စစ်ကောင်စီထောက်တိုင်နှင့် အတုအယောင်ရွေးကောက်ပွဲ ပါဝင်သူများကို တိုက်ခိုက်မည်ဟု မြေအောက်ပြောက်ကျားတပ်ဖွဲ့(အုတ်ဖို) သတိပေး
စက်တင်ဘာ−၅၊ ၂၀၂၅။ ထားမြတ်/People’s Spring
ပဲခူးတိုင်း၊ သာယာ၀တီခရိုင် အုတ်ဖိုမြို့နယ်အပိုင် ပဲခူးရိုးမပေါ်သို့ စစ်ကောင်စီတပ်များ စစ်ကြောင်းထိုးနိုင်ရန် ကင်းပတ်လာသည့် ပျူစောထီးအဖွဲ့ကို တိုက်ခိုက်ခဲ့ရာ ၁ဦးသေဆုံးခဲ့ကြောင်း သာယာ၀တီခရိုင် တပ်ရင်း(၃၈၀၂) တပ်ခွဲ(၄)-မြေအောက်ပြောက်ကျားတပ်ဖွဲ့(အုတ်ဖို) တာဝန်ရှိသူက ပြောသည်။
အေးမြသာယာမြို့ ပျူခေါင်းဆောင် ၀န ဦးဆောင်သည့် ပျူတပ်ဖွဲ့ဝင်များသည် ဆိုင်ကယ် ၅စီးဖြင့် ကင်းပတ်စဉ် စက်တင်ဘာ ၃ရက်က စဉ့်ကူးချောင်းဂေါင်းဆည်တာဘောင်ပေါ်၌ စောင့်ကြိုတိုက်ခိုက်ခဲ့ခြင်းဖြစ်သည်ဟု တပ်ရင်း(၃၈၀၂) တပ်ခွဲ(၄) မြေအောက်ပြောက်ကျားတပ်ဖွဲ့-အုတ်ဖိုက သတင်းထုတ်ပြန်သည်။
Public Service Announcement
အပြန်အလှန် ပစ်ခတ်မှု ဖြစ်ပွားကာ ပျူစောထီး ကျော်ဝင်းစိန် နေရာတွင် သေဆုံးကာ ကျန်သူများ ထွက်ပြေးသွားဟု ဆိုသည်။
” စစ်ကြောင်း ထိုးဖို့တော့ရှိတယ်ဗျ။ မထိုးသေးဘူး။ ပျူတွေက ကင်းပတ်တာဗျ”ဟု တပ်ခွဲ(၄) တာဝန်ရှိသူက ပြောသည်။ သေဆုံးသူ ပျူစောထီးတွင် လက်နက် မပါလာဟုလည်း ပြောသည်။
ပြည်သူများနှင့် တော်လှန်ရေးတပ်ဖွဲ့များ ဒုက္ခပေးနေကြသည့် စစ်ကောင်စီတပ်များကို သာမက စစ်ကောင်စီ ထောက်တိုင်များကိုပါ တိုက်ခိုက်သွားမည်ဖြစ်၍ ပြည်သူများအနေဖြင့် ၎င်းတို့ အနီး သွားလာနေထိုင်ခြင်းမပြုရန် မြေအောက်ပြောက်ကျားတပ်ဖွဲ့-အုတ်ဖိုက အသိပေးထားသည်။
ထို့ပြင် ဩဂုတ် ၂၉ရက်ကလည်း မင်းလှမြို့နယ် ဗိုလ်ရုံတန်းရပ်ကွက်ရှိ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီရုံး ဝင်ပေါက်အနီး မိုင်းခွဲတိုက်ခိုက်ခဲ့ကြောင်း၊ စစ်အုပ်စုမှ ပြုလုပ်မည့် တရားမဝင် ရွေးကောက်ပွဲကို လက်မခံကြောင်းသတိပေး တိုက်ခိုက်ခြင်းသာ ဖြစ်ကြောင်း မြေအောက် ပြောက်ကျားတပ်ဖွဲ့-အုတ်ဖိုက သတင်းထုတ်ပြန်သည်။
” အဓိက ပြောချင်တာကတော့ ပြည်သူတွေကိုပေါ့။ ကျနော်တို့အနေနဲ့ အတုအယောင် ရွေးကောက်ပွဲကို ထိထိရောက်ရောက်တိုက်ခိုက်သွားမှာ ဖြစ်ပါတယ်။ အဲဒါကြောင့်စစ်ကော်မရှင်ရဲ့ တရားမဝင် ရွေးကောက်ပွဲကို မပါဝင်ကြဖို့နဲ့ မဲရုံတွေနဲ့ ဝေးဝေးနေကြဖို့ပါဗျ” ဟု တပ်ခွဲ(၄) တာဝန်ရှိသူက ပြောသည်။
စစ်ကောင်စီ၏ တရားမဝင်ရွေးကောက်ပွဲတွင် ပါဝင်ကြမည့်သူများနှင့် အားပေး ကူညီကြမည်သူများအား ပြင်းပြင်းထန်ထန် တိုက်ခိုက်သွားမည်ဟုလည်း သတိပေးသည်။
