စက်တင်ဘာ-၃၀၊၂၀၂၅။ဆဏ်း/People’s Spring
Theatre 21 (ပြဇာတ်၂၁)လို့အမည်ပေးထားတဲ့ ခြောက်ခွေမြောက် တကိုယ်တော်ခွေကို လာမယ့် အောက်တိုဘာ ၂ ရက်မှာ ဖြန့်ချိမယ်လို့ တော်လှန်အနုပညာရှင်လင်းလင်းက အသိပေးထားပါတယ်။
“အထူးသတိပြုရမှာကတော့ လွန်ခဲ့တဲ့နှစ် အောက်တိုဘာ ၂ ရက်နေ့က ဖြန့်ချိရောင်းချခဲ့တဲ့ ကျနော့်စာအုပ်လိုဘဲ ဒီalbum ရောင်းချလို့ ရတဲ့ငွေဟာ ကျနော်သုံးချင်တာသုံးမှာ ဖြစ်တဲ့အတွက် ဝယ်ချင်မှ ဝယ်ယူစေချင်ပါတယ်။” လို့ လင်းလင်းက သူ့ရဲ့ အခွေနဲ့ပတ်သက်ပြီးပြောထားပါတယ်။
Title သီချင်းဖြစ်တဲ့ ပြဇာတ် ၂၁(Theatre 21 ) သီချင်းက အာဏာသိမ်းခံရတဲ့ညမှာ ရေးခဲ့တာဖြစ်ပြီး ပါဝင်မယ့် သီချင်းအပုဒ်ရေကိုတော့ ပြောပြထားခြင်းမရှိပါဘူး။
Public Service Announcement
ဒီအခွေကသီချင်းတွေပါဝင်မယ့် Memory Stick နဲ့ အတူ အမှတ်တရ ပစ္စည်းလေးပါဝင်တဲ့ Package ကို ဒေါ်လာ ၅၀သတ်မှတ်ထားတယ်လို့ အသိပေးထားပါတယ်။
နိုင်ငံအလိုက်ဈေးနှုန်းတွေအနေနဲ့တော့ အမေရိကန် မှာ USD 50 ၊ ဩစတေးလျ မှာ AUD 70 ၊ ဂျပန်မှာ JPY 7000 ၊ ထိုင်းမှာ THB 1500 အသီးသီးသတ်မှတ်ထားပြီး ထပ်ပေါင်းDelivery ခ ပါဝင်မယ်လို့ Theatre21 ပေ့ခ်ျမှာကြေညာထားပါတယ်။ စင်ကာပူနိုင်ငံမှာတော့ Delivery ခ အပါအဝင် SGD 70 ကျသင့်မယ်လို့ ဆိုပါတယ်။
မှာယူချင်သူတွေ အနေနဲ့ Theatre21 ပေ့ခ်ျကနေ ဆက်သွယ်နိုင်သလို ဩစတေးလျ ၊ စင်ကာပူ နဲ့ ဂျပန်နိုင်ငံက မှာယူနိုင်မယ့် ဖေ့စ်ဘွတ်ခ်အကောင့်တွေကိုလည်း ပေ့ခ်ျမှာကြေညာပေးထားပါတယ်။
“သယ်ယူပို့ဆောင်ရာတွင် လမ်းကြာချိန်အခက်အခဲကြောင့်အချို့နိုင်ငံတွေမှာ အောက်တိုဘာ ၂ ရက်နေ့တွင် ရရှိနိုင်ပြီး၊ အချို့နိုင်ငံတွေကတော့ စောင့်ရမယ့်အချိန် ၁၀ရက်နဲ့ ၁၅ ရက်ဝန်းကျင် ကြာနိုင်ပါတယ်။”လို့ လင်းလင်းကပြောပါတယ်။
ဒီအခွေကို တော်လှန်ရေးရန်ပုံငွေပွဲအနေနဲ့ ပြုလုပ်တဲ့ ရောင်နီ ပွဲတွေမှာတော့ ရောင်းချသွားမှာ မဟုတ်ဘူးလို့ လင်းလင်းက အသိပေးထားပါတယ်။
ဒါ့အပြင် ပြည်တွင်းက မှာတာကို လက်ခံသွားမှာ မဟုတ်ပဲ ကိုယ့်နည်းကိုယ်ဟန်နဲ့ မှာယူ, သယ်ဆောင်တာမျိုးမလုပ်ဖို့ကိုလည်း လင်းလင်းက မေတ္တာရပ်ခံထားပါတယ်။
အောက်တိုဘာ ၂ ရက်က လင်းလင်းရဲ့ မွေးနေ့လည်း ဖြစ်ပြီး ပြီးခဲ့တဲ့ နှစ်ကလည်း သံစဉ်မကြားရသော အမတများ စာအုပ်ထွက်ရှိခဲ့ပါတယ်။
