ကံထူးမရွာဗုံးကြဲခံရမှု သေဆုံးသူ၂ဦးထပ်တိုး၊​ သေဆုံးသူစုစု​ပေါင်း၁၀ဦးရှိလာ၊ ဒဏ်ရာပြင်းထန်ပြီး စိုးရိမ်ရသူအချို့ရှိ​

စက်တင်ဘာ-၂၇၊၂၀၂၅။မေ/People’s Spring

စစ်ကိုင်းတိုင်း၊တန့်ဆည်မြို့နယ်၊ကံထူးမရွာကို စစ်တပ်ဗုံးကြဲတာ​ကြောင့် သေဆုံးသူ​ဒေသခံနှစ်ဦးထပ်တိုးလာတဲ့အတွက် ​သေဆုံးသူ ၁၀‌‌ ဦးအထိရှိလာတယ်လို့ မြို့နယ်ပြည်သူ့လုံခြုံရေးအဖွဲ့(ပလဖ)တာဝန်ခံက​ပြောပါတယ်။

စက်တင်ဘာလ၂၆ ရက်နေ့မှာ ကံထူးမရွာ ၊နိုဘယ်ဝမ်း ဆီပန့်ဆိုင်အနီးကိုစစ်တပ်ကဗုံးကြဲမှုကြောင့်ဆိုင်ပိုင်ရှင်ရဲ့သမီးအသက်၂၀ အရွယ် မစံထိပ်ထားဝေ၊ အသက်၂၁နှစ်အရွယ်ကုန်စိမ်း​ရောင်းသူ မမိထက်၊ ကျောင်းကြိုသွားတဲ့ အသက် ၂၇ နှစ်အရွယ် ကိုသက်အောင်၊ပန်းရံလုပ်ကိုင် နေတဲ့အသက် ၂၀ ကျော်အရွယ်တွေ ဖြစ်တဲ့ကိုတူးနိုင်၊ကိုထထူး၊ကိုနေအောင်၊ကိုစိုးကို၊ အသက်၄၃နှစ်အရွယ်ကို ဖိုးထွန်းတို့ သေဆုံးခဲ့ပါတယ်။

အပျက်အစီး​တွေကြားထပ်မံရှာဖွေရာ ဆီဆိုင်ပိုင်ရှင် ကိုပြူးစိန်‌ ပျောက်ဆုံးနေပြီး သေဆုံးသွားတယ်လို့ ယူဆရကာ ဆေးကုသမှု ခံယူနေတဲ့ ကိုအောင်ကိုဝင်း လည်း စက်တင်ဘာ ၂၆ ရက်ညနေပိုင်းက ထပ်မံ သေဆုံးခဲ့တာလို့ မြို့နယ်ပလဖတာဝန်ခံ ကပြောပါတယ်။

Public Service Announcement

“ဒဏ်ရာရတဲ့အထဲက ၂ဦး၃ဦး ပြင်းထန်စိုးရိမ်ရတယ်”လို့ သူကဆက်ပြောပါတယ်။

“ဘာတိုက်ပွဲမှကိုမရှိပါဘူးဗျာ။ပန့်ဆိုင်ဘေးမှာ နှစ်ထပ်တိုက်ဆောက် နေတာ။အဲဒီကပန်းရံသမား၅ဦး သေတာ။ရုပ်အလောင်း ပြန်ရတာက ၅လောင်းပါ။ကျန်တာက အပိုင်းအစတွေ လိုက် ကောက်ထားရတာက ၃လောင်းပါ”လို့ မြို့နယ်ပလဖတာဝန်ခံက ပြောပါတယ်။

စစ်ကောင်စီက ပေါင် ၅၀၀ဗုံးနှစ်လုံး ကြဲချခဲ့တာဖြစ်ပြီး စက်တင်ဘာ ၂၇ ရက်အထိ စုစုပေါင်း ပြည်သူ ၁၀ဦး သေဆုံးကာ ၁၂ဦး ကျော်ဒဏ်ရာရထားတယ်လို့သိရပါတယ်။ဒဏ်ရာရထားတဲ့အထဲကလည်း ပြည်သူ ၃ဦးက ပြင်းဒဏ်ပြီးစိုးရိမ်​နေရဆဲဖြစ်ပါတယ်။

ကံထူးမရွာဟာ တန့်ဆည်မြို့အနီးမှာတင်ရှိပြီး ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌လူစည်းကားတဲ့ကားလမ်းဘေး ကျေးရွာဖြစ်ကာ အစည်ကားဆုံး နေရာကိုစစ်တပ်က လေကြောင်းက​နေ ဗုံးကြဲခဲ့တာလို့ ​ဒေသခံ​တွေက​ပြောပါတယ်။

စစ်အုပ်စုက ပြည်သူ​တွေကိုပစ်မှတ်ထားဗုံးကြဲသတ်ဖြတ်မှု​တွေ ပိုလုပ်လာပြီး စစ်တပ်အာဏာသိမ်းပြီး​နောက်ပိုင်း အစုလိုက်အပြုံလိုက်သတ်ဖြတ်မှု​ပေါင်းရာနဲ့ချီကျူးလွန်ထားပြီး ပြည်သူ​ထောင်ချီ​သေဆုံးခဲ့ရပြီးဖြစ်ပါတယ်။