အောက်တိုဘာ-၂၈၊ ၂၀၂၅။ဇေအောင်/People’s Spring
စစ်ကိုင်းတိုင်း၊ မုံရွာမြို့ပေါ်မှာ စစ်ကောင်စီတပ်ယာဥ်နဲ့ တော်လှန်ရေးတပ်ဖွဲ့တွေ အပြန်အလှန် ပစ်ခတ်မှုဖြစ်ပွားပြီး စစ်အုပ်စုဝင် ၂ ဦးသေဆုံးကြောင်း မုံရွာခရိုင် ပြည်သူ့ကာကွယ်ရေးတပ်မတော်တပ်ရင်း (၄)ရဲ့ ပြန်ကြားရေးတာဝန်ခံက ပြောပါတယ်။
မနေ့က အောက်တိုဘာ ၂၇ ရက် နေ့လယ် ၁၂နာရီခန့်က မုံရွာမြို့ပေါ်တနေရာကို သွားတဲ့ တော်လှန်ရေးအဖွဲ့တွေရဲ့နောက်ကို စစ်အုပ်စုက လိုက်လံပစ်ခတ်ရာကနေ အပြန်အလှန်ပစ်ခတ်မှု ဖြစ်ပွားခဲ့ခြင်းဖြစ်ကြောင်း မုံရွာခရိုင်တပ်ရင်း (၄)ရဲ့ ပြန်ကြားရေးတာဝန်ခံက ပြောပါတယ်။
“မစ်ရှင်သွားတာ။ လမ်းတွေ နောက်ကနေ ကား (၃)စီး လိုက်လာတယ်။ ကျနော်တို့ စပစ်တယ်။ ၃ မိနစ်လောက်ကြာတယ်။ ကားမှန်တွေပစ်တယ်။ ရှေ့ကကောင် (၂) သေတယ်။ ပစ်ခံရတဲ့ကား က အမှတ်(၂)ရဲစခန်းမှူးကားပါ။”လို့ အထက်ပါတာဝန်ခံက ပြောပါတယ်။
Public Service Announcement
စစ်ကောင်စီဘက်က ထိခိုက်သေဆုံးမှုကိုတော့ လူထုနွေဦးက သီးခြားအတည်ပြုနိုင်တာ မရှိသေးပါဘူး။
အဲဒီတိုက်ခိုက်မှုမှာ မုံရွာခရိုင်ပြည်သူ့ကာကွယ်ရေးတပ်မတော်တပ်ရင်း (၄) Monywa The Boys ၊ မုံရွာခရိုင် ပြည်သူ့ကာကွယ်ရေးတပ်မတော် တပ်ရင်း (၄) တပ်ခွဲ (၂) 5/ Commando Force ၊ မုံရွာခရိုင်တပ်ရင်း (၂၈) တပ်ခွဲ (၃) Spring Dove တို့ပူးပေါင်းတိုက်ခိုက်ခဲ့တယ်လို့ သိရပါတယ်။
မုံရွာမြို့နယ်မှာ စစ်ကောင်စီတပ်နဲ့ ကာကွယ်ရေးတပ်ဖွဲ့တွေ တိုက်ပွဲအချို့ ဖြစ်ပွားနေပြီး စစ်ကောင်စီတပ်က မုံရွာ-အရာတော်လမ်းပိုင်းကို စိုးမိုးဖို့ ကြိုးစားနေတယ်လို့ ဒေသခံတွေက ပြောပါတယ်။
