ဇန်နဝါရီ ၄၊ ၂၀၂၆ ဇေအောင်/People’s Spring
စစ်ကိုင်းတိုင်း၊ မုံရွာမြို့နယ်၊ ညောင်ပင်ရွာ လေကြောင်းတိုက်ခိုက်မှုကြောင့် ထိခိုက်ဒဏ်ရာရတဲ့သူတွေအနက် ကလေးတစ်ဦး ထပ်မံသေဆုံးခဲ့ပြီး သေဆုံးသူ၂ဦးရှိလာတယ်လို့ဒေသခံတွေကပြောပါတယ်။
ဇန်နဝါရီ ၂ ရက် ညနေ ၄ နာရီခန့်က မုံရွာမြို့နယ် အရှေ့တောင်ခြမ်းမှာရှိတဲ့ ညောင်ပင်ကျေးရွာက ရေတွင်းမှာ ပြည်သူတွေရေချိုးနေချိန် အနောက်မြောက်တိုင်းစစ်ဌာနချုပ်(နမခ)ကနေ ဂျိုင်ရိုကော်ပတာ ၂ စီးနဲ့ ဗုံးကြဲသွားခဲ့ပါတယ်။
အဲဒီလေကြောင်းတိုက်ခိုက်မှုကြောင့် ညောင်ပင်ရွာက အသက် ၁၀ နှစ်အရွယ် မောင်ကျော်မင်းထက်ဆိုသူ ကလေးတစ်ဦး ပွဲချင်းပြီး သေဆုံးပြီး ၇ ဦးထက်မနည်း ထိခိုက်ဒဏ်ရာ ရရှိခဲ့ပါတယ်။ ဒဏ်ရာရသူတွေထဲက အသက် ၁၁ နှစ်အရွယ်ကလေးငယ် မသွန်းမီမီဇော်ဆိုသူမှာ ဒဏ်ရာပြင်းထန်တာကြောင့် ထပ်မံသေဆုံးခဲ့ကြောင်း ဒေသခံများက ပြောပါတယ်။
Public Service Announcement
“ နောက်စေ့ အစမှန်တဲ့ ကောင်မလေးတစ်ယောက် အဲ့နေ့ညကဆုံးသွားတာ” လို့ဒေသခံတစ်ဦးက ပြောပါတယ်။
စစ်တပ်ဟာ ရေတွင်းအနီးက စာသင်ကျောင်းကိုချတာဖြစ်ပြီး ကျောင်းပေါ်မကျဘဲ ရေချိုးနေတဲ့ပြည်သူတွေ ထိခိုက်ခဲ့တာဖြစ်ကြောင်း ဒေသခံတွေက ပြောပါတယ်။
ကျန်တဲ့ထိခိုက်ဒဏ်ရာရသူတွေလည်းပေါင် ၊ ကျော၊ လက်တို့မှာ ဒဏ်ရာရထားပြီး ဆေးကုသနေရကြောင်း စုံစမ်းသိရှိရပါတယ်။
စစ်တပ်ဟာ ၎င်းတို့လုပ်မယ့်ရွေးကောက်ပွဲလုပ်မယ့် ဒီဇင်ဘာလအတွင်းမှာ ပြည်သူတွေကို လေကြောင်းတိုက်ခိုက်မှုတွေ ဆက်တိုက်ပြုလုပ်နေပြီး ဒီဇင်ဘာလတစ်လတည်း စစ်တပ်ရဲ့ လေကြောင်းတိုက်ခိုက်မှုကြောင့် ပြည်သူ ၁၅၀ ကျော် သေဆုံးခဲ့ပြီး အနည်းဆုံး ၁၈ဝ ကျော် ထိခိုက်ဒဏ်ရာရခဲ့ပါတယ်။
မုံရွာနမခက ဂျိုင်ရိုကော်ပတာတွေဟာ စစ်ကိုင်းတိုင်းတင်မကဘဲ မကွေးတိုင်းထဲကနယ်တွေအထိ ပြည်သူတွေကို ဗုံးကြဲတိုက်ခိုက်နေကြောင်း ဒေသခံတွေဆီက သိရပါတယ်။
