စက်တင်ဘာ၂၁၊၂၀၂၅။အိမ်သွင်/People’s Spring
မန္တလေးတိုင်း၊မိုးကုတ်မြို့အနောက်ပိုင်းကို ယနေ့(စက်တင်ဘာ၂၁ရက်) ညနေ၂နာရီ၁၅မိနစ်တွင် စစ်ကောင်စီက ဂျက်ဖိုက်တာဖြင့် ထပ်မံဗုံးကြဲတိုက်ခိုက်သွားသည်။
မိုးကုတ်မြို့တွင် မိုးရွာပြီးမိုးခြိမ်းနေစဉ် စစ်ကောင်စီက ဂျက်ဖိုက်တာဖြင့် အချိန်အတော်ကြာပျံဝဲကာ ဗုံးကြဲသွားခြင်းဖြစ်ကြောင်း ဒေသခံတဦးက ပြောသည်။အရပ်သားနေထိုင်သောနေရာကိုကျရောက်ပေါက်ကွဲခြင်းမရှိ၍ ထိခိုက်မှုမရှိကြောင်း သိရသည်။
“ဖိုက်တာကဝဲနေတာ။ဗုံးကြဲတဲ့အချိန်မှာမိုးလည်းခြိမ်းတော့ရှင်းရှင်း လင်းလင်းမသိလိုက်ကြရဘူး။ အခု နေပြန်ပွင့်သိရတာ။လူမထိလို့တော်သေး တာ”ဟု ၎င်းက ပြောသည်။
Public Service Announcement
ဗုံးကြဲ၍ နေအိမ်အချို့ ပျက်စီးမှုရှိခဲ့ပြီး လူနေထိုင်ခြင်းမရှိ၍ ကံကောင်းထောက်မခဲ့သည်ဟု ဒေသခံများက ပြောသည်။
မိုးကုတ်မြို့သည်တအောင်းအမျိုးသားလွတ်မြောက်ရေတပ်မတော် (TNLA) ထိန်းချုပ်ထားသည်မြို့ဖြစ်သည်။
လက်ရှိတွင် စစ်ကောင်စီတပ်နှင့် TNLAသည် ကျောက်မဲမြို့နယ်၊နောင်ပိန်တိုက်နယ်နှင့် နောင်ချိုမြို့နယ်မှ နေရာအချို့တွင် တိုက်ပွဲများဖြစ်နေသည်။
ထို့အပြင် မိုးကုတ်မြို့နှင့် သပိတ်ကျင်းမြို့ကြား နေရာအချို့တွင်လည်း စစ်ကောင်စီတပ်နှင့်ပြည်သူ့ကာကွယ်ရေးတပ်ဖွဲ့များ တိုက်ပွဲဖြစ်ပွားနေသည်။
ကျောက်မဲ၊ သီပေါ၊ မိုးကုတ်မြို့များ စစ်ကောင်စီက လေကြောင်းတိုက်ခိုက်မှုများ မကြာခဏပြုလုပ်နေသည်။
စစ်ကောင်စီသည် မိုးကုတ်မြို့ကို စက်တင်ဘာ ၁၆ရက်ကလည်း ဗုံးကြဲခဲ့သေးသည်။
မိုးကုတ်မြို့၊ လင်းရောင်ခြည်ဘုန်းကြီးကျောင်းအနီးကို ဗုံးကြဲခြင်းဖြစ်ပြီး နေအိမ်လေးလုံးပျက်စီးကာ အရပ်သားတဦးဒဏ်ရာရခဲ့သည်။
လင်းရောင်ခြည်ဘုန်းကြီးကျောင်းသည် စစ်ဘေးရှောင်များခိုလှုံနေသည့်ကျောင်းဖြစ်ပြီး ပြီးခဲ့သည့် ဩဂုတ် ၁၄ရက်တွင် စစ်ကောင်စီကဗုံးကြဲခဲ့ရာ ကိုယ်ဝန်သည်နှင့် ကလေးအချို့အပါအဝင်၂၁ဦး သေဆုံးခဲ့သည်။
