စက်တင်ဘာ-၁၄၊ ၂၀၂၅။ ရှိုင်း/People’s Spring
စစ်ကောင်စီက ရခိုင်ပြည်နယ်၊ ကျောက်တော်မြိုနယ်၊ သရက်တပင်ကျေးရွာက ကိုယ်ပိုင် အထက်တန်း စာသင်ကျောင်းတွေကို လေကြောင်းတိုက်ခိုက်ရာ ထိခိုက်ဒဏ်ရာရခဲ့တဲ့ကျောင်းသား တဦး ထပ်မံ သေဆုံးခဲ့လို့ လေကြောင်း တိုက်ခိုက်မှုကြောင့် သေဆုံးခဲ့ရတဲ့ ကျောင်းသား၊ ကျောင်းသူ စုစုပေါင်း ၂၀ဦး ရှိလာကြောင်း အာရက္ခတပ်တော်(AA)က သတင်းထုတ်ပြန်ပါတယ်။
အာဏာသိမ်းစစ်တပ်က စက်တင်ဘာ ၁၁ရက်ညသန်းခေါင်(စက်တင်ဘာ ၁၂ရက် မနက် အစော)မှာ သရက်တပင်ကျေးရွာကို ဖျက်အားပြင်းပေါင် ၅၀၀ ဗုံးနှစ်လုံး ကြဲချတိုက်ခိုက်ခဲ့ရာ ကျောင်းသား၊ ကျောင်းသူ ၁၉ဦး သေဆုံးကာ ကျောင်းသား၊ ကျောင်းသူများအပါအဝင် ပြည်သူ ၂၂ ဦးဒဏ်ရာရရှိခဲ့တာပါ။
ဒဏ်ရာရသူတွေထဲမှာ ပြင်းထန်ဒဏ်ရာရရှိခဲ့လို့ ဆေးကုသမှုခံယူနေရတဲ့ Grade 11 ကျောင်းသား အသက် ၁၇အရွယ် မောင်အောင်ငြိမ်းဖြိုးဟာ မနေ့က စက်တင်ဘာ ၁၃ရက် နံနက်မှာ အသက်ဆုံးပါးခဲ့ရကြောင်း AAက အသိပေးပါတယ်။
Public Service Announcement
အေးချမ်းစွာ ပညာသင်ယူဆည်းပူးနေကြတဲ့ ကျောင်းသား၊ ကျောင်းသူတွေ အသက်သေဆုံးအောင် ပစ်မှတ်ထားတိုက်ခိုက်ခဲ့တာ အပါအဝင် အာဏာသိမ်းစစ်ကောင်စီဟာ စစ်ရာဇဝတ်မှုနဲ့ လူသားမျိုးနွယ်အပေါ် ပြစ်မှု ကျူးလွန်တာတွေကို နေ့စဉ်လုပ်ဆောင်နေကြောင်း AAက ထုတ်ပြန်ထားပြီး တရားမျှတမှု ရရှိဖို့ လက်တုန့်ပြန်သွားမယ်လို့ ထုတ်ပြန်ထားပါတယ်။
ဒါ့အပြင် နိုင်ငံတကာအနေနဲ့ စစ်အုပ်စုရဲ့ လုပ်ရပ်ကို လက်ပိုက်ကြည့်မနေဘဲ ထိရောက်တဲ့ အရေးယူမှုတွေလုပ်ဆောင်ဖို့လည်း တိုက်တွန်းထားပါတယ်။
အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလကလည်း စစ်အုပ်စုက စာသင်ကျောင်းကို ဗုံးကြဲတိုက်ခိုက်ခဲ့လို့ ငယ်ရွယ်တဲ့ကျောင်းသားကျောင်းသူတွေ အသက်ဆုံးရှုံးရတဲ့အပေါ် အထူးဝမ်းနည်းကြေကွဲရကြောင်း ဒီကနေ့ စက်တင်ဘာ ၁၄ရက်မှာ ဒေါ်အောင်ဆန်းစုကြည်ရဲ့သားဖြစ်သူ ကိုထိန်လင်းနဲ့ တွေ့ဆုံတဲ့ သတင်းထုတ်ပြန်ရာမှာ ထည့်သွင်း ဖော်ပြခဲ့ပါတယ်။
ကျောင်းသား၊ကျောင်းသူတွေအိပ်မော ကျနေချိန် ညသန်းခေါင်ကျော်မှာ ဗုံးကြဲတိုက်ခိုက်ခဲ့တာဖြစ်လို့ ကျောင်းသားကျောင်းသူတို့ရဲ့ အပြစ်မဲ့အိပ်မက်တွေ ဆုံးရှုံးပျက်စီးသွားခဲ့ရတယ်လို့လည်း ယာယီသမ္မတက ထုတ်ပြန်ပါတယ်။
အာဏာသိမ်းစစ်တပ်ဟာ ရွေးကောက်ပွဲကျင်းပဖို့ ကြိုးပမ်းနေသလို တဖက်မှာလည်း နိုင်ငံတဝန်း အရပ်သား ပြည်သူတွေကို ပစ်မှတ်ထားတဲ့ လေကြောင်း တိုက်ခိုက်မှုတွေ ပိုမိုတိုးမြှင့် လုပ် ဆောင်နေကြောင်းအမျိုးသားညီညွတ်ရေးအစိုးရ လူ့အခွင့်အရေးဝန်ကြီးဌာနက အသိပေးထားပါတယ်။
