TNLAနဲ့ MNDAA တင်းမာမှု ပြေလည်ပြီလို့ ဒေသခံတွေပြော

မတ်-၂၊ ၂၀၂၆။ People’s Spring

ရှမ်းပြည်နယ် မြောက်ပိုင်း ကွတ်ခိုင်မြို့မှာ တအာင်းတပ်TNLAနဲ့ ကိုးကန့်တပ်MNDAA တင်းမာမှု နှစ်ဘက် ခေါင်းဆောင်တွေဆွေးနွေးညှိနှိုင်းပြီး ပြေလည်မှုရပြီလို့ ဒေသခံ သတင်းရင်းမြစ်တွေက ပြောပါတယ်။

၁၀၂၇ စစ်ဆင်ရေးနဲ့အတူ သိမ်းယူထားတဲ့ ကွတ်ခိုင်မြို့မှာ TNLAနဲ့ MNDAA တို့ ဖေဖော်ဝါရီ ၁၃ရက် ညကစပြီး တင်းမာခဲ့တာပါ။ ပစ်ခတ်မှုအသေးစားဖြစ်ခဲ့သလို ထိုးကြိတ်တာ၊ တစ်ဖွဲ့နဲ့တစ်ဖွဲ့ ဖမ်းဆီးတာတွေလည်း ရှိခဲ့ပါတယ်။ မတ်လ ၁ရက်မနေ့မှာတော့ TNLAနဲ့ MNDAAနှစ်ဘက် ခေါင်းဆောင်တွေဆွေးနွေးညှိနှိုင်းခဲ့တာလို့ ဒေသခံတစ်ဦးကပြောပါတယ်။

မြို့နဲ့ မြို့ပတ်ဝန်းကျင်မှာက TNLAရော MNDAAရော အများကြီးရှိနေပြီး နှစ်ဘက်စလုံးက ခွဲဝေ အုပ်ချုပ်မယ်လို့ သိရကြောင်း ဒေသခံသတင်းရင်းမြစ်က ပြောပါတယ်။ သူတို့ချင်း အဆင်ပြေပြီလို့လည်း အဲဒီသတင်းရင်းမြစ်က ဆိုပါတယ်။

Public Service Announcement

ကွတ်ခိုင်မြို့ကို သိမ်းယူပြီးတဲ့နောက် TNLAရော၊ MNDAAပါ ထိန်းချုပ်ထားပြီး နှစ်ဖက်စလုံးက အုပ်ချုပ်ရေးယန္တရားတည်‌ ဆောက်ခဲ့ကြတာပါ။ သိန္နီ၊ ကွတ်ခိုင်၊ လောက်ကိုင်၊ မုံးကိုးခရိုင်တွေကို ခရိုင် (၄) ခု၊ မြို့တော် (၁) ခုပါဝင်တဲ့ အထူးဒေသ(၁)အဖြစ် MNDAAက ဖွဲ့စည်းထားပါတယ်။TNLAကလည်း တပ်မဟာ(၅)စစ်ဒေသအဖြစ် ကြေညာထားပါတယ်။

ဖေဖော်ဝါရီ ၁၃ရက် ညက စတင်ခဲ့တဲ့ နှစ်ဘက်တင်းမာမှုကို ၂ပတ်ကျော်အကြာမှာ ညှိနှိုင်းနိုင်ပြီလို့ သတင်းထွက်ပေါ်လာတာဖြစ်ပါတယ်။ ဒါပေမဲ့ နှစ်ဘက်စလုံးက တရားဝင်သတင်းမထုတ်ပြန်သေးသလို ဒေသခံပြည်သူလူထုကိုလည်း ရှင်းပြတာမရှိသေးတဲ့အတွက် စိုးရိမ်မှုတွေကတော့ ရှိနေဆဲလို့ ဒေသခံတွေက ဆိုပါတယ်။

ဒေသခံ အမျိုးသမီးတစ်ဦးက အဲဒီဒေသမှာ စစ်ကောင်စီရဲ့ အန္တရာယ်ကိုပါ စိုးရိမ်နေရတာကြောင့် TNLA နဲ့ MNDAA တို့ကို အရမ်းပြေလည်စေချင်ကြောင်း နဲ့ လက်ရှိမှာ နေရထိုင်ရတာ နောက်ကြောင်းမအေးကြောင်း ပြောပါတယ်။

တစ်ဖက်မှာ စစ်ကောင်စီကလည်း ကွတ်ခိုင်မြို့ကိုတရုတ်အစိုးရအကူအညီနဲ့ ပြန်တောင်းနေတယ်လို့ သိရပါတယ်။