ရန်ကုန်မှာ ဧည့်စာရင်းမတိုင်လို့ဆိုပြီး လူငယ်အချို့ ဖမ်းဆီးခံရ

မတ်-၁၄၊၂၀၂၆။တာရာ/People’s Spring

ရန်ကုန်မြို့ သာကေတမြို့နယ်က ရပ်ကွက်အချို့မှာ မတ်လ ၁၃ရက်ညပိုင်းက စစ်တပ်ပူးပေါင်းအဖွဲ့က ဧည့်စာရင်းလိုက်လံစစ်ရာ ဧည့်စာရင်းမတိုင်လို့ဆိုပြီး လူငယ်အချို့ ဖမ်းဆီးခံရတယ်လို့ ဒေသခံတွေက ပြောပါတယ်။

ရန်ကုန်မြို့မှာ စစ်ကောင်စီပူးပေါင်းအဖွဲ့တွေက စီမံချက်ဟုဆိုကာ မကြာခဏရှောင်တခင်ဧည့်စာ

ရင်းဝင်စစ်လေ့ရှိတယ်လို့ ဆိုပါတယ်။

Public Service Announcement

” ဧည့်စာရင်းမတိုင်လို့ဆိုပြီး ရပ်ကွက်ထဲကကလေးတွေကို ခေါ်သွားတယ်။ များသောအားဖြင့် အလုပ်သမားတွေများတယ်။ လူငယ်တွေက စုပြီးတိုက်ခန်းငှားနေကြတာလေ။ တစ်ခါတစ်လေအလုပ်များပြီးမတိုင်ဖြစ်တာနဲ့ စစ်တဲ့အချိန်တိုးတော့ပါကုန်ကြရော”လို့ သာကေတမှာနေထိုင်သူတစ်ဦးကပြောပါတယ်။

ဖမ်းဆီးခေါ်ဆောင်ခံရတယ့် လူငယ် ၃၀ထက် မနည်းရှိပြီး တစ်ဦးကို ကျပ်သုံးသိန်းနဲ့ စစ်တပ်ကပြန်ရွေးခိုင်းတယ်လို့ ဖမ်းဆီးခံရသူတစ်ဦးကပြောပါတယ်။

သုံးသိန်းနဲ့မရွေးနိုင်ပါက စစ်မှုထမ်းထဲထည့်ပစ်မယ်လို့ ခြိမ်းခြောက်တယ်လို့ သိရပါတယ်။

” နေ့လည်ကမှ အိမ်က သုံးသိန်းနဲ့လာထုတ်သွားတာ။ သူများဆီကချေး‌ငှားရတာပေါ့။ ကိုယ်ကသူငယ်ချင်းတွေနဲ့စုနေတာ။ မိန်းကလေးတွေလည်းပါတယ်။ သုံးသိန်းပေးနိုင်ရင်လူပြန်ခေါ် မပေးနိုင်ရင် စစ်မှုထမ်းဆိုပြီး အဲဒီလိုတွေအောါငေါက်ပြီး လာပြောတယ်။ ဒီရက်ပိုင်းက ခဏခဏစစ်တယ်”လို့ ဖမ်းခံရတဲ့အမျိုးသမီးတစ်ဦးက ပြောပါတယ်။

စစ်ကောင်စီဟာ ပြီးခဲ့တဲ့ ဖေဖော်ဝါရီလထဲမှာ စစ်မှုထမ်း အပတ်စဥ်(၂၂)ကို စတင်နေပြီဖြစ်ပါတယ်။