▪︎စစ်တပ်က ၂ ရက်အတွင်း ပြည်သူ ငါးဦးကို သတ်ဖြတ်
စစ်ကိုင်းတိုင်းတွင် မိုခါ(မိုချာ) ဆိုင်ကလုန်းမုန်တိုင်းအန္တရာယ်ကြိုတင်ကာကွယ်ရန် လိုအပ် နေချိန်တွင် ကနီနှင့်ယင်းမာပင်နယ်စပ်၌ စစ်ကောင်စီတပ်က စစ်ကြောင်းထိုးနေပြီး နှစ်ရက်အတွင်း အရပ်သားပြည်သူ ငါးဦးကို သတ်ဖြတ်သွားကြောင်း သတင်းရရှိသည်။
အင်းအား ၁၀၀ခန့်ပါစစ်ကောင်စီစစ်ကြောင်းသည် ယင်းမာပင်မြို့နယ် ဘန့်ပွေးပျုရွာမှ မေလ ၁၁ရက်တွင် ထွက်လာပြီး ကနီနှင့်ယင်းမာပင်နယ်စပ်နေရာများကို စစ်ကြောင်းထိုးသဖြင့် ဒေသခံများထွက်ပြေးတိမ်းရှောင်နေရခြင်းဖြစ်သည်ဟု ဒေသခံများကပြောသည်။
“နဘူးတောရွာက အမေအိုတစ်ယောက်၊ နေ မကောင်းလို့ မပြေးနိုင်တဲ့သူတစ်ယောက်ကို သတ်သွားတယ်။ မဲဇယ်တောရွာက မိန်းကလေးနှစ်ယောက် ယောက်ျားလေးတစ်ယောက်ကိုလည်း သတ်သွားတယ်” ဟု ယင်းမာပင်ဒေသခံတစ်ဦးက ပြောသည်။
မေ ၁၁ရက်က နဘူးတောရွာအတွင်း စစ်ကြောင်းထိုးလာသည့်စစ်ကောင်စီတပ်ကို ပြည်သူ့ကာကွယ်ရေးမဟာမိတ်တပ်ပေါင်းစုက တိုက်ခိုက်ခဲ့ကြောင်းလည်း သတင်းရှိသည်။ ထိုနေ့တိုက်ပွဲတွင် စစ်ကောင်စီဘက်မှ ထိခိုက်မှုရှိခဲ့ပြီး အသေးစိတ်မသိသေးဟု ယင်းမာပင်ခရိုင်၊ တပ်ရင်း ၃၅ မှ ရဲဘော်တစ်ဦးကပြောသည်။ သို့သော် မဟာမိတ်တပ်ပေါင်းစုဘက်မှ KLG PDF မှ ရဲဘော်တစ်ဦးအပါအဝင် ပြည်သူ့ကာကွယ်ရေးရဲဘော်နှစ်ဦး ကျဆုံးခဲ့သည်ဟု ၎င်းကဆက်ပြောသည်။
Public Service Announcement
အဆိုပါ စစ်ကြောင်းသည် မေလ ၁၂ရက်တွင်မယ်ဇောတောရွာသို့လည်း စစ်ကြောင်းထိုးခဲ့ပြီး အမျိုးသမီးနှစ်ဦးအမျိုးသားတစ်ဦးကို ဖမ်းဆီးကာ သေနတ်ဖြင့်ပစ်သတ်သွားသည်ဟု အဆိုပါရဲဘော်ကပြောသည်။
လတ်တလော ရာသီဥတုအခြေအနေနှင့်ပတ်သက်၍ ယင်းမာပင် မြို့မှဒေသကာကွယ်ရေးရဲဘော်တစ်ဦးက “မုန်တိုင်းသတ်ပေးချက်တွေကို ကျွန်တော်တို့ ပြည်သူတွေကို ပေးနေပါတယ်။ မနေ့က တစ်ညလုံးလည်း မိုးအရမ်းမသည်းပေမယ့် ရွာနေတာပါပဲ။ စစ်ကြောင်းကပါ ဝင်နေတော့ အဲ့ဒီ စစ်ကြောင်းကိုပါ သတိထားနေရတဲ့ ပုံစံပါ”ဟုပြောသည်။
အဆိုပါ စစ်ကြောင်းသည် မေလ ၁၂ရက်ညက တွင်းရာမဘုန်းကြီးကျောင်းဝငအတွင်း တပ်စွဲခဲ့ပြီး ယနေ့ နံနက်တွင် တွင်းရာမရွာအနောက်ဘက်တွင် စစ်ကြောင်းထိုးနေကြောင်းသတင်းရရှိသည်။
ယခုအခါ ဘင်္ဂလားပင်လယ်အော်ရှိ မိုခါ ဆိုင်ကလုန်းမုန်တိုင်းသည် အားအလွန်ပြင်းသော ဆိုင်ကလုန်းမုန်တိုင်းအဆင့်ဖြင့် ရခိုင်ပြည်နယ်ကမ်းရိုးတန်းနှင့် လင်္ဂလားဒေ့ရှ်ကမ်းရိုးတန်းထိစပ်ဒေသကို မေ ၁၄ရက်နေ့လည်တွင် ဝင်ရောက်နိင်ကြောင်း အိန္ဒိယမိုးလေဝသဌာနအပါအဝင်နိုင်ငံတကာ မိုးဇလဌာနများကသတိပေးထားသည်။ မိုခါ ဆိုင်ကလုန်းမုန်တိုင်းသည်ကမ်းရိုးတန်းကိုဖြတ်သန်းပြီးနောက် မကွေး၊ စစ်ကိုင်းနှင့် ချင်းပြည်နယ်တို့ကိုကုန်းတွင်းမုန်တိုင်းအဖြစ် ဝင်ရောက်နိုင်ကြောင်း သတိပေးထားသည်။
ဓါတ်ပုံ-မြစ်ကြီးနားဂျာနယ်
