ဖေဖော်ဝါရီ ၂၅၊ ၂၀၂၆။ ထားမြတ်/People’s Spring
မွန်ပြည်နယ်၊ ရေးမြို့နယ်တွင် ခေါဇာမြို့မှာ ကင်းလှည့်နေတဲ့ စစ်ကောင်စီတပ်ကို ညီနောင်တပ်ဖွဲ့ကကြားဖြတ်တိုက်ခိုက်ခဲ့ကြောင်း မွန်ပြည်တော်လှန်ရေးတပ်(MSRF)က သတင်းထုတ်ပြန်ပါတယ်။
ဖေဖော်ဝါရီ ၂၄ရက်ညပိုင်းက ခေါဇာမြို့ ခေါဇာ ဈေးကြီးရှေ့ မှာ ကင်းလှည့်နေသော စစ်ကောင်စီတပ်ကို ညီနောင်တပ်ဖွဲ့တွေဖြစ်တဲ့ မွန်ပြည်ဖက်ဒရယ်ကောင်စီ ကာကွယ်ရေးဌာန ကွပ်ကဲမှုအောက်ရှိ မွန်ပြည်တော်လှန်ရေးတပ် (MSRF)နဲ့ နည်းဗျူဟာ (၃၃) ကွပ်ကဲမှုအောက်ရှိ ကံပေါက်ပြည်သူ့ကာကွယ်ရေးတပ်ရင်း/အမှတ် (၈၀၀၂) တို့ ပူးပေါင်းပြီး ကြားဖြတ် တိုက်ခိုက်ခဲ့တာလို့ဆိုပါတယ်။
မနေ့ည ၈နာရီမှာ စတင်ခဲ့ပြီး မိနစ် ၂၀ကြာခဲ့တဲ့ စစ်ဆင်ရေးအတွင်း စစ်ကောင်စီဘက်က ၂ဦးသေဆုံ၊ ၂ဦး ဒဏ်ရာရပြီး တော်လှန်ရေးတပ် ရဲဘော်တွေ အောင်မြင်စွာ ခွာစစ်ဆင်နိုင်ခဲ့တယ်လို့ အသိပေးပါတယ်။
Public Service Announcement
စစ်ဆင်ရေးတွေ ဆက်တိုက်ရှိနေတဲ့ အခြေအနေနဲ့ပတ်သက်ပြီး ဒေသတွင်း စစ်ရေးအခြေအနေတွေ မေးမြန်းဖို့ MSRF ပြောရေးဆိုခွင့်ရှိသူ မိတလဉာဏ်ထံ ဆက်သွယ်ထားပြီး အဆက်အသွယ် မရသေးပါဘူး။
MSRFနဲ့ တော်လှန်ရေးပူးပေါင်းတပ်တွေဟာ ပြီးခဲ့တဲ့ ရက်ပိုင်းကလည်း မွန်ပြည်နယ် ရေးမြို့နယ်နဲ့ ကြာအင်းဆိပ်ကြီးမြို့နယ်တွေက စစ်ကောင်စီတပ်တွေကို တိုက်ခိုက်တဲ့ စစ်ဆင်ရေး တွေ ဖော်ဆောင်ခဲ့ပါသေးတယ်။
ဇရပ်မြိုနယ်ရှိ အနင်းကျေးရွာရဲစခန်း ကို ဖေဖော်ဝါရီ ၂၁ရက်မှာ ဒရုန်းနဲ့ တိုက်ခိုက်ခဲ့သလို ဖေဖော်ဝါရီ ၂၂ရက်နဲ့ ၂၃ရက်တွေမှာ ရေးမြို့နယ် နှစ်ကရင်ရွာနဲ့ အောင်သပြေရွာအနီး အင်အား ၁၅၀နဲ့ စစ်ကြောင်းထိုးနေတဲ့ စစ်ကောင်စီတပ်ကို တိုက်ခိုက်ခဲ့တာလို့ ဆိုပါတယ်။ အဲဒီ တိုက်ခိုက်မှုအတွင်း စစ်ကောင်စီဘက်က ၅ဦးသေဆုံးခဲ့သလို တော်လှန်ရေး ရဲဘော် ၂ဦးလည်း ကျဆုံးခဲ့တယ်လို့ တိုက်ပွဲမှာပါဝင်တဲ့ တော်လှန်ရေးတပ်တွေက အသိပေးထားပါတယ်။
စစ်ဆင်ရေးမှာ ပါဝင်တဲ့ တပ်တွေကတော့ မွန်ပြည်တော်လှန်ရေးတပ် (MSRF)၊ ရေးပြည်သူ့ကာကွယ်ရေးတပ် (YPDF)၊ရေးပျောက်ကျားတပ်(YGF)၊ KNLA တပ်ရင်း(၂၇) တပ်ခွဲ (၁) နဲ့ ဗျူဟာ ၃၃ ဒေါနချေမှုန်းရေးတပ်ခွဲ၊ တပင်ရွှေထီးတပ်တို့ ဖြစ်တယ်လို့ ထုတ်ပြန်ထားပါတယ်။
