ဒီဇင်ဘာ-၂၈၊၂၀၂၅။သတိုး/People’s Spring
စစ်ကောင်စီက ရွေးကောက်ပွဲပြုလုပ်တဲ့နေ့မှာ အလယ်ပိုင်းတိုင်းစစ်ဌာနချုပ်နဲ့ ဘုရင့်နောင်တိုက်ခိုက်ရေး သင်တန်းကျောင်းကို ရှော့တိုက်ဒုန်းတွေနဲ့ ပစ်ခတ်တိုက်ခိုက်ခဲ့တယ်လို့ Brave Warriors For Myanmar အဖွဲ့ တာဝန်ရှိသူကပြောပါတယ်။
“ဒီနေ့က နှစ်ပွဲ။ လပခကိုပစ်တယ်။ သံတောင်ကြီး ဘုရင့်နောင်တပ်ကိုလည်း ထပ်ပစ်ထားတယ်” လို့ BWMက ပြောပါတယ်။
စစ်ကောင်စီရွေးကောက်ပွဲ ပြုလုပ်တဲ့ ဒီနေ့ (ဒီဇင်ဘာ ၂၈) နံနက် ၁ နာရီမှာ မန္တလေးနန်းတွင်းက အလယ်ပိုင်းတိုင်းစစ်ဌာနချုပ်ကို ရှော့တိုက်ဒုန်း ငါးလုံးပစ်ခဲ့တာဖြစ်ပြီး လေးလုံးအောင်မြင်ခဲ့တယ်လို့ BWM ကထုတ်ပြန်ထားပါတယ်။
Public Service Announcement
အဲဒီစစ်ဆင်ရေးကို BWM ရဲ့ ဦးဆောင်မှုနဲ့ No More Dictatorship (NMD-PDF) ၊ Shadow (အညာ) နဲ့ Infinity စတဲ့ ပူးပေါင်းအဖွဲ့တွေ လုပ်ဆောင်ခဲ့တာဖြစ်ပြီး စစ်ကောင်စီတပ် နှစ်ဦးသေဆုံးကာ ထိခိုက်မှုများနိုင်တယ်လို့ BWM ကဆိုပါတယ်။
ရှော့တိုက်ဒုန်းလေးလုံးထဲက သုံးလုံးဟာ ကျုံးထဲ ကျခဲ့ပြီး တစ်လုံးကတော့ နန်းတွင်းထဲကို ကျတာကြောင့် ထိခိုက်သူနှစ်ဦးရှိတယ်လို့ စစ်ကောင်စီခန့် မန္တလေးတိုင်းဝန်ကြီးချုပ်က စစ်ကောင်စီ ထောက်ခံတဲ့ မီဒီယာတွေကို ဖြေကြားထားပါတယ်။
အဲဒီတိုက်ခိုက်မှုအပြီးမှာ စစ်ကောင်စီက လက်နက်ကြီးနဲ့ ရမ်းသမ်းပစ်ခတ်ခဲ့ပြီး စစ်ဆင်ရေးလုပ်ဆောင်တဲ့ အဖွဲ့တွေ ထိခိုက်မှုမရှိပေမယ့် ပြည်သူတချို့တော့ ထိခိုက်မှုရှိတာကြောင့် စိတ်မကောင်းဖြစ်ရတယ်လို့ BWM ကထုတ်ပြန်ထားပါတယ်။
မဟာမိတ်အဖွဲ့ တွေအနေနဲ့ အဲဒီစစ်ဆင်ရေးလုပ်ဆောင်ရတာက စစ်ကောင်စီရဲ့ ရွေးကောက်ပွဲကို ပြည်သူတွေက ဆန့်ကျင်ကြောင်း ပြတဲ့အနေနဲ့ လုပ်ဆောင်ခဲ့တာဖြစ်တယ်လို့ ဆိုပါတယ်။
သံတောင်ကြီးမြို့နယ်က ဘုရင့်နောင်တိုက်ခိုက်ရေး သင်တန်းကျောင်းကိုတော့ ဒီနေ့ နေ့လည် ၁ နာရီလောက်မှာ ရှော့တိုက်ဒုန်း ခြောက်လုံးနဲ့ တိုက်ခိုက်ခဲ့တာလို့ အထက်ပါတာဝန်ရှိသူကပြောပါတယ်။
ဒီသင်တန်းကျောင်းက စစ်ကောင်စီအရာရှိတွေကို တပ်ရင်းမှုး ၊ တပ်စုမှုး ၊ တပ်ခွဲမှုး သင်တန်းပေးနေတာဖြစ်ပြီး လက်ရှိမှာလည်း တပ်ရင်းမှုးသင်တန်းပေးနေတာကြောင့် တိုက်ခိုက်ခဲ့တာလို့ ဆိုပါတယ်။
ဒီစစ်ဆင်ရေးကိုတော့ BWM ရဲ့ ဦးဆောင်မှုနဲ့ Mountain Knight Civilian Defense Forces (MKCDF) ၊ Anti-Coup People’s Liberation Force (ACPLF) ၊ သံတောင်မြောက်ပိုင်းအထူးဒေသ ဖိုက်တာဆားခဲ အဖွဲ့ တို့က KNLA တပ်မဟာ (၂) ၊ တပ်ရင်း (၅) နဲ့ ပူးပေါင်းတိုက်ခိုက်ခဲ့တာလို့ သတင်းထုတ်ပြန်ထားပါတယ်။
တိုက်ခိုက်ရေးသင်တန်းကျောင်းထဲကနေ အနီးအနားကပြည်သူတွေကို ပစ်ခတ်မှုတွေပြုလုပ်နေတဲ့ လက်နက်ကြီးအထိုင်နေရာ အပါအဝင် တပ်ရင်းမှူး သင်တန်းဆောင် ၊ တပ်ရင်းမှူးအိပ်ဆောင် နဲ့ ဘုရင့်နောင်ကျောင်းဌာနချုပ်တွေ ကို ပစ်မှတ်ထားဆောင်ရွက်ခဲ့တယ်လို့သိရပါတယ်။
