ကနီမြို့နယ်ကို စစ်ကြောင်းပြန်ထိုးဖို့ စစ်တပ် ကြိုးပမ်းနေ

စက်တင်ဘာ-၁၈၊၂၀၂၅။လူ​အေး/People’s Spring

စစ်ကိုင်းတိုင်း၊ ကနီမြို့နယ်ကို စစ်တပ်က စစ်ကြောင်းထပ်ထိုးဖို့ ကြိုးစားနေပြီး ကွေ့ချောင်းရွာမှာ လက်နက်ကြီးတပ်ဆင်နေသလို မြေပြင်စစ်ကြောင်းလည်း နဘူးတောရွာကို ရောက်ရှိလာတယ်လို့ သိရပါတယ်။

စက်တင်ဘာလဆန်းက တိုက်ပွဲအပြင်းအထန်ဖြစ်ခဲ့ပြီး စစ်တပ်ဆုတ်ခွာထွက်ပြေးခဲ့တဲ့ ကနီမြို့နယ်ထဲက ချောင်းမရွာကို စစ်ကောင်စီတပ်က ပြန်လည်ထိုးစစ်ဆင်ဖို့ ကြိုးစားနေတာလို့ PDF တချို့နဲ့ ​ဒေသခံတချို့က​ ပြောပါတယ်။

ပြီးခဲ့တဲ့ သီတင်းပတ်တိုက်ပွဲတွေအတွင်း စစ်ကောင်စီတပ်ဖွဲ့ဝင်တွေဟာ ချောင်းမရွာကနေ ၅ မိုင်ခန့်သာဝေးတဲ့ ယင်းမာပင်မြို့နယ်ထဲက တရော်ကျင်းရွာကို ဆုတ်ခွာထွက်ပြေးသွားခဲ့ပြီး လက်ရှိ ခြေကုပ်ယူထားတယ်လို့ ပြည်သူ့ကာကွယ်ရေးတပ်ဖွဲ့ဝင်တစ်ဦးက ပြောပါတယ်။

Public Service Announcement

ချောင်းမရွာဟာ မုံရွာ-ကလေးဝ ကားလမ်းမပေါ်မှာ ရှိပြီး ကွေ့ချောင်းရွာနဲ့ဆို ၁၁ မိုင်ခန့် ဝေးပါတယ်။ တရော်ကျင်းရွာကတော့ ချောင်းမနဲ့ ကွေ့ချောင်းကြား မုံရွာ-ကလေးဝကားလမ်းမဘေးမှာပဲ ရှိပါတယ်။

စစ်ကောင်စီတပ်က လက်ရှိ ကွေ့ချောင်းရွာမှာ လက်နက်ကြီး တပ်ဆင်နေတာလို့ သိရပါတယ်။ နဘူးတောရွာကတော့ တရော်ကျင်းနဲ့ ကွေ့ချောင်းကြား ရှိပြီး ကွေ့ချောင်းနဲ့ ပိုနီးပါတယ်။ ဒေသတွင်း စစ်ရေးအခြေအနေကြောင့် ဒေသခံတွေ ထပ်မံစစ်ရှောင်ဖို့ ပြင်ဆင်နေရတယ်လို့ ဒေသခံတစ်ဦးက ပြောပါတယ်။

စစ်ရေးအခြေအနေကတော့ ငြိမ်စရာမရှိတော့ကြောင်းနဲ့ အဓိက က အရပ်သားတွေ ဘေးကင်းရေးကို ဦးစားပေးနေတယ်လို့ ပြည်သူ့ကာကွယ်ရေးတပ်ဖွဲ့ဝင်က ပြောပါတယ်။

စစ်တပ်စစ်ကြောင်းတွေဟာ မုံရွာ-ကလေးဝ ကားလမ်းအတိုင်း စက်တင်ဘာလဆန်းက စတင်ပြီး ကနီမြို့နယ်ထဲဝင်ရောက်လာပြီး ချောင်းမရွာအပါအဝင် ရွာတချို့ကန နေအိမ်တွေကို မီးရှို့နေတောကြောင့် PDF၊ ပကဖနဲ့ ပူး​ပေါင်းတပ်တွေက တိုက်ခိုက်ခဲ့ကြပါတယ်။

ပြီးခဲ့တဲ့ စက်တင်ဘာ ၁၁ရက် တိုက်ပွဲမှာ စစ်ကောင်စီဘက်က ထိခိုက်သေဆုံးဒဏ်ရာရသူများပြားခဲ့ပြီး စစ်ကြောင်းတွေ ပြန်လည်ဆုတ်ခွာထွက်ပြေးခဲ့ကြရပါတယ်။ အဲဒီတိုက်ပွဲမှာ စစ်တပ်ကနေ သုံ့ပန်းတချို့ကိုလည်း ဖမ်းမိခဲ့ပြီး လက်နက်ခဲယမ်းတွေကိုလည်း​ တော်လှန်​ရေးတပ်တွေက သိမ်းဆည်းရရှိခဲ့ပါတယ်။

ဒါပေမဲ့ အဲဒီတိုက်ပွဲမှာ အမှတ်(၁)စစ်ဒေသ၊ ယင်းမာပင်ခရိုင်၊ ယင်းမာပင်မြို့နယ် ပကဖ ULF စစ်ကြောင်းက စစ်ကြောင်းမှူး ရဲဘော်နိုင်မင်းနဲ့ ရဲဘော်တချို့ ထိခိုက်ကျဆုံးခဲ့ပါတယ်။

စက်တင်ဘာ ၁၆ရက်ကလည်း ချောင်းမရွာကို စစ်ကောင်စီက ပါရာမော်တာနဲ့ ဗုံးကြဲခဲ့ပါတယ်။ ထိခိုက်မှုတော့ မရှိခဲ့ဘူးလို့ သိရပါတယ်။

ထပ်မံရရှိတဲ့သတင်းအရ NUG လက်​အောက်ရှိ ဆက်သွယ်​ရေးသတင်းအချက်အလက်နှင့် နည်းပညာဝန်ကြီးဌာနက ကနီမြို့နယ်က စစ်​ရေးအ​ခြေအ​နေ​တွေ​ကြောင့် မြို့နယ်အတွင်းရှိ အင်တာနက်ဆိုင်​တွေအားလုံးပိတ်ဖို့ စက်တင်ဘာ ၁၇ ရက်​နေ့ ရက်စွဲဖြင့်ညွန်ကြားထားတယ်လို့ သိရပါတယ် ။

ဒါအပြင် ​ချောင်းမတိုက်ပွဲမှာထွက်​ပြေးတဲ့စစ်သား​တွေကို ​တော်လှန်​ရေးတပ်​တွေက ကြားဖြတ်တိုက်ခိုက်တာမှာ စစ်သား ၃ဦးကို လက်နက်ခဲယမ်း​တွေနဲ့အတူ ဖမ်းမိတယ်လို့ ULF က စက်တင်ဘာ ၁၈ ရက်ညမှာ ထုတ်ပြန်ပါတယ် ။