အောက်တိုဘာ-၈၊ ၂၀၂၅။ဇော်ဝင်း/People’s Spring
မကွေးတိုင်း၊ ပွင်ဖြူမြို့နယ်ထဲက စစ်ကောင်စီတပ် စစ်ဆေးရေးဂိတ်ကို တိုက်ခိုက်ရာ စစ်သားလေးဦးသေပြီး လက်နက်နဲ့ ခဲယမ်းတွေရရှိတယ်လို့ ပွင့်ဖြူမြို့နယ်ပြည်သူ့ကာကွယ်ရေးအဖွဲ့(ပကဖ)က ထုတ်ပြန်ပါတယ်။
အောက်တိုဘာ ၄ ရက်က ပုံသိမ်-မုံရွာလမ်းပိုင်းမှာရှိတဲ့ စစ်ကောင်စီတပ်ရဲ့ မဲဇလီဆည်တော်ကြိုးတံတားစစ်ဆေးရေးဂိတ်ကို ဝင်ရောက်တိုက်ခိုက်ခဲ့တာလို့ ဆိုပါတယ်။
၁နာရီခွဲဝန်းကျင်ကြာတဲ့တိုက်ပွဲမှာ စစ်ကောင်စီတပ်သား အလောင်းလေးလောင်းနဲ့ လက်နက်ခဲယမ်းတွေကို သိမ်းဆည်းရရှိတယ်လို့ ဖော်ပြပါတယ်။
Public Service Announcement
ပွင့်ဖြူ ပကဖ ၊မင်းဘူးခရိုင် ပကဖ၊မင်းဘူးခရိုင် တပ်ရင်း(၇)နဲ့ တပ်ရင်း(၄)တို့ ပူးပေါင်း တိုက်ခိုက်ခဲ့တာလို့ အသိပေးပါတယ်။
“စခတွေချည်းပဲ ၁၀ ယောက်ကျော်လောက်ရှိမယ်။ထွက်ပြေးသွားနိုင်တာလည်းရှိတယ်”လို့ မင်းဘူခရိုင် အမှတ်(၇)တပ်ရင်း ရဲဘော်တဦးက တိုက်ခိုက်ခဲ့တဲ့ စစ်ဆေးရေးဂိတ်နဲ့ပတ်သက်ပြီး လူထုနွေဦးကို ပြောပါတယ်။
လက်ရှိမှာ ပုံသိမ်-မုံရွာလမ်းပိုင်းက မဲဇလီဆည်တော်ကြိုးတံတားကို အသုံးမပြုသေးဖို့ ပွင့်ဖြူ ပကဖ က တိုက်တွန်းထားပါတယ်။
စစ်ဆေးရေးဂိတ်တိုက်ခိုက်ခံရပြီးတဲ့နောက် စစ်ကောင်စီတပ်က ပွင့်ဖြူမြို့နယ်ထဲ လေကြောင်းကနေ ဗုံးကြဲတာ ဒီကနေ့ (အောက်တိုဘာ ၈ရက်)အထိရှိနေတယ်လို့ သိရပါတယ်။
“မနေ့ကဆို ပိုဆိုးတယ်။ဂျက်လေယာဥ်တွေနဲ့ကို ဗုံး ၁၀ကြိမ်လောက်ကြဲတာ။တိုက်ပွဲလည်း ဖြစ်နေတယ်။ဆင်လူးဘက်ကနေ အင်အား ၁၀၀ ကျော်ကျော်နဲ့ ထိုးစစ်ဆင်နေတာ”လို့ ဒေသတွင်းသတင်းရင်းမြစ်က ပြောပါတယ်။
ပြီးခဲ့တဲ့ စက်တင်ဘာ ၄ ရက်ကနေ ၆ ရက်အထိ ပွင့်ဖြူမြို့နယ်ထဲမှာ စစ်ကောင်စီတပ်စစ်ကြောင်း ထိုးခဲ့ပြီး သေဆုံးသူတွေများတာကြောင့် မင်းဘူး(စကု)ဘက်သို့ တပ်ပြန်ဆုတ်သွားရတယ်လို့ ပွင့်ဖြူ ပကဖ က အသိပေးထားပါတယ်။
