ဒီဇင်ဘာ-၁၄၊၂၀၂၅။ဆဏ်း/People’s Spring
လာမယ့်နှစ်ဖေဖော်ဝါရီမှာကျင်းပမယ့် အကယ်ဒမီဆုပေးပွဲ မတိုင်ခင် စစ်တပ်ထိန်းချုပ်ထားတဲ့ရုပ်ရှင်အစည်းအရုံး ဥက္ကဌ နေရာကို ရွေးကောက်ပွဲလုပ်ဖို့စီစဥ်ရာ စစ်တပ်ကိုထောက်ခံတဲ့ ခန့်စည်သူ နဲ့ ရန်အောင် တို့က ဝင်အရွေးခံဖို့ရှိတယ်လို့ ရုပ်ရှင်အသိုင်းအဝိုင်းက သတင်းအရင်းအမြစ်အချို့ကပြောပါတယ်။
လက်ရှိမှာရုပ်ရှင်အစည်းအရုံးဥက္ကဌနေရာကို ဒါရိုက်တာ ကြည်စိုးထွန်းက တာဝန်ယူနေတာပါ။
အာဏာသိမ်းပြီးချိန်မှာ ခန့်စည်သူက ဥက္ကဌတာဝန်ယူခဲ့ပေမယ့် ပြည်သူတွေရဲ့ဝေဖန်မှု နဲ့ လူမှုရေးပြစ်ဒဏ်ခတ်မှုတွေကြောင့် နှုတ်ထွက်သွားတာလို့ သိရပါတယ်။
Public Service Announcement
“ အဏာသိမ်းစ ၂၀၂၁ မှာ ရုပ်ရှင်အစည်းအရုံး ဥက္ကဌလုပ်ခဲ့တဲ့ ခန့်စည်သူဟာ ပြည်သူလူထုကန့်ကွက်ခဲ့တဲ့အတွက် တစ်ပါတ်ပဲကြာပြီး ဆင်းပြေးခဲ့ရတာ ။ဒီတစ်ခေါက် ကြူကြူလှ Blessing ကြောင့်၊ အကယ်ဒမီများရှင် ပြန်ဝန် အကယ်ဒမီမောင်မောင်အုန်းကဝန်းရံတဲ့အတွက် ခန့်စည်သူက ပြန်လည်ဝင်ရောက်နိုင်ခဲ့တာ” လို့ ရုပ်ရှင်လောကသားတဦးကပြောပါတယ်။
အာဏာသိမ်းခေါင်းဆောင် မင်းအောင်လှိုင်ရဲ့ ဇနီးဒေါ်ကြူကြူလှရဲ့ ကောင်းချီပေးမှုဆိုတာ စစ်တပ်ထောက်ခံတဲ့သရုပ်ဆောင် ခန့်စည်သူဟာ အခုနောက်ပိုင်း ဒေါ်ကြူကြူလှနဲ့ ပုဂ္ဂိုလ်ရေး အလွန်ရင်းနှီး နေတာကို အထက်ပါသတင်းရင်းမြစ်ကရည်ညွှန်းပြောတာဖြစ်ပါတယ်။
အလားတူ အကယ်ဒမီများရှင် မောင်မောင်အုန်းဆိုတာ စစ်တပ်ပြန်ကြားရေးဝန်ကြီးဖြစ်ပြီး အကယ်ဒမီဆု ဘယ်သူ့ပေးမယ်ဆိုတာ သူကပဲဆုံးဖြတ်နေတာမို့ ရုပ်ရှင်လောကသားတွေက သူ့ကို အကယ်ဒမီများရှင်မောင်မောင်အုန်းလို့ အမည်ပြောင်ပေးထားကြတာဖြစ်ပါတယ်။
ဒါကြောင့် ဒေါ်ကြူကြူလှရော ၊ မောင်မောင်အုန်းကပါ ရုပ်ရှင်အစည်းအရုံးသစ် အဖြစ် ခန့်စည်သူကို သဘောကျနေတဲ့အခြေအနေဖြစ်ပါတယ်။
ရန်အောင် နဲ့ ခန့်စည်သူတို့ဟာ စစ်တပ်အာဏာသိမ်းပြီးနောက်ပိုင်း စစ်တပ်ဝါဒဖြန့်ဇာတ်ကားတွေ မှာတတ်တတ်ကြွကြွ ပါဝင်ပေးခဲ့သူတွေဖြစ်သလို၊ စစ်ခေါင်းဆောင်ရဲ့ ပြည်ပခရီးကြိုဆိုရေးတွေမှာလည်းရှေ့ဆုံးကကြိုဆိုလေ့ရှိသူတွေဖြစ်ကြပါတယ်။
ရန်အောင် ဟာ စစ်တပ်ဝါဒဖြန့်ဇာတ်ကား စောင်နီလေးတစ်ထည် နဲ့ စစ်ကောင်စီပေးတဲ့ အကယ်ဒမီရရှိခဲ့ပါသေးတယ်။
ခန့်စည်သူလည်း သက်ရှိစည်းရိုးဆိုတဲ့ စစ်တပ်ဝါဒဖြန့်ကား ရိုက်ခဲ့ပါသေးတယ် ။ဒါပေမယ့်အကယ်ဒမီမရခဲ့သလို သူတို့ရိုက်ကူးထားတဲ့ ဇာတ်ကားထဲက စခန်းကိုလည်း ပြည်သူ့ကာကွယ်ရေးအဖွဲ့တွေက ဒီနှစ်ထဲမှာ တိုက်ခိုက်သိမ်းပိုက်နိုင်ခဲ့ပါတယ်။
