မတ် – ၈ ၊၂၀၂၆ ၊ဆိုင်းမင်း/People’s Spring
စစ်ကိုင်းတိုင်း ၊ယင်းမာပင်မြို့နယ် ၊အရှေ့မြောက်ခြမ်းက ကျေးရွာတွေကို စစ်ကောင်စီတပ်က အင်အားအလုံးအရင်းသုံးပြီး မတ်လ ၇ ရက်က စတင်ကာ စစ်ကြောင်းထိုးလာတာကြောင့် ပြည်သူ သုံးထောင်ဝန်းကျင် ဘေးလွတ်ရာကို အရေးပေါ် ထွက်ပြေး တိမ်းရှောင်နေရတယ်လို့ ဒေသခံတစ်ဦးကပြောပါတယ်။
ယင်းမာပင်မြို့နယ် ၊ ဘန့်ဘွေး ရွာကတဆင့် အနီးဝန်းကျင်က ရွာတွေကို မတ်လ ၇ ရက်မနက်ပိုင်းကစတင်ပြီး စစ်ကြောင်းထိုးတာလို့သိရပါတယ်။
“ သူတို့ (စကစ)လူအင်အား အတော်များတယ် ကား၁၀ စီးကျော်မယ်ထင်တယ်”လို့ ဒေသခံတစ်ဦးကပြောပါတယ်။
Public Service Announcement
ဘန့်ဘွေးရွာကို စစ်ကားတွေရောက်လာချိန်မှာပဲသတင်းအရ အနီးဝန်းကျင်မှာရှိတဲ့ ကျေးရွာ ငါးရွာထက်မနည်းက ပြည်သူတွေ ထွက်ပြေးကြရတာလို့ အဲဒီဒေသခံက အသိပေးပါတယ်။
အဲဒီစစ်ကားတွေဟာ စစ်ကောင်စီတပ်ရဲ့ မုံရွာမြို့ရှိ အနောက်မြောက်တိုင်းစစ်ဌာနချုပ်ကထွက်ခွာလာတာဖြစ်ပြီး မုံရွာ-ယာကြီး-ကလေး လမ်းအတိုင်းဘန့်ဘွေးရွာကို ရောက်ရှိလာတာလို့ သိရပါတယ်။
ယင်းမာပင်မြို့နယ်အတွင်းက ထန်းဇင်ရွာ၊ မယ်စောတောတိုက်၊ ကံစုရွာ၊ ကြက်လျှာရွာ၊ တရော်ကျင်းရွာ၊ နာဘူးတောရွာ စတဲ့ကျေးရွာတွေက ဒေသခံ ထောင်ဂဏန်း စစ်ဘေးရှောင်နေကြရပါတယ်။
စစ်ကောင်စီတပ်စစ်ကြောင်းနဲ့ ဒေသခံတော်လှန်ရေးတပ်တွေကြား မှာ ထိတွေ့တိုက်ပွဲဖြစ်ပွားတာမျိုးမရှိသေးဘူးလို့သိရပါတယ်။
ဒါ့အပြင် ယင်းမာပင်ခရိုင်၊ ဆားလင်းကြီးမြို့နယ်ထဲက ကြေးနီစီမံကိန်း ဝမ်ပေါင်ကုမ္ပဏီမှာတပ်စွဲ ထားတဲ့ စစ်ကောင်စီတပ်ဖွဲ့ကလည်း ယင်းမာပင်နယ်ထဲက တည်ပင်ကန်ရွာအနောက်ခြမ်းကိုစစ်ကြောင်းထိုးနေတာကြောင့် ဒေသခံတွေ တိမ်းရှောင်နေရပါတယ်။
