စက်တင်ဘာ – ၆ ၊၂၀၂၅ ၊ နိုင်ပကောင်း/People’s Spring
တော်လှန်ရေးအင်အားစုတွေ သိမ်းယူထားခဲ့တဲ့ မြ၀တီမြို့နယ်၊ သင်္ဃန်းညီနောင်အခြေစိုက် ခမရ (၃၅၅)နဲ့ ခမရ (၃၅၆)တပ်ရင်းတွေကို စစ်ကောင်စီတပ်က မနေ့ စက်တင်ဘာ ၅ ရက် ညနေပိုင်းမှာ ပြန်လည်ထိန်းချုပ်နိုင်ခဲ့တယ်လို့ ကရင်ဒေသရှိစစ်ရေးသတင်းရင်းမြစ်တွေက ပြောပါတယ်။
အင်အားရာချီပါဝင်တဲ့ စစ်ကောင်စီတပ်ရဲ့အောင်ဇေယျစစ်ကြောင်းဟာ စက်တင်ဘာ၅ရက်မနက်အစောပိုင်းကအာရှလမ်းမကြီးရဲ့တောနော်ရေတံ ခွန်နားကနေတဆင့် မြဝတီမြို့နယ် အတွင်းကွင်းကလေးကျေးရွာကို စစ်ကြောင်းထိုး၀င်ရောက်လာခဲ့ပြီး အတွင်းကွင်းကလေး ကနေတဆင့် အပြင်ကွင်းကလေးရွာဘက်ကို စစ်ကြောင်းဆက်ထိုးလာခဲ့တာပါ။
အဲဒီနောက်အပြင်ကွင်းကလေးကနေတဆင့်သင်္ဃန်းညီနောင်က ခမရ (၃၅၅)နဲ့ ခမရ(၃၅၆)တပ်ရင်းတွေကိုမနေ့ ညနေပိုင်းမှာ စစ်ကောင်စီတပ်က ပြန်လည်သိမ်းပိုက်ထိန်းချုပ်နိုင်ခဲ့တာဖြစ်ပါတယ်။
Public Service Announcement
သင်္ဃန်းညီနောင်ဟာ မြဝတီမြို့အဝင်မှာရှိတာဖြစ်ပါတယ်။
သင်္ဃန်းညီနောင်ဒေသကို ကရင်အမျိုးသားလွတ်မြောက်ရေးတပ်မတော် (KNLA)၊ကော်ဘရာစစ်ကြောင်းနဲ့ PDF ပူးပေါင်းတပ်တွေက ၂၀၂၄ ခုနှစ်မတ်လ ၇ရက်က စတင်ထိုးစစ်ဆင်ပြီး ဧပြီ ၅ရက်နေ့မှာ သိမ်းပိုက်ထိမ်း ချုပ်ခဲ့တာပါ။
သင်္ဃန်းညီနောင်က ခြေမြန်တပ်ရင်း ခမရ(၃၅၅) စခန်းသိမ်းတိုက်ပွဲမှာ စစ်ကောင်စီတပ်က ၁၉ဦး သေဆုံးခဲ့တယ်လို့ ကရင်အမျိုးသားအစည်း အရုံး(KNU)က ထုတ်ပြန်ထားခဲ့ပါတယ်။
“ပေးလိုက်ရပြီ ၃၅၅ နဲ့ ၃၅၆ ရော၊(အင်အား)များတယ်”လို့ စစ်ရေးသတင်းရင်းမြစ်တစ်ဦးက ပြောပါတယ်။
မြဝတီမြို့စောင့်တပ် ခလရ(၂၇၅)ကတဆင့် ထိုးတက်လာတဲ့ စစ်ကြောင်းက ပွင့်သွားပြီး သင်္ဃန်းညီနောင်ဘက်ရောက်လာတာအပြင် အာရှလမ်းကနေ စစ်ကြောင်းထိုးလာတဲ့ စစ်ကြောင်းကြောင့်ရော ရဲဘော်တွေ အထိနာမှာစိုးလို့ ကော်ဘရာစစ်ဆင်ရေးမှူးဗိုလ်မှူး ဒါဘောက ဆုတ်ခွာပေးခဲ့တာလို့ ကော့ကရိတ်ဒေသက People’s Spring ရဲ့ သတင်းရင်းမြစ်က ပြောပါတယ်။
“ညီနောင်မှာ သူတို့ထိုင်နေပြီ ၊အကုန်ပွင့်သွားတဲ့သဘောပဲ၊အခုလောက်ဆို မြဝတီရောက်နေရော့မယ်၊အခုဝေါလေကလက်နက်ကြီးတွေနဲ့ အဆက် မပြတ်ထုနေတယ်”လို့မနေ့ ညပိုင်းက အဲဒီသတင်းရင်းမြစ်က ဆိုပါတယ်။
အာရှလမ်းမကြီးပေါ်က တောနော်ရေတံခွန်နားမှာ ပိတ်ဆို့ခံထားရတဲ့ အောင်ဇေယျစစ်ကြောင်းဟာ ဖောက်ထွက်လာပြီး မြဝတီမြို့နယ်ထဲရောက်လာတာဖြစ်ပါတယ်။
၂၀၂၄ခုနှစ် ၊ ဧပြီလက မော်လမြိုင်ကနေ မြဝတီကို လေးရက်နဲ့ အရောက်ချီတက်မယ်ဆိုပြီး ကြွေးကြော်ခဲ့တဲ့ စစ်ကောင်စီတပ်ရဲ့ အောင်ဇေယျစစ်ကြောင်းဟာ ဒေါနတောင်ပေါ်မှာ ရက်ပေါင်း ၅၀၀ လောက် ပိတ်မိနေတာပါ။
အဲဒီနောက် ပြီးခဲ့တဲ့ သြဂုတ်လက အင်အားထပ်ဖြည့် ပြီး ရက်ပေါင်း ၉၀ အတွင်းမြဝတီ ကိုအရောက်သွားကာ ဆုံးရှုံးထားတဲ့ တပ်စခန်းတွေကို ပြန်သိမ်းမယ်ဆိုပြီး စစ်ကြောင်းထိုးလာတာလည်းဖြစ်ပါတယ်။
