နိုဝင်ဘာ-၂၅၊၂၀၂၅။အိမ်သွင်/People’s Spring
တိုက်လေယာဉ်နဲ့ ဗုံးကြဲတဲ့ လေယာဥ်မှူးတွေ ပင်ပန်းနေပြီး အကြိမ်ရေလျှော့ ပျံသန်းဖို့တင်ပြတဲ့ စစ်ဦးစီးအရာရှိချုပ်(လေ) ဒုတိယဗိုလ်ချုပ်ကြီးဇော်ဝင်းမြင့်ကို အာဏာသိမ်းစစ်တပ်က အနားပေးလိုက်ပါတယ်။
ဒုတိယဗိုလ်ချုပ်ကြီးဇော်ဝင်းမြင့်ကို နိုဝင်ဘာလ၂၃ရက်နေ့မှာ ရာထူးကနေအနားပေးလိုက်ပြီး နိုင်ငံခြားရေးဝန်ကြီးဌာနကို ရွှေ့ပြောင်းလိုက်တယ်လို့ နေပြည်တော်သတင်းရင်းမြစ်ကပြောပါတယ်။
စစ်ဦးစီးအရာရှိချုပ်(လေ)နေရာကို အနောက်ပိုင်းလေတပ်ကွပ်ကဲမှုဌာနချုပ်မှူး ဗိုလ်ချုပ်ထွန်းဝင်းကို အစားထိုးခန့်အပ်လိုက်တယ်လို့ သိရပါတယ်။
Public Service Announcement
“ ပိုင်းလော့(လေယာဥ်မှူး)တွေလည်း မောင်းသာမောင်းနေရပေမယ့်စစ်ရာဇဝတ်မှုတွေနဲ့ တချိန်မှာပြန်ပြီးအရေးယူခံရမှာကြောက်နေကြတယ်။နောက်ပြီးနေ့တိုင်း ရောက်ပြန်မောင်းခိုင်းနေတော့ မဖြစ်သင့်တဲ့အကြောင်း ကာကွယ်ရေးဦးစီးချုပ်(လေ)ကို တင်ပြတာ။နောက်နေ့ ပြုတ်တာပဲ” လို့နေပြည်တော်သတင်းရင်းမြစ်ကလူထုနွေဦးကိုပြောပါတယ်။
စစ်အုပ်စုဟာလေကြောင်းတိုက်ခိုက်မှုတွေကြောင့် ငွေကြေးလိုအပ်ချက်တွေရှိနေပြီးနောက်ပိုင်းမှာ တိုက်လေယာဉ်အပြင်ပါရာမော်တာတွေ၊ ဒရုန်းတွေပိုအသုံးပြုတိုက်ခိုက်လာပါတယ်။အဲ့ဒီလိုဖိအားတွေရှိနေချိန်မှာလေကြောင်းပျံသန်းမှုအပေါ် ဝေဖန်တယ်လို့ဆိုပြီးကာကွယ်ရေးဦးစီးချုပ်(လေ) ဗိုလ်ချုပ်ကြီး ထွန်းအောင်က အလျင်အမြန်ဆုံးဖြတ်ချက်ချအရေးယူတာဖြစ်တယ်လို့ လေတပ်အငြိမ်းစားအရာရှိတစ်ဦးကပြောပါတယ်။
စစ်ဦးစီးအရာရှိချုပ်(လေ)ဟာကာကွယ်ရေးဦးစီးချုပ်(လေ)ပြီးရင် ဒုတိယအာဏာအရှိဆုံးပုဂ္ဂိုလ်ဖြစ်ပါတယ်။
“ စစ်ကောင်စီတပ်ရဲ့ထိပ်ပိုင်းမှာ အချင်းချင်းမကြေလည်မှုတွေရှိနေတဲ့ပြဿနာကိုမြင်ရတယ်” လို့ စစ်ဖက်ဆိုင်ရာနဲ့နိုင်ငံရေးလေ့လာသူတစ်ဦးကပြောပါတယ်။