အာဏာသိမ်းစစ်တပ်လက်ထက် ကျင်းပတဲ့ အကယ်ဒမီပေးပွဲတွေဟာ စစ်တပ်ထောက်ခံတဲ့ အနုပညာရှင်တွေထဲပဲရွေးချယ်ပေးအပ်နေတာဖြစ်ပါတယ် ။အကယ်ဒမီဆုရွေးချယ်ရာမှာ ပြန်ကြားရေးဝန်ကြီးမောင်မောင်အုန်း စိတ်ကြိုက်ရွေးလေ့ရှိတယ်လို့ သိရပါတယ်။
“ အကယ်ဒမီ ပေးပွဲကလည်း ခေတ်အဆက်အဆက်အဆိုးဆုံး အခြေအနေရောက်နေတယ်။စစ်တပ်နဲ့ စစ်တပ်စိတ်ကြိုက် လုပ်ပေးမဲ့သူများကိုသာ မောင်မောင်အုန်းစိတ်ကြိုက် ရွေးချယ်ပြီး အကယ်ဒမီ ပေးမှာဖြစ်တဲ့အတွက်၊ အစည်းအရုံးမှာပြန်ဝန်မောင်မောင်အုန်းကို အကယ်ဒမီများရှင် အကယ်ဒမီ မောင်မောင်အုန်း လို့ အမည်ဝှက်နဲ့ ခေါ်နေကြတယ်” လို့ ရုပ်ရှင်လောကသားတဦးကပြောပါတယ်။
စစ်တပ်စိတ်တိုင်းကျ ဝါဒဖြန့်ချီရေးတွေမှာ ပါဝင်လုပ်ကိုင်ပေးနေတဲ့ ရုပ်ရှင်အစည်းအစည်း ဥက္ကဌရာထူးဟာ အာဏာသိမ်းစစ်တပ်လက်ထက်မှာ စီးပွားရေးဂွင်များစွားရရှိပြီး ငွေရှာလို့ကောင်းတဲ့အတွက် စစ်တပ်နဲ့ နီးစပ်တဲ့အနုပညာရှင်တွေက မက်မောကြတဲ့ရာထူးဖြစ်ပါတယ်။
“ ဒါရိုက်တာကြည်စိုးထွန်းက ဥက္ကဌကြည်စိုးထွန်း ရဲ့ သား ချမ်းသာကြည်စိုးက အတွင်းရေးမှုးလုပ်ပြီးပြန်ကြားရေးအလိုကျလုပ်နေကြတာ။ ဌာနဆိုင်ရာတွေ့မယ်ဆိုရင် သူတို့ပဲ လူကြီးတွေနဲ့ တွေ့ ၊ကားပါမစ်တွေရတာ။ ရုပ်ရှင်အစည်းအရုံးကို ဗန်းပြပြီး အစည်းအရုံးနဲ့ ဌာနဆိုင်ရာကြား ကြားပွဲစားလုပ်နေကြတာ” လို့ ရုပ်ရှင်လောကသားတဦးကပြောပါတယ်။
ကြည်စိုးထွန်း နဲ့ သားဖြစ်သူ ချမ်းသာကြည်စိုးတို့သားအဖ ဟာ နိုဝင်ဘာလကုန်ပိုင်းကနေ ဒီဇင်ဘာလဆန်းအထိ့တရုတ်နိုင်ငံမှာလုပ်ခဲ့တဲ့ လျန်ချန်းမဲခေါင် အပြည်ပြည်ဆိုင်ရာ ရုပ်ရှင် ရက်သတ္တပါတ်ပွဲတော်ကိုသွားခဲ့ကြပါသေးတယ်။သူတို့သားအဖနဲ့အတူ ပြတ်ကြားရေးညွန်ကြားရေးမှူးချုပ် ဦးအေးကြွယ် ၊ဒါရိုက်တာမီးပွား၊ဟာသသရုပ်ဆောင် ဒိန်းဒေါင်၊ထုတ်လုပ်သူ ဦးဇော်မင်းတို့နဲ့အတူသွားခဲ့ကြပါသေးတယ်။
ဒါ့အပြင် ရုပ်ရှင်အစည်းအရုံးလက်အောက်မှာရှိတဲ့ တိုင်းနဲ့ပြည်နယ်ဗီဒီယိုအခြေခံအဖွဲ့ တွေ ရုံးဖွင့်ဖို့ထားတဲ့ မြေကွက်တွေကိုလည်း စစ်တပ်အာဏာသိမ်းပြီးနောက်ပိုင်း သက်ဆိုင်ရာတိုင်းနဲ့ပြည်နယ်အဖွဲ့တွေက ပြန်လည်ရောင်းစားနေတာတယ်လို့ စုံစမ်းသိရပါတယ်။
“ ဉပမာ အနေနဲ့ သိန်းတစ်ထောင်တန်တဲ့ နေရာကို သိန်းတစ်ရာ နဲ့အရောင်းပြပြီး ကျန်တဲ့ သိန်း၉၀၀ ကိုအိပ်ကပ်ထဲ ထည့်နေပြီး အချင်းချင်းခွက်ခုတ်နေတယ်” လို့ သတင်းရင်းမြစ်ကဆိုပါတယ်။
