ဒီဇင်ဘာ-၁၇၊၂၀၂၅၊မိုမို/People’s Spring
နေအိမ်ပေါ်တက်ပြီး စစ်ကောင်စီတပ်ပေါ်တာဆွဲဖမ်းဆီးခဲ့တဲ့ စစ်မှုထမ်းတပ်သားနှစ်ဦး လက်နက်တွေနဲ့ထွက်ပြေးလွတ်မြောက်လာတယ်လို့ လောင်းလုံးသံမဏိလိပ်ပြာတပ်ဖွဲ့ တာဝန်ရှိသူက လူထုနွေဦးကို ပြောပါတယ်။
ထားဝယ်အခြေစိုက် ခလရ(၂၆၇)တပ်ရင်းက တပ်သားနှစ်ဦးကို အခုဒီဇင်ဘာ ၁၃ရက် ညပိုင်းက ကယ်ထုတ်ခဲ့ပြီး ဆုငွေပါချီးမြှင့်ခဲ့တယ်လို့ ဆိုပါတယ်။
“တစ်ယောက်က ရန်ကုန်သား၊နောက်တစ်ယောက်က ဧရာဝတီတိုင်းက။အသက်တွေက ၁၈ နှစ် နဲ့ ၂၉ နှစ်အရွယ်တွေ “လို့ အထက်ပါတာဝန်ရှိသူက လွတ်မြောက်လာတဲ့ စစ်မှုထမ်းတပ်သားနှစ်ဦးအကြောင်းရှင်းပြပါတယ်။
Public Service Announcement
သူတို့တွေဟာ စစ်မှုထမ်းအပတ်စဥ် (၁၆)ကဖြစ်ပြီး လောင်းလုံးမြို့နယ်ကို စစ်ကောင်စီတပ်ရဲ့ စစ်ကြောင်း နဲ့အတူ ရောက်ရှိလာခဲ့တာလို့ သိရပါတယ်။
အလင်းဝင်လာချိန်မှာ MA 1 နှစ်လက် ၊ကျည်ဘောက် နှစ်ခု၊ ကျည် ငါးဆယ်သယ်လာခဲ့တယ်လို့ အသိပေးပါတယ်။
ဆုကြေးငွေအဖြစ် ကျပ် သိန်း ၃၀ပေးခဲ့ပြီးလုံခြုံစိတ်ချရတဲ့နေရာကိုပါ ပို့ဆောင်ထားတယ်လို့လည်း လောင်းလုံးသံမဏိလိပ်ပြာတပ်ဖွဲ့က ထုတ်ပြန်ထားပါတယ်။
တော်လှန်ရေးနဲ့စစ်ရေးအရှိန်မြင့်လာတာနဲ့အမျှ ပြည်သူ့ဘက် အမြန်ဆုံးကူးပြောင်းကြဖို့လည်း စစ်ကောင်စီတပ်သားတွေကို ထုတ်ပြန်ချက်မှာ တိုက်တွန်းထားပါတယ်။
အခုနှစ် အောက်တိုဘာက လောင်းလုံးမြို့နယ်က မောင်းမကန်စခန်းကို တော်လှန်ရေးအင်အားစုတွေ သိမ်းခဲ့တဲ့နောက် စစ်ကောင်စီတပ်က မြို့နယ်တွင်း စစ်ကြောင်းထိုးတာနဲ့ လေကြောင်းတိုက်ခိုက်မှုတွေ ဆက်တိုက်လုပ်နေတယ်လို့ သိရပါတယ်။
