စက်တင်ဘာ−၉၊၂၀၂၅။ဇော်ဝင်း/People’s Spring
မန္တလေးတိုင်း၊ မလှိုင်မြို့နယ်မှာ စစ်ကောင်စီတပ်က အင်အား ၂၀၀ကျော်နဲ့ စစ်ကြောင်းထိုးနေတယ်လို့ ဒေသတွင်းသတင်းရင်းမြစ်တွေက ပြောပါတယ်။
စက်တင်ဘာ ၇ရက်က မလှိုင်မြို့အတွင်းကို စစ်ကောင်စီယာဥ် အစီးရေ ၃၀ဝန်းကျင် ဝင်လာပြီး မြို့ပေါ်မှာ ကနဦးဖြန့်ကျက်တပ်စွဲခဲ့ပြီးနောက် မနေ့က စက်တင်ဘာ၈ရက်စပြီး မလှိုင်-နှောကန်လမ်းအတိုင်း စစ်ကြောင်းထိုးနေတာလို့ ဆိုပါတယ်။
“မနက် ၈ နာရီခွဲက အဖွဲ့လေးဖွဲ့ခွဲပြီး ဆုံတွင်းအုပ်စုနဲ့ပန်းအိုင်ထနောင်းကျင်း ကျေးရွာများကို ဝင်ရောက်နေတယ်လို့ သိရပါတယ်။ဝင်ရောက်ခဲ့တဲ့ကျေးရွာတွေက ဖုန်းတွေ ဆက်သွယ်မရသေးလို့ သေချာမသိရသေးပါဘူး”လို့ လူထုသတင်းကွန်ယက်မလှိုင်မြို့ တာဝန်ရှိသူက ပြောပါတယ်။
Public Service Announcement
လှိုင်မြို့နယ်အတွင်းရောက်ရှိနေတဲ့ စစ်ကြောင်းက မြင်းခြံ-သာစည် မဟာဓာတ်အားလိုင်း ပြန်လည်ပြုပြင်ဖို့ အဓိကရည်ရွယ်ချက်လို့ ဒေသတွင်း သတင်းရင်းမြစ်အချို့က အသိပေးပါတယ်။
“ဓာတ်အားလိုင်းတစ်လျှောက် စစ်ကြောင်းထိုးနယ်မြေရှင်းလင်းပြီး ပန်းပေါင်းမှာ အထိုင်ချမယ်လို့ ဖရဲသီးသတင်းအရသိရတယ်”လို့ တောင်သာမြို့နယ်လူထုလှုပ်ရှားမှုကော်မတီအဖွဲ့ဝင်တဦးက ပြောပါတယ်။
ဒါပေမယ့် စစ်ကောင်စီတပ်စစ်ကြောင်းရဲ့ အခြေအနေအရ မလှိုင်၊တောင်သာ၊နွားထိုးကြီးနဲ့ မြင်းခြံ ဒေသတွေက နေရာအနှံ့အပြားကို စစ်ကြောင်းထိုးနိုင်လို့ ပြည်သူတွေ သတိထားနေထိုင်ဖို့လည်း တိုက်တွန်းထား ပါတယ်။
ပြီးခဲ့တဲ့ရက်ပိုင်တွေက မလှိုင်မြို့နယ်အနောက်ဘက်ခြမ်းနဲ့ အနောက် တောင်ဘက်ခြမ်းက ကျေးရွာတွေကို စစ်ကောင်စီရဲ့ မိတ္ထီလာလေတပ်စခန်းတွေက စက်တပ်လေထီးတွေနဲ့ ဗုံးကြဲခဲ့တယ်လို့ သိရပါတယ်။
