စက်တင်ဘာ−၂၂၊ ၂၀၂၅။ ထားမြတ်/People’s Spring
ကချင်ပြည်နယ်၊ ဖားကန့်မြို့နယ်မှာ အာဏာသိမ်းစစ်တပ်ရဲ့ ဒရုန်းဗုံးကြဲတိုက်ခိုက်မှုကြောင့် ပြည်သူ ၂ဦးထပ်မံ သေဆုံးခဲ့ရတယ်လို့ ဒေသ သတင်းရင်းမြစ်က ပြောပါတယ်။
စက်တင်ဘာ ၂၂ရက် ညနေပိုင်းမှာ ဖားကန့်မြို့နယ် ဆိုင်းတောင်ဒေသ တောင်ယာကုန်းကို စစ်တပ်က ဗုံးကြဲခဲ့တာလို့ ဆိုပါတယ်။
” တိုက်ပွဲမရှိဘဲနဲ့ သူတို့က လာပြီးမှ ဒရုန်းဗုံးနဲ့ ကြဲသွားတာ။သားအဖနှစ်ယောက်ရှိတဲ့ တဲပေါ် ကျတာ သားဖနှစ်ယောက်လုံးထိသွားတာပေါ့။ ဆုံးတော့ မဆုံးသေးပေမယ့် ဘယ်သူမှ မကောက်ရဲတဲ့အခါကျတော့ အချိန်ကြာလာတော့သွေးထွက်လွန်ပြီးဆုံးသွားတာ။” လို့ သတင်းရင်းမြစ်က ပြောပါတယ်။
Public Service Announcement
စစ်ကောင်စီရဲ့ ဒရုန်းဟာ ဆိုင်းတောင်ရဲ့ တဖက်ကမ်း ဖားပြင်မှော်ဘက်က တက်လာတာလို့လည်း သတင်းရင်းမြစ်က ပြောပါတယ်။
အာဏာသိမ်းစစ်တပ်ဟာ ဖားကန့်မြို့နယ်မှာ ကချင်လွတ်လပ်ရေးတပ်မတော်(KIA) ပူးပေါင်းတပ်နဲ့ တိုက်ပွဲတွေ ဆိုက်တိုက်ဖြစ်ပွားနေတဲ့အခြေအနေမှာ ဒရုန်း၊ လက်နက်ကြီး ရမ်းသမ်းပစ်ခတ်တိုက်ခိုက်တာတွေ လုပ်ဆောင်နေလို့ အရပ်သား သေဆုံးထိခိုက်တာတွေ နေ့စဉ်နီးပါးဖြစ်ပွားလျက်ရှိပါတယ်။
အာဏာသိမ်းစစ်တပ်က တိုက်ပွဲမရှိတဲ့နေရာတွေကို လက်နက်ကြီး ရမ်းသမ်းပစ်ခတ်တာ၊ ဒရုန်း၊ လေကြောင်း ဗုံးကြဲတာတွေလုပ်ဆောင်နေတယ်လို့ ဆိုပါတယ်။
