့်ကားနဲ့ကိုပစ်နေတာ။ပဒုံငံရွာကားလမ်းမအရှေ့ခြမ်းကိုထိုးလာတာ”ဟုကရင်နီ စစ်ရှောင်အရေးကူညီနေသူ ကိုလွှမ်းက ပြောသည်။
Public Service Announcement
ပဒုံငံကျေးရွာသည် ဒီးမော့ဆိုနှင့် ဖရူဆိုမြို့နယ် အစပ်တွင်ရှိပြီး အဆိုပါကျေးရွာအနီးတွင်သော ကွိုင်ငံရွာသစ်၊ကွိုင်ငံရွာဟောင်းနှင့် ငံရိုးကျေးရွာရှိ ပြည်သူများမှာ ယမန်နေ့ (စက်တင်ဘာ ၁ရက်)ကစ၍ စစ်ရှောင်နေရသည်။
“ဒီးမော့ဆို-ဖရူဆို ကားလမ်းမကို လမ်းကင်းယူ – ကားလမ်းအနီး ပတ်ဝန်းကျင်က ကျေးရွာတွေကို နယ်မြေရှင်းပြီး ဖရူဆိုကို ဒိုးဖို့ ပြင်လာပုံရတယ်”ဟု ကရင်နီစစ်ဘက်သတင်ရင်းမြစ်က စစ်တပ်၏ စစ်ကြောင်းထိုးလာမှုအပေါ် ရှင်းပြသည်။
ယနေ့(စက်တင်ဘာ ၂ရက်)နံနက်ပိုင်းတွင် စစ်တပ်စစ်ကြောင်းသည် ပဒုံငံကျေးရွာအတွင်းသို့ ရောက်ရှိလာကြောင်း သိရသည်။
“ဒရုန်းနဲ့ လာကြဲတာ စိပ်လာတယ်။MMRS လည်းသုံးတဲ့အခြေအနေကြုံရတယ်”ဟု ဒီးမော့ဆိုမြို့နယ်တွင် စစ်တပ်ကိုခုခံနေသည့် ရဲဘော်တစ်ဦးက ပြောသည်။
စစ်တပ်က ဒီးမော့ဆိုမြို့နယ်ရှိ ဒီးမော့ဆို-ဖရူဆို ပြည်ထောင်စုလမ်းမကြီးအတိုင်း စစ်ကြောင်းထိုးရာတွင် ဒီးမော့ဆိုအခြေစိုက်တပ်များအပြင် အင်အား ၃၀၀ထက်မနည်း ပူးပေါင်းအသုံးပြုထားကြောင်း အသိပေးသည်။
ကရင်နီဒေသတွင်း စစ်ရေးအရအရေးပါသည့် လွိုင်ကော်-ဒီးမော့ဆို-ဖရူဆို လမ်းပိုင်းစိုးမိုးရေးနှင့် ပိတ်မိနေသည့် ဖရူဆိုမြို့စောင့်တပ်များ စစ်ရေးလှုပ်ရှားနိုင်ရန် စစ်တပ်က ဒီးမော့ဆိုမြို့မှ စစ်ကြောင်းထိုးလာခြင်းဖြစ်သည်။
(ဒီးမော့ဆို -ဖရူဆိုလမ်းပိုင်းအနီး ကျေးရွာအချို့မှ ပြည်သူများ စစ်ဘေးရှောင်နေရသည်ကို တွေ့ရစဥ်)
