အောက်တိုဘာ-၃၀၊ ၂၀၂၅။ ထားမြတ်/People’s Spring
မန္တလေးတိုင်းအတွင်းရှိ နယ်မြေတွေရဲ့ တော်လှန်ရေးဆိုင်ရာ လုပ်ငန်းတွေမှာ အားအင်အပြည့်နဲ့ ကြိုးစားဆောင်ရွက်နေလျှက် ရှိနေကြောင်း ပြည်သူ့ကာကွယ်ရေးတပ်မတော်၊ TRI ဗျူဟာက ဒီနေ့ ထုတ်ပြန်ကြေညာခဲ့ပြီး ရည်မှန်းချက်ရောက်အောင် တိုက်ပွဲဝင်သွားမယ်လို့ အသိပေးပါတယ်။
တအာင်းတပ်မတော်(TNLA)က မန္တလေးတိုင်း မိုးကုတ်မြို့နဲ့ ရှမ်းမြောက် မိုးမိတ်မြို့တို့ကနေ ဆုတ်ခွာဖို့ စစ်ကောင်စီနဲ့ သဘောတူ အပစ်ရပ်စဲကြောင်း ကြေညာခဲ့ပြီးနောက် မန္တလေး PDF၊ မိုးကုတ်ဗျူဟာတို့က ထိန်းချုပ်နယ်မြေတွေ ကာကွယ်သွားမယ့်အကြောင်းကြေညာခဲ့သလို စဉ့်ကူး၊ သပိတ်ကျင်း နယ်မြေခံ အများစု အပါအဝင် အင်အားများစွာနဲ့ စုဖွဲ့ထားတဲ့ TRI ဗျူဟာကလည်း တပ်ဖွဲ့ရဲ့ သဘောထားကို အခုလို ကြေညာခဲ့တာပါ။
“အကြောင်းအရင်းကတော့ မန္တလေးတိုင်းဒေသတွင်း နယ်မြေများကို ဆက်လက် ကာကွယ်မယ့်ကိစ္စပါပဲ။ ဆက်ပြီး ကိုယ့်အလုပ်ကို ဆက်လုပ်ကြဖို့။ ပင်ပန်းတဲ့သူကို အလှည့်ပေးဖို့” လို့ TRI ဗျူဟာ တာဝန်ရှိသူက ကြေညာချက်ထုတ်ပြန်ရတဲ့ အကြောင်းအရင်းကို ရှင်းပြပါတယ်။
Public Service Announcement
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ မန္တလေးတိုင်းစစ်ဌာန ကွပ်ကဲမှုအောက်ရှိ ဗျူဟာဖြစ်တာနဲ့အညီ မန္တလေးတိုင်းအတွင်းရှိ နယ်မြေတွေရဲ့ တော်လှန်ရေးဆိုင်ရာ လုပ်ငန်းတွေမှာ အားအင်အပြည့်နဲ့ ကြိုးစားဆောင်ရွက်နေလျှက်ရှိနေပြီး မိတ်ဖက်တော်လှန်ရေးအင်အားစုတွေနဲ့ တွဲဖက်ကာ မိမိတို့မွေးဖွားအခြေတည်ရာ ဒေသတွေကို ကာကွယ်မယ်လို့ အသိပေးထုတ်ပြန်ပါတယ်။
အဲဒီ ကာကွယ်ပြီး ရည်မှန်းချက်ဖြစ်တဲ့ ဖက်ဒရယ်ဒီမိုကရေစီ စနစ်ဆီသို့ အခက်ခဲများစွာကြားမှ ဆက်လက်ချီတက် တိုက်ပွဲဝင်သွားမယ်လို့ ကတိသစ္စာပြုကြောင်း TRI ဗျူဟာက ထုတ်ပြန်ကြေညာပါတယ်။
