စက်တင်ဘာ-၂၃၊၂၀၂၅။လူအေး/People’s Spring
မင်းတပ်မြို့ပေါ် နှစ်နေရာကို စစ်ကောင်စီက စက်တင်ဘာလ ၂၁ရက်ညနက်ပိုင်းမှာ လေကြောင်းကနေ ဗုံးကြဲသွားပါတယ်။
မင်းတပ်မြို့၊ မြို့မရပ်ကွက်နဲ့နောက်ထပ်တစ်နေရာကို ည ၉နာရီ၄၀မိနစ်ခန့်မှာ ဗုံးကြဲတာပါ။
“အရပ်သားတွေနေတဲ့နေရာကို တည့်တည့်ကျတာမဟုတ်တော့ကံကောင်းတယ်။အိမ်တွေတော့ပျက်စီးတာရှိတယ်။ လူထိခိုက်မှုမရှိခဲ့ဘူး” လို့မင်းတပ်မြို့နယ်ပြည်သူ့အုပ်ချုပ်ရေးအဖွဲ့နဲ့ နီးစပ်သူတစ်ဦးကပြောပါတယ်။
Public Service Announcement
မြို့မှာ ညဘက်အေးအေးဆေးဆေးရှိနေတဲ့အချိန် လေကြောင်းကနေ ဗုံးလာကျဲခဲ့တာဖြစ်ပြီး ဗုံးခိုကျင်းထဲပြေးဝင်ရင်း ဒဏ်ရာရခဲ့တယ်လို့ဒေသခံအမျိုးသမီးတစ်ဦးကပြောပါတယ်။
“လူစိတ်မရှိတဲ့ စစ်တပ်လေ။ အေးဆေးနေကြတဲ့ နေရာကို လာကြဲတာ”လို့ အဆိုပါအမျိုးသမီးကပြောပါတယ်။
ချင်းကာကွယ်ရေးတပ်တွေထိန်းချုပ်ထားတဲ့ မင်းတပ်မြို့နယ်အနီးကို ပြီးခဲ့တဲ့စက်တင်ဘာလ ၁၁ရက်နေ့ညက စစ်ကောင်စီက ဗုံးကြဲတိုက်ခိုက်ခဲ့ပြီး အဲဒီနောက်ပိုင်း အခုတစ်ခါထပ်ပြီး ဗုံးကြဲတာဖြစ်ပါတယ်။ လက်ရှိမှာ မင်းတပ်မြို့နဲ့ ဆက်စပ်နေတဲ့ ယောဒေသမှာ စစ်တပ်စစ်ကြောင်းတွေရှိနေပြီး စစ်ရေးအန္တရာယ်နဲ့ လေကြောင်းအန္တရာယ်သတိပြုဖို့ ကာကွယ်ရေးတပ်ဖွဲ့တွေကသတိပေးထားပါတယ်။
