ဇန်နဝါရီ-၁၈၊၂၀၂၆။မိုမို/People’s Spring
မန္တလေးတိုင်း၊ တောင်သာမြို့နယ်က စစ်တပ် စခန်းတစ်ခုတိုက်ခိုက်ပြီး စစ်ကူလာတဲ့ ကားနှစ်စီး မိုင်းထိတယ်လို့ မြင်းခြံခရိုင် အမှတ်(၃)တပ်ရင်း တာဝန်ရှိသူက ပြောပါတယ်။
မနေ့က(ဇန်နဝါရီ ၁၇ ရက်) မနက် ၆နာရီခွဲကစပြီး မြင်းခြံ-ပုဂံညောင်ဦး ကားလမ်းဘေးက တမိုက်သာ ကျေးရွာက စစ်တပ်စခန်းကို ဝင်တိုက်ခဲ့တာလို့ ဆိုပါတယ်။
“စစ်ဆေးရေးဂိတ်လုပ်တဲ့ နေရာ။ဘန်ကာ ငါးခု လောက်ရှိတယ်။သူတို့ နေရာယူချိန်မရခင် ဘန်ကာတစ်ခုသိမ်းရလိုက်တယ်။တမိုက်သာမှာ ပွဲဖြစ်တော့ မြင်းခြံကနေ စစ်ကူကားသုံးစီးထွက်လာတယ်။ပထမတစ်စီးကတော့ လွတ်သွားတယ်။မိုင်းနဲ့နောက်နှစ်စီးကတော့ ထိတယ်”လို့ အထက်ပါတာဝန်ရှိသူက တိုက်ခိုက်မှု ဖြစ်စဥ်ကိုရှင်းပြပါတယ်။
Public Service Announcement
ဒါအပြင် စစ်ကူကားတွေကို ပစ်ခတ်မှုလုပ်ခဲ့ပြီး ထိခိုက်မှုရှိနိုင်တယ်လို့ အသိပေးပါတယ်။
“တမိုက်သာက ပျူစောထီးရွာ။စစ်ကောင်စီတပ်သား နဲ့ ပျူစောထီး အင်အား ၅၀လောက်ရှိတယ်”လို့ တောင်သာမြို့နယ်စစ်ရေးသတင်းရင်း မြစ်က ပြောပါတယ်။
မြင်းခြံမြို့ကနေ စစ်ကူလာတဲ့ စစ်တပ်ဟာ တောင်သာမြို့နယ်က ကန်တော်ကျေးရွာကို မီးရှို့နေတယ်လို့ သိရပါတယ်။
ပြီးခဲ့တဲ့သုံးလခန့်ကလည်း မြင်းခြံ – ညောင်ဦးလမ်းပိုင်းမှာ စစ်တပ် ကြားဖြတ်တိုက်ခိုက်ခံရပြီး တော်လှန်ရေးတပ်တွေက လက်နက်ခဲယမ်းတွေရရှိခဲ့ပါတယ်။
စစ်တပ်က မြင်းခြံ၊နွားထိုးကြီးနဲ့ တောင်သာ မြို့နယ်တွေမှာ စစ်ကြောင်းထိုး နယ်မြေရှင်းလင်းမှုတွေမှာ အရပ်သားတွေကို PDFလို့ စွပ်စွဲ သတ်ဖြတ်တာနဲ့ ဒေသခံတွေရဲ့ နေအိမ်တွေ မီးရှို့တာတွေ ရှိပါတယ်။
ရုပ်သံ – တောင်သာ တပ်ရင်း
