စက်တင်ဘာ-၃၊၂၀၂၅။ဇေအောင်/People’s Spring
စစ်ကိုင်းတိုင်း၊ မုံရွာမြို့မှာ မနေ့နေ့လယ်ပိုင်းက မိန်းကလေးပါတဲ့ ဓားပြအဖွဲ့က နေအိမ်တအိမ်ကို ဓါးပြတိုက်သွားကြောင်း သတင်းရရှိပါတယ်။
စက်တင်ဘာ ၂ ရက် နေ့လယ်ပိုင်းက မုံရွာမြို့၊ ထန်းတောရပ်၊ ရွှေသိမ်တော်ဘုရားကုန်း အတွင်းလမ်းက နေအိမ်တအိမ်ကို လူ ၄ ယောက်က ဓါးပြလာတိုက်သွားကြောင်း၊ ဆွဲကြိုး၊ နားကပ်၊ ငွေသားနဲ့ စကူဖီဆိုင်ကယ်တစီး ပါသွားကြောင်း ဒေသခံတချို့က ပြောပါတယ်။
“ဓားပြလာတိုက်တာက ယောကျာ်း ၃ ဦးနဲ့ နောက်တယောက်ကတော့ မိန်းမပါတယ်ပြောတယ်။မုံရွာမှာက တခုပြီးတခုဖြစ်နေတာ။ မထူးဆန်းတော့ဘူး။”လို့ မုံရွာမြို့ခံတဦးကဆိုပါတယ်။
Public Service Announcement
ဓားပြတိုက်လို့ ဆုံးရှုံးသွားတဲ့ ပမာဏကိုတော့ မသိရသေးပါဘူး။ မုံရွာမြို့ပေါ်မှာ ဓါးပြမှုတွေအပြင် ပြန်ပေးဆွဲမှု၊ ဓါးပြမှုတွေလည်း ဖြစ်ပွားနေပြီး အဲဒီကျူးလွန်သူတွေထဲမှာ မိန်းကလေးတွေပါ ပါဝင်နေတယ်လို့ မြို့ခံတွေက ပြောပါတယ်။
“တခါ အလုခံရတုန်းကဆိုရင် မိန်းကလေးပါပါတယ်။ လုတဲ့ထဲ။ မထင်ရဘူး”လို့ မုံရွာဒေသခံအမျိုးသမီးတဦးက ပြောပါတယ်။
ပြီးခဲ့တဲ့ ၂၀၂၄ ခုနှစ် နှစ်ကုန်ပိုင်းကတော့ မုံရွာမြို့မှာ ရွှေဆိုင်အပါအဝင် တခြားနေရာတွေကို ဓားပြတိုက်ခဲ့တဲ့သူတချို့ကို မုံရွာမြို့နယ် ပြည်သူ့လုံခြုံရေးအဖွဲ့က ဖမ်းဆီးနိုင်ခဲ့ပါသေးတယ်။
စစ်ကောင်စီ အာဏာသိမ်းပြီးနောက်ပိုင်း မုံရွာမြို့ပေါ်မှာ ခိုးဆိုးလုယက် ဓါးပြတိုက်မှုတွေဖြစ်ပွားနေပြီး ကျူးလွန်သူတွေကို စစ်တပ်က ဖမ်းဆီးတာမျိုး မရှိဘူးလို့ သိရပါတယ်။
ဒါ့အပြင်စစ်အုပ်စုကပြည်သူတွေကိုစစ်ဆေးငွေညှစ်တာ၊စစ်မှုထမ်းဖို့ ဖမ်းဆီးတာတွေလည်း ပြုလုပ်နေတယ်လို့ မြို့ခံတွေက ပြောပါတယ်။
