နိုဝင်ဘာ-၁၀၊ ၂၀၂၅။ဇေအောင်/People’s Spring
စစ်ကိုင်းတိုင်း၊ မုံရွာမြို့နယ်မြောက်ဘက်ခြမ်းမှာ စစ်ကောင်စီတပ်က စစ်ကြောင်းထိုးပြီး ပါရာမိုတာနဲ့ ဗုံးကြဲတိုက်ခိုက်သွားလို့ ပြည်သူထိခိုက်မှုရှိကြောင်း ဒေသခံတွေက ပြောပါတယ်။
ဒီကနေ့ နိုဝင်ဘာ ၁၀ ရက်မနက်ပိုင်းက မုံရွာမြို့နယ်၊ သာစည်ထောင်ရွာမှ ထွက်လာတဲ့စစ်ကြောင်းဟာ မုံရွာမြို့နယ်မြောက်ခြမ်းက ကျေးရွာတွေကို နယ်မြေရှင်းလင်းစစ်ကြောင်းထိုးခဲ့ကြောင်း ဒေသခံတွေက ပြောပါတယ်။
ဒါ့အပြင် မုံရွာအနောက်မြောက်တိုင်း စစ်ဌာနချုပ်(နမခ)ကနေ တက်လာတဲ့ ပါရာမိုတာ စက်တပ်လေထီးဟာ မုံရွာမြို့နယ် ထန်းပင်လှရွာ အနီးနဲ့ ကံပြားရွာအနီးမှာ ဗုံးကြဲတိုက်ခိုက်သွားတယ်လို့ မုံရွာမြို့နယ် သတင်းမှန်ပြန်ကြားရေးအဖွဲ့က ပြောပါတယ်။
Public Service Announcement
“ပါရာက သုံးနေရာကြဲတာ။ တနေရာတော့ စစ်ရှောင်တယောက် ထိတယ်ကြားတယ်။”လို့ ဒေသခံတဦးက ပြောပါတယ်။
ထိခိုက်မှု အခြေအနေကိုတော့ အသေးစိတ်မသိရသေးပါဘူး။
ဒါ့အပြင် အမတ(၅၀၈)အမြောက်တပ်ရင်းကနေလည်း မြောက်ပိုင်းက ကျေးရွာတွေကို လက်နက်ကြီးတွေနဲ့ ပစ်ခတ်ခဲ့တယ်လို့ ဒေသခံတွေက ပြောပါတယ်။
နိုဝင်ဘာ ၇ ရက်ကလည်း မုံရွာမြို့နယ်၊ မုံရွာ-မန္တလေးလမ်းတနေရာမှာ ဆိုင်ကယ်စီးလာတဲ့ အမျိုးသား ၄ဦးကို စစ်တပ်က အိမ်စီးကားနဲ့ လိုက်လံပစ်ခတ်ခဲ့ပြီး ၃ဦးသေဆုံးခဲ့ပါသေးတယ်။