စစ်အုပ်စုဟာ နိုင်ငံတော်အာဏာကိုသိမ်းယူပြီးချိန်ကနေပြီးခဲ့တဲ့အောက်တိုဘာလကုန်ထိလေကြောင်းတိုက်ခိုက်မှု ၃၉၉၉ ကြိမ် ကျူးလွန်ခဲ့ပြီး ပြည်သူ၄,၃၂၂ဦးသေဆုံးခဲ့တယ်လို့ အမျိုးသားညီညွတ်ရေးအစိုးရ၊လူ့အခွင့်အရေးဆိုင်ရာဝန်ကြီးဌာနက ပြီးခဲ့တဲ့ နိုဝင်ဘာလ၃ရက်နေ့မှာထုတ်ပြန်ထားပါတယ်။
လက်ရှိနိုဝင်ဘာလထဲမှာလည်း ရခိုင် နဲ့ ကချင်ပြည်နယ်၊မကွေးတိုင်း၊ စစ်ကိုင်းတိုင်း၊ မန္တလေးတိုင်း၊ ပဲခူးတိုင်းနဲ့ ဧရာဝတီတိုင်းတွေမှာ စစ်တပ်ကလေကြောင်းတိုက်ခိုက်မှုတွေပြုလုပ်နေပါတယ်။ လူထုကိုပစ်မှတ်ထားပြီးသတ်ဖြတ်နေတဲ့ စစ်ရာဇဝတ်မှု သက်သေတွေစုဆောင်းနေပြီး နောင်တချိန်မှာပြစ်ဒဏ်ပေးနိုင်ဖို့ကြိုးပမ်းနေတယ်လို့ အမျိုးသားညီညွတ်ရေး အစိုးရကထုတ်ပြန်ထားပါတယ်။
ဒါ့အပြင်စစ်တပ်လေကြောင်းတိုက်ခိုက်မှုတွေကိုအချက်အလက်စုဆောင်းဖော်ပြနေတဲ့ ဥာဏ်လင်းသစ်သုတေသနအဖွဲ့ရဲ့ အချက်အလက်တွေအရ စစ်တပ်က အာဏာသိမ်းပြီးနောက်ပိုင်း၂၀၂၁ ဖေဖော်ဝါရီလကနေ ၂၀၂၅ စက်တင်ဘာလကုန်အထိ လေကြောင်းတိုက်ခိုက်မှုပေါင်း ၆၀၀၀ ကျော်ပြုလုပ်ခဲ့ပြီး ပြည်သူ ၅၀၀၀ ကျော်သေဆုံးခဲ့တယ်လို့ဖော်ပြထားပါတယ် ။ဒါကစစ်တပ်အာဏာသိမ်းပြီးနောက်ပိုင်းပျမ်းမျှတစ်ရက်ကို သုံးကြိမ်ခွဲဗုံးကြဲနေပြီးတစ်ရက်ကိုပျမ်းမျှပြည်သူ ၃ ဦးနေ့စဥ်သေဆုံးနေရတာဖြစ်ပါတယ်။ စစ်တပ်က ကိုယ့်ပြည်သူတွေကို နေ့စဥ်နီးပါးဗုံးကြဲသတ်ဖြတ်နေတာ အခုလောက်ပမာဏ အများအပြားဟာ မြန်မာ့သမိုင်းမှာဘယ်တုန်းကမှ မရှိခဲ့ပါဘူး။
လေကြောင်းတိုက်ခိုက်မှုတွေမှာ ကလေးတွေနဲ့အရပ်သားပြည်သူတွေသေဆုံးမှုတွေများပြားနေလို့ လေယာဉ်မောင်းပိုင်း လော့တွေရဲ့ ကိုယ်ရေးအချက်အလက်တွေကိုလည်း တော်လှန်ရေးအင်အားစုတွေကစုဆောင်းနေကြပါတယ်။ ဒါကြောင့် လေယာဥ်မောင်းတွေဟာကြောက်လန့်နေပြီး စိတ်ဖိစီးမှုတွေရှိနေတယ်လို့လည်း စစ်ကောင်စီနဲ့ နီးစပ်တဲ့သူတွေကပြောဆိုနေကြပါတယ်။
