ပေါင်းတည်တွင် စစ်တပ်လက်အောက်ခံပျူစောထီးတဦး ပစ်ခတ်ခံရပြီးသေဆုံး

စက်တင်ဘာ-၁၃၊၂၀၂၅။ကျော်ဇော/People’s Spring

ပဲခူးတိုင်း၊ ပေါင်းတည်မြို့နယ်၊ပန်းသင်းပင်ရွာနေ ပျူစောထီးအေးမင်းထွန်းဆိုသူ ​သေနတ်ဖြင့်ပစ်ခတ်ခဲ့ရပြီး​သေဆုံးခဲ့ပါတယ်။

စက်တင်ဘာ ၁၁ ရက်မနက် ၇ နာရီလောက်က ပျူစောထီးလို့ဆိုသူ အေးမင်းထွန်းဟာယာတဲသို့သွားရန် ပန်းသင်းပင်ရွာပြင်သို့ ထွက်လာစဥ်တပ်ရင်း ၃၆၀၁၊ တပ်ခွဲ ၂ မှရဲဘော်များကစောင့်ကြိုပစ်ခတ်ခဲ့ရာ နေရာတင်သေဆုံးသွားတယ်လို့ ပြည်ခရိုင် တပ်ရင်း ၃၆၀၁ က ဒီကနေ့ စင်တင်ဘာ ၁၃ ရက်မှာ အသိပေးထုတ်ပြန်ပါတယ်။

အဲဒီပျူစောထီးအေးမင်းထွန်းဟာပန်းသင်းပင်ရွာနဲ့ အနီးဝန်းကျင်ရွာတွေမှာရှိတဲ့ပြည်သူတွေထံက ကိုင်သတ်ဆေးပုံး၊ ဆန်၊ ဆီ၊ ငါးနှင့် အခြားဟင်းမျိုးစုံတို့ကို စစ်ကောင်စီတပ်သားတွေနဲ့အတူ လိုချင်တာမှန်သမျှ အကုန်သိမ်းယူပြီး အာဏာရှင်အလိုကျလုပ်ကိုင်နေတာကြောင့်အခုလိုပြတ်ပြတ်သားသားအရေးယူလိုက်တာလို့ တပ်ရင်း ၃၆၀၁ က အသိပေးပါတယ်။

Public Service Announcement

“အဲဒီပျူစောထီး အေးမင်းထွန်းက စကစတွေနဲ့နဲ့အတူလိုက်ပြီး ကိုယ်တိုင်သိမ်းဆည်းတာ။ အခုမှ အဲလိုလုပ်နေတာမဟုတ်ဘူး၊ ကြာပြီ ၂ နှစ်လောက်ရှိပြီ”လို့ တပ်ရင်း ၃၆၀၁ ရဲ့ ပြန်ကြား ရေးတာဝန်ခံ ရဲဘော်ရှဲဒိုးက လူထုနွေဦးကို ပြောပါတယ်။

ပြည်သူ့ကာကွယ်ရေးတပ်မတော်အနေဖြင့် ပြည်သူကိုဒုက္ခအမျိုးမျိုး​ပေးနေတဲ့ စစ်ကောင်စီနဲ့ ၎င်းရဲ့ထောက်တိုင်တွေကို အခုလို ပြတ်ပြတ်သားသားအရေးယူတာတွေ လုပ်ဆောင်သွားမယ်လို့ သတိပေးထားပါတယ်။

ပေါင်းတည်မြို့နယ်အတွင်း စစ်ရေးလှုပ်ရှားမှုတွေလုပ်ဆောင်လျှက်ရှိရာ စက်တင်ဘာ ၃ ရက်နေ့က ညောင်ပင်နီအုပ်စု၊ ညောင်နီပင်ရွာနဲ့ ကျောင်ကြီးတောင်ရွာကြားသို့ အင်အား ၉၀ ကျော်ဖြင့် စစ်ကြောင်းထိုးလာသော စစ်ကောင်စီတပ် သားများကို တပ်ရင်း ၃၆၀၁၊ တပ်ခွဲ ၂ မှ ပဒေ သာမိုင်းလေးလုံးဖြင့် နှစ်ကြိမ်မိုင်းဆွဲတိုက် ခိုက်ခဲ့ပါတယ်။

အဲဒီမိုင်းဆွဲတိုက်ခိုက်မှုမှာ စစ်ကောင်စီတပ်ဖွဲ့ဝင် (၆)ဦး နေရာမှာတင်ပွဲချင်းပြီးသေဆုံးကာ (၅)ဦး အပြင်းထန်ဒဏ်ရာသွားတယ်လို့ တပ် ရင်း ၃၆၀၁ က ထုတ်ပြန်ထားပါတယ်။