ဖေဖော်ဝါရီ-၉၊၂၀၂၆။အိမ်သွင်/People’s Spring
ရခိုင်ပြည်နယ် မြောက်ဦးမြို့မှာရှေးဟောင်း ရတနာပစ္စည်းတွေ နဲ့ ငွေဒင်္ဂါးပြားတွေ မြေကြီးထဲကနေ စတင်တွေ့ရှိခဲ့ပြီး အပ်နှံပေးသူကျောင်းသားလေးဦးကို အာရက္ခတပ်တော်(AA)ငွေကျပ်သိန်း ၃၀၀ ပေးအပ်ခဲ့ပါတယ်။
တတိယမြောက်ဦးခေတ် ရခိုင်သက္ကရာဇ် ၁၀၃၄(ခရစ်သက္ကရာဇ် ၁၆၇၂) ခုနှစ်က စန္ဒသုဓမ္မရာဇာဘုရင်လက်ထက်နဲ့ သက္ကရာဇ် ၁၀၀၀ (ခရစ်သက္ကရာဇ် ၁၆၃၈)က နရပတိကြီး လက်ထက်ကသုံးစွဲခဲ့တဲ့ ငွေဒင်္ဂါး ၁၅၀ ကျော်၊ အချင်း ၁ လက်မခန့်ရှိ တဲ့ကျောက်စိမ်း၁တုံး၊ ရွှေပုရပိုက်၁ခု၊ ရွှေလက်စွပ်၃ကွင်း၊ ရွှေထည်အချို့ကို မြောက်ဦးမြို့က ကစားကွင်းတစ်ခုမှာ ဇန်နဝါရီလ ၂၄ ရက်နေ့က တွေ့ရှိခဲ့တာပါ။
” ကျောင်းသားလေးတွေဘောလုံးကစားရာကနေ တွေ့တာ။တွေ့တွေ့ချင်းပဲလူကြီးတွေကို အကြောင်းကြားတယ်လေ။ ဒါက အရမ်းကို အားပေးသင့်တာကို ကျတော်တို့ လက်ခံတယ်” လို့ မြောက်ဦးမြို့ခံတစ်ဦးကပြောပါတယ်။
Public Service Announcement
ဆုချီးမြှင့် ခံရသူ ကျောင်းသားတွေက Grade-7 ကျောင်းသား တစ်ဦး နဲ့ Grade-5 ကျောင်းသား သုံးဦးဖြစ်ပါတယ်။ တစ်ဦးကို ၇၅သိန်းကျပ်နဲ့ စုစုပေါင်း ကျပ်သိန်း ၃၀၀ ချီးမြှင့်ခဲ့တာလို့သိရပါတယ်။
ရခိုင်ပြည်နယ်မှာ၂၀၂၅ခုနှစ်၊ဇူလိုင်လကလည်း မြောက်ဦးခေတ် ရခိုင်ဘုရင် နရပတိကြီး (၁၆၃၈-၁၆၄၅)လက်ထက်မှာသွန်းလုပ်ခဲ့တဲ့ ရှေးဟောင်းခေါင်းလောင်းတစ်ခုကိုလည်း တူးဖော်တွေ့ရှိခဲ့တယ်လို့ AAက ဇန်နဝါရီလ ၃ရက်နေ့မှာ ထုတ်ပြန်ခဲ့ပါတယ်။ အဲ့ဒီ ခေါင်းလောင်းကိုတူးဖော်အပ်နှံခဲ့တဲ့ ဦးထွန်းအောင်ကိုလည်း AA က ကျပ်ငွေ သိန်း ၅၀၀ ဂုဏ်ပြုချီးမြှင့်ခဲ့ပါတယ်။
အဲဒီရှေးဟောင်းခေါင်းလောင်းကြီးနဲ့ပတ်သက်လို့ ပညာရှင်တွေရဲ့ အကြံပြုချက်တွေ ပေးပို့ဖို့ email လိပ်စာ-arakanidp@163.comနဲ့တယ်လီဂရမ်လိပ်စာ- @BELLINFO2026 ကိုအပြုသဘောဆောင်ဆက်သွယ်ပေးဖို့ AA ကထုတ်ပြန်ထားပါတယ်။
