ဖေဖော်ဝါရီ-၁၊၂၀၂၆။မိထက်/People’s Spring
ဧရာဝတီတိုင်း၊ အထောင်မြို့မှာ စစ်ကောင်စီ စီစဉ်ကျင်းပတဲ့ လောင်းကစားနဲ့ ဖျော်ဖြေရေးပွဲတော်(အာဝါဒေးပွဲ)မှာ မျက်လှည့်ပြရင်း ကလေးငယ်တစ်ဦး မီးလောင်ဒဏ်ရာအပြင်းအထန် ရသွားပါတယ်။
အထောင်မြို့ဟာ ဟင်္သာတ-ပုသိမ်လမ်းမကြီးဘေးမှာရှိပြီး အဲ့ဒီမြို့မှာ စစ်ကောင်စီက အာဝါဒေးပွဲ ကျင်းပနေတာပါ။
” မျက်လှည့်ပွဲမှာ ဓာတ်ဆီလောင်းပြီး မီးရှို့တဲ့အခန်းပါတယ်။ ဟင်္သာတဘက်ကလာတဲ့ လောင်းကစားသမားတစ်ယောက်က သူဝင်လုပ်မယ်ဆိုပြီး ကလေးကို ဓာတ်ဆီလောင်းတာမှာ မီးစွဲတာ။ အဲ့လူကို ဖမ်းသွားတယ်”လို့ အထောင်မြို့ခံတစ်ဦးက ပြောပါတယ်။
Public Service Announcement
ဒဏ်ရာရတဲ့ ကလေးဟာ အသက်(၁၂)နှစ်ခန့်ရှိပြီဖြစ်ပြီး ဆေးရုံတက်ကုသနေရတယ်လို့ သိရပါတယ်။
အာဝါဒေးပွဲဆိုတာ ပျော်ပွဲ၊ရွှင်ပွဲခေါင်းစဉ်နဲ့ ကြက်ဝိုင်း၊ဖဲဝိုင်း၊ ဂျင်တို့လို လောင်းကစားပွဲပြုလုပ်တဲ့ ပွဲဖြစ်ပါတယ်။ မြို့နယ်အုပ်ချုပ်ရေးမှူးခွင့်ပြုချက်နဲ့ ဒေသခံလူမိုက်အမည်ခံတွေ၊ ပျူစောထီးတွေက မြေပြင်မှာ ဦးစီးပါတယ်။
စစ်ကောင်စီတပ်နဲ့ ပြည်သူ့စစ်တွေက လုံခြုံရေးယူပေးပါတယ်။
ပုသိမ်- ဟင်္သာတ-ပြည်လမ်းမကြီးဘေးက မြို့တွေအပါအဝင် ဧရာဝတီတိုင်းထဲကမြို့တွေမှာ စစ်ကောင်စီက အာဝါဒေးပွဲတွေလုပ်ခိုင်းပြီး လူထုကို တော်လှန်ရေးထဲ စိတ်မဝင်စားအောင်နဲ့ ငွေကြေးကျပ်တည်းအောင် လုပ်ထားတယ်လို့ ဒေသခံတွေက ပြောပါတယ်။
” တောကတက်လာတဲ့သူတွေ ထော်လာဂျီတွေ၊ သုံးဘီးကားတွေပေါင်ပြီး လောင်းကစားလုပ်ကြတာ။ဒိုင်တွေက စစ်တပ်နဲ့ ပေါင်းတဲ့ကောင်တွေ။ စပါးပေါ်ချိန် ပဲပေါ်ချိန် တောင်သူတွေငွေကို သဲ့ယူတာ”လို့ အထောင်မြို့ခံတစ်ဦးက ပြောပါတယ်။
လက်ရှိမှာ ဇလွန်၊ဟင်္သာတ၊ ဓနုဖြူမြို့တို့နဲ့ ၁၀မိုင်မှမိုင်၂၀ကြားဝေးတဲ့ လေးမျက်နှာမြို့နယ်၊ သာပေါင်းမြို့နယ်တွေမှာ အာရက္ခတပ်တော်(AA)၊PDF ပူးပေါင်းတပ်တွေနဲ့ စစ်ကောင်စီတိုက်ပွဲတွေအပြင်းအထန်ဖြစ်ပွားနေပါတယ်။ အထောင်မြို့ကလည်း လေးမျက်နှာမြို့အနီးမှာ ရှိပါတယ်။
တိုက်ပွဲဖြစ်ပွားနေတဲ့နေရာတွေကို စစ်ကောင်စီကလေ ကြောင်းကနေမကြာခဏဗုံးကြဲနေပြီး တခြားမြို့တွေကိုလည်းတိုက်လေယာဉ်ပျံသန်း ခြိမ်းခြောက်နေပါတယ်။ တစ်ချိန်တည်းမှာပဲ တိုက်ပွဲမဖြစ်တဲ့ မြို့တွေမှာ အာဝါဒေးပွဲတွေလုပ်နေတာပါ။
အထောင်မြို့ဟာ ကျုံပျော်မြို့နယ်ထဲမှာ ပါပါတယ်။ကျုံပျော်မြို့ဟာ ဧရာဝတီတိုင်းထဲမှာ ၂၀၂၁ အာဏာသိမ်း စစ်တပ်ကို ပထမဆုံး လက်နက်ကိုင်တိုက်ခိုက်ခဲ့တဲ့ မြို့ဖြစ်ပါတယ်။
၂၀၂၁ ဇွန်လ ၅ရက်နေ့က ကျုံပျော်မြို့နယ် လှေဆွဲကျေးရွာမှာ ဒေသခံတွေနဲ့ စစ်ကောင်စီတပ် အပြန်အလှန်ပစ်ခတ်မှုတွေ ဖြစ်ခဲ့ပါတယ်။ အဲ့ဒီပစ်ခတ်မှုကြောင့် ဒေသခံ၂၀ ဦးထက်မနည်း သေဆုံးခဲ့တယ်လို့ သတင်းတွေ ထွက်ခဲ့ပါတယ်။ စစ်ကောင်စီက အကြမ်းဖက်နှိမ့်နင်းခဲ့ပြီး တစ်ဖက်မှာ ဒေသခံတွေ တော်လှန်ရေးကို စိတ်မဝင်စားအောင် လောင်းကစားဝိုင်းတွေ လုပ်ခွင့်ပြုနေတာပါ။
