မတ် ၄၊ ၂၀၂၆။ ထားမြတ်/People’s Spring
တနင်္သာရီတိုင်း၊ တနင်္သာရီမြို့နယ် တမုတ်ချုံကျေးရွာမှာ တပ်စွဲထားတဲ့ စစ်တပ် နဲ့ ပြည်သူ့ကာကွယ်ရေးတပ်ဖွဲ့များအကြား တိုက်ပွဲတွေ ဆက်တိုက်ဖြစ်ပွားခဲ့ကြောင်း မြိတ်ခရိုင် တပ်ရင်း(၂)က ဒီကနေ့ မတ်လ ၄ရက်မှာ သတင်းထုတ်ပြန်ပါတယ်။
တမုတ်ချုံရွာမှာ တပ်စွဲထားတဲ့ စစ်တပ်နဲ့ ဖေဖော်ဝါရီ ၂၀ ရက်ကနေ ၂၈ ရက်အတွင်း တိုက်ပွဲတွေ ဖြစ်ပွားခဲ့တဲ့ အခြေအနေကို အသိပေးခဲ့တာဖြစ်ပါတယ်။ စစ်တပ်ကို ဒရုန်းနဲ့ အကြိမ်ရေများစွာ တိုက်ခိုက်ခဲ့တဲ့အပြင် လက်နက်ကြီး၊လက်နက်ငယ်တွေနဲ့လည်း ပစ်ခတ်တိုက်ခိုက်ခဲ့ဟု ဖော်ပြပါတယ်။
ဒါအပြင် ဖေဖော်ဝါရီအတွင်း တိုက်ပွဲတွေမှာ နယ်မြေရှင်းလင်းရေးဆောင်ရွက်စဉ် တမုတ်ချုံရွာအတွင်း စစ်တပ်နဲ့ ထိတွေ့တိုက်ပွဲ ဖြစ်ခဲ့တယ်လို့ အသိပေးပါတယ်။
Public Service Announcement
” သူတို့က တမုတ်ချုံမှာ တပ်စွဲထားလို့ လက်နက်ကြီးပစ်လိုက် ဒရုန်းချလိုက် တိုက်ပွဲဖြစ်လိုက်ပါပဲ” လို့ မြိတ်ခရိုင် တပ်ရင်း(၂) သတင်းပြန်ကြားရေး တာဝန်ရှိသူက ဒေသတွင်း စစ်ရေး အခြေအနေကို ပြောပါတယ်။
စစ်တပ်က အဲဒီမှာ ဆက်လက်တပ်စွဲထားတာဖြစ်လို့ စစ်ရေးအရှိန်မြှင့် တိုက်ခိုက်တာတွေရှိနေမယ်လို့လည်း ပြောပါတယ်။
တမုတ်ချုံရွာက စစ်တပ်ကို မြိတ်ခရိုင်တပ်ရင်း(၂) တပ်ခွဲ(၂)၊ ကော့သောင်းခရိုင် တပ်ရင်း(၁)၊ Dragon Squad ဒရုန်းတပ်ဖွဲ့၊ ADF ဒရုန်းတပ်ဖွဲ့၊ တနင်္သာရီမြို့နယ် ပကဖနဲ့ ကျွန်းစုမြို့နယ် ပကဖအဖွဲ့များ ပူးပေါင်း တိုက်ခိုက်ခဲ့ကြတာလို့ အသိပေးထားပါတယ်။
