ရွှေဘိုမှာ စစ်တပ်က လူငယ်အများအပြားပေါ်တာဆွဲဖမ်းဆီးပြီး လေ့ကျင့်ရေးတပ်ပို့

ဒီဇင်ဘာ-၂၄၊၂၀၂၅။အလင်္ကာ/People’s Spring

စစ်ကိုင်းတိုင်း၊ရွှေဘိုမြို့မှာ စစ်ကောင်စီတပ်က လူငယ်အများအပြားကို ပေါ်တာဆွဲဖမ်းဆီးပြီး အမှတ်(၈)လေ့ကျင့်ရေးတပ် ပို့ဆောင်လိုက်တယ်လို့ အဖမ်းခံရသူတွေရဲ့ မိသားစုဝင်တွေက ပြောပါတယ်။

ဒီဇင်ဘာ ၁၀ ရက်မှာ စစ်ကောင်စီတပ်လှည့်ကင်းက ရွှေဘိုမြို့ ဘူတာရပ်ကွက်က အသက်(၃၀) အရွယ် ကိုကျော်ဇေယျအပါဝင် ထမင်းဆိုင်မှာရှိနေတဲ့ လူငယ် ၅ ဦးအပြင် ဘူတာရပ်ကွက်၊ပြည်တော်သာရပ်ကွက်၊ချီပါစုရပ်ကွက်နဲ့ အောင်ချမ်းသာရပ်ကွက်က လူငယ်တွေကို ဖမ်းဆီးခေါ်ဆောင်ပြီး အမှတ် (၈)လေ့ကျင့်ရေးတပ် ပို့ဆောင်လိုက်တယ်လို့ သိရပါတယ်။

” ဖမ်းတာမဟုက်ဘူး။ စစ်မှုထမ်းဖို့ခေါ်တာ ပြန်ခေါ်လို့မရဘူး။ ငွေနဲ့ ညှိလည်းရမှာမဟုက်ဘူး။ ငွေပေးတဲ့သူကိုပါ စစ်မှုထမ်းဥပဒေနဲ့ဖမ်းမှာလို့ပြောတယ်။ တွေ့ခွင့်ကလည်း ကြာကြာမပေးဘူး။ အမေစိတ်မပူနဲ့လို့ပြောပြီးပြန်ခေါ်သွားတာ။ အခုချိန်ထိ ဘာအဆက်သွယ်မှမရတော့ဘူး”လို့ ပေါ်တာဆွဲဖမ်းဆီးခံရသူ ကိုကျော်ဇေယျရဲ့ မိတ်ဆွေတစ်ဦးက ပြောပါတယ်။

Public Service Announcement

ရွှေဘိုမြို့နယ်၊ ဆိပ်ခွန်ကျေးရွာရှိ စစ်ကောင်စီတပ် အထိုင်စခန်းက ရဲနဲ့ စစ်သားတွေက ကွင်းလမ်းမှ ကွင်းမောင်းလာတဲ့ ကုန်ကားတစ်စီးကို တားဆီးစစ်ဆေးပြီး ကားပေါ်ပါ အမျိုးသား ၂ ဦးကို စစ်မှုထမ်းဖို့ ဖမ်းဆီးခေါ်ဆောင်သွားတယ်လို့ သိရပါတယ်။

ဒီဇင်ဘာ ၂၀ ရက် ညနေ ၃ နာရီခန့်မှာ ရွှေဘိုမြို့ဘက်က မောင်းလာတဲ့ကုန်ကားကို ဆိပ်ခွန်ရွာအနီးမှာ တားဆီးခဲ့တာလို့ ဆိုပါတယ်။

“ကွင်းလမ်းကိုသူတို့က အရင်ရောက်တာ ခနနေမှကားရောက်လာတာ။ စစ်သား၃ယောက်က ကင်းပုန်းဝတ်နေပြီး ၃ယောက်က ကားပေါ်က လူ၂ယောက်ကိုဆွဲချဖမ်းဆီးပြီးကားကို လွတ်ပေးလိုက်တယ်။ အဖမ်းခံရတဲ့၂ယောက်ဘယ်ကဘယ်သူတွေလည်ဆိုတာကိုမသိဘူး။ ပြန်လွတ်ပေးတယ်လို့တော့ မကြားမိဘူးလို့”လို့ ဖြစ်စဉ်ကိုသိသူ ဒေသခံတစ်ဦးက ပြောပါတယ်။

စစ်ကောင်စီတပ်ဟာ အခု ဒီဇင်ဘာထဲမှာ ရွှေဘိုမြို့နယ်က လူငယ်အများအပြားကို အရင်ကထက်ဖမ်းဆီးပေါ်တာဆွဲ ခေါ်ဆောင်နေတာလို့ ဆိုပါတယ်။